ភ្នំពេញ៖ ការប្រកួតកីឡាប៉េតង់ជើងឯកពិភពលោកយុវជន និងស្ដ្រី លើកទី១៧ ឆ្នាំ២០១៩ នៅកម្ពុជា គឺវីរកីឡាការិនីដ៏ឆ្នើម កែ ឡេង និងយុវជន ឃួន លីហ័រ ដែលប្រកួតលើវិញ្ញាសាវាយយកពិន្ទុ (Shooting) ធ្វើបានល្អដូចគ្នា ដោយបានកក់កៅអីសម្រាប់ការប្រកួតនៅវគ្គ១/៤ ជាបន្តទៀត ខណៈក្រុមស្ត្រី និងក្រុមយុវជនលើវិញ្ញាសា៣នាក់ទល់៣នាក់ ក៏ធ្វើបានល្អឡើងទៅប្រកួតនៅជុំបន្ត។
សម្រាប់អ្នកស្រី កែ ឡេង លើវិញ្ញាសាវាយយកពិន្ទុ គឺលេងតែ១ប្រកួតដំបូងប៉ុណ្ណោះ ដែលមានពិន្ទុខ្ពស់ជាងគេឈរលេខ១ ដោយទទួល៣៨ពិន្ទុ ក្នុងចំណោមគូប្រជែង៤៣ប្រទេស ដោយសារភាពល្អ ផ្តាច់គេរបស់អ្នកស្រី កែ ឡេង គឺរង់ចាំប្រកួតបន្ត នៅវគ្គ១/៤ តែម្តង មិនឆ្លងការប្រកួតជម្រុះជុំទី២។ ចំពោះកីឡាករយុវជន ឃួន លីហ័រ លើវាយយកពិន្ទុ ប្រកួតបាន២៨ពិន្ទុ ឈរលេខរៀងទី១២ កាលពីប្រកួតជម្រុះជុំទី១ ហើយឆ្លងកាត់ជុំទី២ ទទួលបាន៤១ពិន្ទុ ក្នុងការប្រកួតជម្រុះជុំទី២ ហើយបានឡើងមកឈរលេខរៀងទី៧ និងបន្តសិទ្ធិទៅទៅប្រកួតវគ្គ ១/៤ ផ្ដាច់ព្រ័ត្រ នាថ្ងៃទី២២ ខែវិច្ឆិកា ហើយ ឃួន លីហ័រ ត្រូវការឈ្នះតែ១ប្រកួតទៀតប៉ុណ្ណោះ នឹងត្រូវកក់មេដាយសំរឹទ្ធក្នុងដៃ។ នេះជាការបញ្ជាក់ពីលោក អ៊ុក យ៉ារី គ្រូបង្វឹកក្រុមយុវជនជម្រើសជាតិកម្ពុជា។
ដោយឡែកសម្រាប់វិញ្ញាសាជាក្រុម ៣នាក់ទល់៣នាក់ ក្រុមយុវជនកម្ពុជា១ក្រុម ដែលមានកីឡាករ ឃួន លីហ័រ, ភាព វ៉ាឃីម, កុយ សុភ័ក្ត្រា និងគង់ កែវសុខាន់ គឺបានឈ្នះដាច់លើក្រុមយុវជនប្រទេសលីទុយអានី ដោយលទ្ធផល ១៣ពិន្ទុទល់០។ ចំពោះក្រុមមកម្ពុជាមួយទៀត ដែលមានកីឡាករ ទីវ រដ្ឋា, ហេង ស៊ីណា, វ៉ាន់ ភារុណ និង វុទ្ធ យុទ្ធចាន់ដារ៉ា បានវាយបកយកឈ្នះក្រុមយុវជនអង់គ្លេស យ៉ាងល្អ នៅក្នុងពិន្ទុ ១៣ទល់៩។ វិញ្ញាសាជាក្រុម ៣នាក់ទល់៣នាក់របស់កម្ពុជា កំពុងឆ្លងកាត់ការប្រកួតយ៉ាងស្វិតស្វាញនៅឡើយ ដើម្បីប្រជែងកៅអីវគ្គបន្ដ។
ក្រុមកីឡាការិនីប៉េតង់កម្ពុជា ក្រុមទី២ បានធ្វើឲ្យអ្នកគាំទ្រពេញចិត្តជាខ្លាំង ក្រោយវាយបកឈ្នះក្រុម កីឡាការិនីម៉ាដាហ្គាស្កា ដោយលទ្ធផល ១៣-១២ពិន្ទុ ក្នុងការប្រកួតជើងឯកប៉េតង់ពិភពលោកយុវជន និងស្ដ្រី លើកទី១៧ ខណៈក្រុមកីឡាការិនីកម្ពុជា (ក្រុមទី១) ដែលមានការចូលរួមពីវីរកីឡាការិនី កែ ឡេង ក៏បានយកឈះក្រុមកីឡាការិនីមីយ៉ាន់ម៉ា ១៣-៤ពិន្ទុផងដែរ។ ដោយឡែកក្រុមទី១ របស់កម្ពុជា ដែលប្រជុំដោយកីឡាការិនីជើងខ្លាំង ក៏ដណ្ដើមបានកៅអីជុំទី៣ ដូចគ្នា ក្រោយពីយកឈ្នះក្រុមកីឡាការិនីមីយ៉ាន់ម៉ា ១៣ទល់៤ពិន្ទុ។ សមាសភាពក្រុមទី១កម្ពុជានេះ គឺមានម្ចាស់មេដាយមាស៣សម័យកាល កែ ឡេង, អ៊ុក ស្រីមុំ, អ៊ុន ស្រីយ៉ា និងកីឡាការិនី កែវ សុវណ្ណា។
ចំពោះក្រុមកីឡាការិនីប៉េតង់កម្ពុជា ក្រុមទី២ ធ្វើបានយ៉ាងល្អបំផុត ដោយបានយកឈ្នះក្រុមម៉ាដាហ្គាស្កា ១៣-១២ពិន្ទុ ក្រោយពីក្រុមម៉ាដាហ្គាស្កាបានបើកការនាំមុខកម្ពុជា ១០-០ពិន្ទុ។ ក្រុមទី២កម្ពុជាបន្ដទៅជុំទី៣ ដែលសមាសភាពកីឡាការិនី ៤រូប គឺកីឡាការិនី ស្រ៊ាង សុរ៉ាឃីម, ដួង ឌីណា, ឃួន យ៉ារី និងកីឡាការិនី បង ចន្ថា៕ដោយ៖បញ្ញាស័ក្តិ
