ភ្នំពេញ៖ លោក អ៊ឹម ជីវ៉ា ជាសមាជិកសមាគមសិល្បៈ បានសរសេរលើហ្វេសប៊ុកនៅថ្ងៃទី២១ខែវិច្ឆិកានេះថា ដោយមានការសម្របសម្រួល និងផ្តល់យោបល់ពីសំណាក់លោកស្រី ហ៊ុន ស៊ីណាត មកនោះ លោកផ្ទាល់ រួមជាមួយមេធាវី និងភាគីលោក ហេង ឡុង ក្នុងស្មារតីជាគ្រួសារអ្នកសិល្បៈ បានសម្រុះសម្រួលគ្នា ឈប់តបតគ្នា ត្រូវចេះយោគយល់ទេគ្នា ចេះសាមគ្គីគ្នាចាប់ពីថ្ងៃនេះតទៅ ។
លោក អ៊ឹម ជីវ៉ា សូមជម្រាបជូនសាធារណជន និងបងប្អូនអ្នកសារព័ត៌មាន មេត្តាជ្រាបថា៖ “ក្រោយពីបានជួបជជែកគ្នារវាងខ្ញុំបាទ មេធាវី និងភាគីលោក ហេង ឡុង ក្នុងស្មារតីជាគ្រួសារអ្នកសិល្បៈ ភាគីទាំងអស់ បានសម្រេចបញ្ចប់ការយល់ច្រឡំគ្នា នាពេលកន្លងមក ដោយសន្តិវិធី”។
ក្នុងន័យនេះផងដែរ លោកអ៊ឹម ជីវ៉ា សូមធ្វើបំភ្លឺទាក់ទងនឹងការយល់ច្រឡំគ្នានាពេលកន្លងមក ដូចខាងក្រោម៖ កាលពីថ្ងៃទី15 វិច្ឆិកា 2019 ខ្ញុំបាទប្រកាសលាឈប់ពីសមាគមសិល្បៈ ដោយភ្ជាប់ជាមួយការស្នើសុំឲ្យមានបំភ្លឺចំនួន ៩ ចំនុច ទាក់ទងនឹងការងាររបស់សមាគម តាមរយៈគណនីហ្វេសបុករបស់ខ្ញុំបាទ ដែលខ្លឹមសារដែលខ្ញុំបាទបាន Post ធ្វើឲ្យមានការយល់ច្រឡំ ពីសំណាក់បង ហេង ឡុង និងអ្នកបង ចន ច័ន្ទលក្ខិណា ថាជាការបរិហាកេរ្ត៍ ការប្រមាថ និងការគំរាមកំហែងហែកកេរ្តិ៍ទៅវិញ ដែលធ្វើឲ្យ ប៉ះពាល់អារម្មណ៍របស់ពួកគាត់ ដែលជាបុគ្គលស្អាតស្អំ និងខិតខំដើម្បីសិល្បៈនាពេលកន្លងមក។
លោកបន្តថា ” ខ្ញុំបានយល់ច្បាស់ថា សកម្មភាពបណ្តឹងរបស់បង ហេង ឡុង និងអ្នកបង ចន ច័ន្ទលក្ខិណា គឺជាសកម្មភាពប្រកបសីលធម៌ ដោយមិនមានចេតនាអាក្រក់ណាមួយមកលើខ្ញុំឡើយ ផ្ទុយទៅវិញវាជាសិទ្ធិស្របច្បាប់របស់ពួកគាត់ ដែលត្រូវតែធ្វើយ៉ាងចាំបាច់ការពារភាពស្អាតស្អំ ភាពចាស់ទុំ និងកិត្តិយសរបស់សមាគម ហើយខ្ញុំបាទក៏មិនការអាក់អន់ស្រពន់ចិត្តអ្វី ទាក់ទងនឹងសកម្មភាពរបស់ពួកគាត់ឡើយ ដោយខ្ញុំបាទ បានយល់ច្បាស់ពីសិទ្ធិរបស់ពួកគាត់ ក្នុងនាមខ្ញុំបាទជាបញ្ញវន្តម្នាក់ ដែលបានបញ្ចប់ការសិក្សាបរិញ្ញាបត្រច្បាប់ ផ្ទុយទៅវិញខ្ញុំបាទយល់ឃើញថា វាគឺជាសេចក្តីថ្លៃថ្នូរមួយដែលអ្នកសិល្បៈ មិនឈ្លោះហែកហួរគ្នាតាមបណ្តាញសង្គម Facebook” ។
លោកបានបញ្ជាក់ថា ” បើទោះបីជាខ្ញុំបានលាឈប់ពីសមាគមសិល្បៈហើយក្តី ប៉ុន្តែខ្ញុំនៅតែស្រឡាញ់រាប់អានបង ហេង ឡុង និងអ្នកបង ចន ច័ន្ទលក្ខិណា ដោយស្មារតីជាគ្រួសារអ្នកសិល្បៈតែមួយ ហើយលោកក៏សូមថ្លែងអំណរអរគុណដល់អ្នកម្តាយ ហ៊ុន សីណាត ដែលជាអ្នកម្តាយដែលមានព្រហ្មវិហារធម៌ ដែលបានឲ្យកូនសម្រុះសម្រួលគ្នា ឈប់តបតគ្នា ត្រូវចេះយោគយល់ទេគ្នា ចេះសាមគ្គីគ្នាចាប់ពីថ្ងៃនេះតទៅ រស់ក្នុងដំបូលសន្តិភាពតែមួយ”៕ដោយ៖កូឡាប
