ភ្នំពេញ៖ លោក ឯកអគ្គរដ្ឋទូតប្រចាំកម្ពុជា បានកោតសរសើរ ចំពោះការអភិវឌ្ឍន៍ខ្លួនបានយ៉ាងលឿនក្នុងវិស័យសេដ្ឋកិច្ច ពាណិជ្ជកម្ម វិស័យសំណង់ ហេដ្ឋារចនាសម្ព័ន្ធអគារខ្ពស់ៗ ក្នុងរាជធានីភ្នំពេញ នាប៉ុន្មានឆ្នាំចុងក្រោយនេះ។ ចំពោះការគ្រប់គ្រងសំរាម ក្នុងរាជធានីភ្នំពេញលោក ឯកអគ្គរដ្ឋទូតក៏បានចាប់អារម្មណ៍ខ្លាំងផងដែរ ដោយលោកនឹងជំរុញឱ្យមានអ្នកវិនិយោគជប៉ុន មកធ្វើការវិនិយោគ លើបញ្ហាការគ្រប់គ្រង និងប្រមូលសំរាមក្នុងរាជធានីភ្នំពេញ។
នារសៀលថ្ងៃពុធ ទី២០ ខែវិចិ្ឆកា ឆ្នាំ២០១៩នេះលោក ឃួង ស្រេង អភិបាល នៃគណៈអភិបាលរាជធានីភ្នំពេញ បានអញ្ជើញជួបសម្ដែងការគួរសម ជាមួយលោក មិកាមិ ម៉ាស្សាហិរូ ( H.E. Mr. MIKAMI Masahiro ) ឯកអគ្គរដ្ឋទូតវិសាមញ្ញ និងពេញសមត្ថភាពជប៉ុនប្រចាំព្រះរាជាណាចក្រកម្ពុជា ដើម្បីពិភាក្សាលំហូរចរាចរណ៍ក្នុងរាជធានីភ្នំពេញ និងស្វែងយល់អំពីការគ្រប់គ្រងសំរាម ក្នុងរាជធានីភ្នំពេញ និងការទាញយកថាមពលពីសំរាម ( Waste Energy )។
លោកឃួង ស្រេង បានមានប្រសាសន៍ថា រាជធានីភ្នំពេញបានកើតចេញពីទីក្រុង ដែលមិនមានមនុស្សរស់នៅសោះ រហូតបានក្លាយជាទីក្រុងមួយ មានការអភិវឌ្ឍរីកចម្រើន ក្រោមការដឹកនាំរបស់សម្តេចតេជោហ៊ុន សែន សព្វថ្ងៃនេះ ហើយការអភិវឌ្ឍរីកចម្រើននេះ ក៏មានការចូលរួមជួយជ្រោមជ្រែងយ៉ាងពេញទំហឹង ពីប្រទេសជប៉ុនផងដែរ ពិសេសអង្គកាចៃកា ដែលបានជួយយ៉ាងច្រើន លើវិស័យហេដ្ឋារចនាសម្ព័ន្ធ និងទឹកស្អាតជាដើម ហើយនៅពេលដ៏ខ្លីខាងមុខនេះ តាមរយៈកម្ចីពីធានាគារ ADB ជប៉ុន នឹងកសាងស្ថានីយទឹកស្អាតដ៏ធំមួយ នៅខាងជើងរាជធានីភ្នំពេញ។
លោកឃួង ស្រេង បានបន្តទៀតថា ទន្ទឹមនឹងការរីកចម្រើននេះ ភ្នំពេញក៏បានលេចចេញជាបញ្ហាប្រឈមជាច្រើនផងដែរ ដូចជាបញ្ហាកកស្ទះចរាចរណ៍ ដែលបញ្ហានេះជប៉ុនក៏បានជួយយ៉ាងច្រើនផងដែរ មានទាំងការជួយលើការសិក្សាលើបញ្ហាលំហូរចរាចរណ៍ ការផ្តល់នូវរថយន្តក្រុង និងការផ្តល់ជាបង្គោលភ្លើងស្តុបថ្មីចំនួន១០០ ដើម្បីតម្លើងក្នុងរាជធានីភ្នំពេញ។ បញ្ហាការកកស្ទះសំរាមនិងបញ្ហាស្ទះលូជាដើម ប៉ុន្តែបញ្ហានេះយើងបានធ្វើការដោះស្រាយជាបណ្តើរៗហើយ ហើយជប៉ុនក៏បានជួយផងដែរដោយមកដល់ពេលនេះ ជប៉ុនតាមរយៈអង្គការចៃកា បាននិងកំពុងអនុវត្តគម្រោងការពារទឹកជំនន់ និងកែលម្អប្រព័ន្ធប្រឡាយលូជំហានទី៤។
លោកឃួង ស្រេង បានបញ្ជាក់ថា ចំពោះបញ្ហាសំរាមអនុវត្តតាមអនុសាសន៍ របស់សម្តេចតេជោហ៊ុន សែន នៅក្នុងឆ្នាំ២០២០ខាងមុខនេះ នឹងមានក្រុមហ៊ុនជាច្រើន ចូលរួមដេញថ្លៃលើសេវាប្រមូលសំរាមនេះ ហើយយើងនឹងជ្រើសរើសក្រុមហ៊ុនយ៉ាងតិច៣ក្រុមហ៊ុន ដើម្បីប្រកួតប្រជែងគ្នា ក្នុងការប្រមូលសំរាមនេះ។ លោកជឿងជាក់ថា នៅពេលមានការប្រកួតប្រជែងគ្នា ក្នុងការប្រមូលសំរាមបែបនេះនោះ នឹងធ្វើឲ្យការគ្រប់គ្រង និងការប្រមូលសំរាម នឹងកាន់តែល្អប្រសើរជាងមុន។
លោកមិកាមិ ម៉ាស្សាហិរូ បានមានប្រសាសន៍ថា គោលបំណងនៃជំនួបពិភាក្សាជួបសម្តែងការគួរសមនាពេលនេះ គឺដើម្បីស្វែងយល់អំពីការគ្រប់គ្រងសំណល់ នៅក្នុងរាជធានីភ្នំពេញ ការទាញយកថាមពលពីសំណល់ (Waste Energy) និងពិភាក្សាលើបញ្ហាលំហូរចរាចរណ៍ ក្នុងរាជធានីភ្នំពេញ។
ក្នុងឱកាសនោះដែរ លោកឯកអគ្គរដ្ឋទូត ក៏បានសម្តែងការកោតសរសើរយ៉ាងខ្លាំង ចំពោះការអភិវឌ្ឍន៍ខ្លួនបានយ៉ាងលឿន ក្នុងវិស័យសេដ្ឋកិច្ច ពាណិជ្ជកម្ម វិស័យសំណង់ ហេដ្ឋារចនាសម្ព័ន្ធ អគារខ្ពស់ៗ ក្នុងរាជធានីភ្នំពេញនាប៉ុន្មានឆ្នាំចុងក្រោយនេះ។
លោកបញ្ជាក់ថា ការគ្រប់គ្រងសំរាម ក្នុងរាជធានីភ្នំពេញជារឿងមួយ ដែលលោកបានចាប់អារម្មណ៍ខ្លាំង ដោយនៅពេលខាងមុខនេះ ជប៉ុននឹងជួយលើបញ្ហានេះ តាមរយៈជួយផ្សព្វផ្សាយនិងអប់រំប្រជាពលរដ្ឋ ឲ្យបានយល់ពីការទុកដាក់ និងផលប៉ះពាល់ពីបញ្ហាសំរាមនេះ។ ជាងនេះទៅទៀត លោកក៏នឹងជំរុញឱ្យមានអ្នកវិនិយោគជប៉ុន មកធ្វើការវិនិយោគលើបញ្ហាការគ្រប់គ្រង និងប្រមូលសំរាម ក្នុងរាជធានីភ្នំពេញ៕ដោយ៖កូឡាប