ខេត្តស្វាយរៀងៈ ទីប្រឹក្សា និងយុវជនកាកបាទក្រហមកម្ពុជា ចំនួន ២៨ នាក់ ប្រចាំវិទ្យាល័យ ហ៊ុន សែន ប្រសូតិ នៅព្រឹកថ្ងៃទី២១ ខែវិច្ឆិកា ឆ្នាំ២០១៩នេះ ត្រូវបានសាខាកាកបាទក្រហមកម្ពុជាខេត្តស្វាយរៀង ធ្វើការបណ្តុះបណ្តាលអំពីចំណេះដឹងជាមូលដ្ឋាននៃចលនាកាកបាទក្រហម អឌ្ឍចន្ទក្រហម គោលការណ៍គ្រឹះ ច្បាប់មនុស្សធម៌អន្តរជាតិ និងវិជ្ជាសង្គ្រោះបឋម ។
ដែលវគ្គបណ្តុះបណ្តាលនេះមានរយៈពេល ១ ថ្ងៃ ដោយមានការសម្របសម្រួលពីមន្ត្រីទទួលបន្ទុកយុវជន នៃសាខាកាកបាទក្រហមកម្ពុជាខេត្តស្វាយរៀង ក្នុងគោលបំណងផ្តល់នូវចំណេះដឹងជាមូលដ្ឋាន ដែលពាក់ព័ន្ធ ទៅនឹងប្រវត្តិរបស់ចលនា ,គោលការណ៍គ្រឹះទាំង ៧ និងវិជ្ជាសង្គ្រោះបឋមដល់ទីប្រឹក្សាយុវជន និងយុវជន កាកបាទក្រហមកម្ពុជា ដែលទើបបានង្កើតថ្មី ដើម្បីឲ្យពួកគាត់ទទួលបាននូវជំនាញ និងសមត្ថភាពគ្រប់គ្រាន់ ក្នុងការចូលរួមអនុវត្តការងារមនុស្សធម៌ នៅក្នុងមូលដ្ឋានរបស់ខ្លួន ។
ពិធីនេះបានការអញ្ជើញចូលរួមពី លោក សរ វណ្ណា នាយសាខា លោក ហាយ ចន្នាត់ ប្រធានគណៈកម្មាធិការអនុសាខាកាកបាទក្រហមកម្ពុជាស្រុកស្វាយទាប លោក ណំ សាវ៉ន នាយករងវិទ្យាល័យ ហ៊ុនសែន ប្រសូតិ ព្រមទាំងលោកគ្រូ អ្នកគ្រូ ប្អូនៗ យុវជនសរុបចំនួន ៣៤ នាក់ ។
លោកនាយករងសាលា បានថ្លែងអំណរគុណដល់សាខាកាកបាទក្រហមកម្ពុជាខេត្ត ដែលបាន រៀបចំមានវគ្គបណ្តុះបណ្តាលនេះឡើង ។ លោក ហាយ ចន្នាត់ ប្រធានគណៈកម្មាធិការ អនុសាខាស្រុក មានមតិផ្តាំផ្ញើដល់ក្មួយៗបន្ទាប់ពីបញ្ចប់វគ្គនេះ ទៅត្រូវយកចំណេះដឹងដែលទទួលបានទៅ ផ្សព្វផ្សាយបន្តដល់សហគមន៍ និងមិត្តភក្តិនៅសាលា ។
លោក សរ វណ្ណា នាយកសាខា បានមានប្រសាសន៍សំណេះសំណាល ក្នុងពិធីបើកវគ្គដោយបាននាំមកនូវ ការផ្តាំផ្ញើសាកសួរសុខទុក្ខពីសំណាក់លោក ម៉ែន វិបុល ប្រធានគណៈកម្មាធិការសាខា ចំពោះលោកគ្រូ អ្នកគ្រូ ប្អូនៗយុវជនទាំងអស់ដោយក្តីនឹករលឹក លោកនាយកសាខាបានបញ្ជាក់ ពីតួនាទីយុវជននៅគ្រប់សម័យកាល គ្រប់សង្គមយុវជនជាកម្លាំងដ៏មុតស្រួច ប្រកបដោយកម្លាំងកាយប្រាជ្ញាស្មារតីភ្លឺស្វាង និង មានទឹកចិត្តក្លាហានមោះមុតពុះពារគ្រប់ឧបសគ្គ ទុក្ខលំបាកដោយមិនរារែក ដែលលក្ខណៈពិសេសទាំងនេះ បានធ្វើឲ្យយុវជនក្លាយជាធនធានដ៏មានតម្លៃមិនអាចខ្វះបានឡើយ នៅក្នុងចលនាកាកបាទក្រហម និងអឌ្ឍចន្ទក្រហម សម្រាប់បំពេញបេសកកម្មយ៉ាងសកម្មនៅពាសពេញពិភពលោក ក្នុងបុព្វហេតុមនុស្សធម៌ និងរក្សាបានស្ថេរភាពនៃការងារ ។ ជាក់ស្តែងរហូតមកដល់បច្ចុប្បន្ននេះ នៅទូទាំងខេត្តមានចលនាយុវជន និងបានកំពុងរួមគ្នាធ្វើសកម្មភាព ដើម្បីដោះស្រាយបញ្ហាប្រឈមធំៗ ដែលពាក់ព័ន្ធ និង សុវត្ថិភាពចរាចរណ៍ ការអត់ឃ្លាន អំពើហឹង្សា ជំងឺឆ្លង ភាពក្រីក្រ ក្មេងកំព្រា ការសង្គ្រោះបឋម អនាម័យ បរិស្ថាន ។ល។
លោកបានបន្តថាៈ នៅក្នុងស្មារតីនេះ សង្ឃមជឿជាក់ថា យុវជនកាកបាទក្រហមកម្ពុជា ទាំងអស់ដែលស្ថិតក្នុងជួរសិស្សានុសិស្ស នៅក្នុងកម្រិតមធ្យមសិក្សា និងបន្តនូវការខិតខំប្រឹងប្រែង យកចិត្តទុកដាក់ចូលរួម ដោះស្រាយបញ្ហាទាំងអស់នេះ ឲ្យអស់ពីកម្លាំងកាយចិត្ត ព្រមទាំងធានាបាននូវសាមគ្គីភាពផ្ទៃក្នុង យ៉ាងរឹងមាំ ដើម្បីសម្រាលទុក្ខលំបាកនានា ដែលកើតមានឡើង ដោយសារគ្រោះមហន្តរាយ ការជួយសង្គ្រោះជីវិតមនុស្ស និងឈានទៅរកការបញ្ឈប់ការរើសអើងគ្រប់ប្រភេទ លុបបំបាត់គ្រឿងញៀន និងល្បែងពាលា ដែលបង្កគ្រោះថ្នាក់ធ្ងន់ធ្ងរដល់យុវជន និងសង្គមជាតិ បន្តរក្សាបាននូវស្ថេរភាពនៃកិច្ចអភិវឌ្ឍន៍បរិស្ថានសន្តិភាព និងបន្តពង្រឹងពង្រីកកម្លាំងយុវជន ឲ្យស្ថិតនៅជាកម្លាំងស្នូល សម្រាប់ការងារជួយសង្គ្រោះនានា រួមចំណែកដល់ការលើកកម្ពស់វឌ្ឍនភាព និងសេចក្តីថ្លៃថ្នូររបស់មនុស្សជាតិ ៕ដោយ៖ វ៉ៃកូ
