ភ្នំពេញ៖មន្ត្រីនគរបាលស្នងការរាជធានីភ្នំពេញបាននាំខ្លួននគរបាលឈ្មោះ សៅ បញ្ញា ជាអ្នកប្រើហិង្សាធាក់ទៅលើជនរងគ្រោះឈ្មោះអឿ ចំណានបានមកដល់សាលាដំបូងរាជធានីភ្នំពេញ ដើម្បីសាកសួរនៅរសៀលថ្ងៃទី១០មករានេះ បន្ទាប់ពីបានប្រព្រឹត្តបទល្មើសកាលពីថ្ងៃទី៩ ខែមករា ឆ្នាំ២០១៨ នៅចំណុចស្តុកត្រឡូកបែកក្នុងខណ្ឌសែនសុខ។
ជនសង្ស័យ ឈ្មោះ សៅ បញ្ញា អាយុ៣៣ឆ្នាំ មានតួនាទីជាអនុប្រធានការិយាល័យនៃនាយកដ្ឋានប្រឆាំងបទល្មើសបច្ចេកវិទ្យា ក្រសួងមហាផ្ទៃ លើកជើងធាក់មន្ដ្រីចរាចរណ៍ទាំងគ្នាលុតជង្គង់លើកដៃគោរព។
ពេលនាំខ្លួនឡើងតុលាការនគរបាលជាប់សង្ស័យត្រូវបានដាក់ខ្នោះដៃ ។ នគរបាលសង្ស័យរូបនេះ បានបើករថយន្ដម៉ាក Ford ពាក់ស្លាក លេខភ្នំពេញ 2AC-9099 ដោយបំពានច្បាប់ចរាចរណ៍ផ្លូវគោក ហើយត្រូវបានក្រុមមន្ដ្រីជាប់កិច្ចសន្យានោះឃាត់ដើម្បីសួរនាំ។ លោកប៉ូលីស សៅ បញ្ញា បានខឹង ហើយ ចុះពីលើរថយន្ដ ទាញកអាវអូស ថែមទាំងធាក់ចំដើមទ្រូងមួយជើង ផ្ងាទៅក្រោយ។
ការឃាត់ខ្លួនជនសង្ស័យនេះក្រោយបែបធ្លាយវីដេអូ ករណីខាងលើ នាយឧត្តមសេនីយ៍ ជួន សុវណ្ណ បានចេញបញ្ជាអោយចាប់ខ្លួន និងបញ្ជូនជនសង្ស័យខាងលើ ទៅកាន់តុលាការ៕ ដោយ៖បញ្ញាស័ក្តិ
