ប្រទេសវៀតណាម ប្រហែលជាមិនអាចបំពេញតម្រូវការសាច់ជ្រូកចំនួន ២០០.០០០តោនបានទេ សម្រាប់ត្រីមាសទី ៤ក្នុងឆ្នាំនេះ ដោយសារតែជំងឺគ្រុនផ្តាសាយជ្រូក។ នេះបើតាមការបញ្ជាក់របស់ក្រសួងកសិកម្ម និងអភិវឌ្ឍន៍ជនបទរបស់ប្រទេសនេះ។
ចាប់តាំងពីពាក់កណ្តាលខែវិច្ឆិកាមក ក្រសួងកសិក្មម្មបានដឹកនាំឲ្យមានការសម្លាប់ជ្រូកជិត ៥,៩លានក្បាល ដែលអាចផលិតសាច់ជ្រូកបាន ៣៣៧.០០០តោន ដែលចំនួននេះស្មើនឹង ៨,៨ភាគរយនៃចំនួនជ្រូកទូទាំងប្រទេស។
បើតាមសេចក្តីរាយការណ៍បានឲ្យដឹងថា តម្លៃជ្រូករស់ក្នុងប្រទេសវៀតណាម បានហក់ឡើងពី ២,៦ ទៅ ២,៩ដុល្លារក្នុងមួយគីឡូក្រាម និងមានតម្លៃចន្លោះពី ៣,៣ដុល្លាទៅ ៣,៥ដុល្លារក្នុងមួយគីឡូក្នុងតំបន់មួយចំនួន។
នៅក្នុងកិច្ចប្រជុំស្តីអំពីស្ថេរភាពតម្លៃ និងការកើនឡើងតម្លៃសាច់ជ្រូកនៅថ្ងៃចន្ទកន្លងទៅនេះ អនុនាយករដ្ឋមន្រ្តី លោក Vuong Dinh Hue បានជំរុញឲ្យភាគីពាក់ព័ន្ធទាំងអស់ឲ្យធ្វើការគណនាឲ្យច្បាស់លាស់ ពីការផ្គត់ផ្គងមិនគ្រប់តម្រូវការ ដើម្បីពិចារណាក្នុងការនាំចូលសាច់ជ្រូក ដើម្បីឲ្យសមតាមតម្រូវការក្នុងស្រុក និងគ្រប់គ្រងការឡើងថ្លៃនៃសាច់ជ្រូក និងអតិផរណា៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua