ភ្នំពេញ៖ លោកម៊ុត ចន្ថា ជាមន្រ្តីរបស់លោកកឹម សុខា បានសរសេរសារលើហ្វេសប៊ុក នៅថ្ងៃទី២២ ខែវិច្ឆិកានេះថា នៅពេលខ្ញុំបានចាប់ផ្តើមចូលរួមជីវភាពនយោបាយ ជាមួយលោកប្រធាន កឹម សុខា ខ្ញុំបានចាំយ៉ាងច្បាស់នូវពាក្យសំដី ដែលជាការប្តេជ្ញាចិត្តដោយស្មោះត្រង់ របស់លោកចំពោះជាតិមាតុភូមិ។
លោកបានលើកឡើងថាៈ “ខ្ញុំនឹងមិនធ្វើអ្វីបង្កឲ្យមានចលាចល និងភាពវឹកវរដល់ជាតិរបស់ខ្ញុំ ដែលខ្លួនខ្ញុំ រស់នៅក្រោមដំបូលដែរនោះទេ។ ខ្ញុំមិនដែលនឹកចង់ ឬពុំដែលមានបំណងចាកចេញ ពីប្រទេសកំណើតរបស់ខ្ញុំម្តងណាឡើយ ព្រោះខ្ញុំបានជ្រើសរើសយកប្រទេសរបស់ខ្ញុំ ជាដំបូលតែមួយដែលខ្ញុំត្រូវរស់នៅ និងជាមូលដ្ឋាននៃជីវភាពនយោបាយរបស់ខ្ញុំ”។
លោកបានបញ្ជាក់ថា “ខ្ញុំពិតជារំភើបបំផុត នៅពេលខ្ញុំបានស្តាប់ឮនូវពាក្យប្តេជ្ញាចិត្តរបស់លោកចំពោះជាតិមាតុភូមិ។ ខណៈដែលខ្ញុំបន្តដំណើរលើផ្លូវនយោបាយជាមួយលោក ខ្ញុំយល់កាន់តែច្បាស់អំពីការប្តេជ្ញាចិត្តដោយស្មោះត្រង់របស់លោកចំពោះជាតិ និងប្រជាពលរដ្ឋ ពុំមានអ្វីផ្លាស់ប្តូរឡើយ ព្រោះលោកបានកំណត់និងដាក់ចេញនូវគោលការណ៍ ជាក់លាក់របស់លោក គឺ “អហិង្សា សន្តិវិធី មិនគុំកួនសងសឹក មិនយកខ្មែរណាមួយជាសត្រូវ មិនរើសអើងជាតិសាសន៍ ហើយនិងមិនបង្កឲ្យអ្នកដទៃឈឺចាប់”។
លោកបន្តថា “អ្វីដែលធ្វើឲ្យខ្ញុំកោតសរសើរបំផុតនោះ គឺលោកមិនបានចាកចេញពីមាតុប្រទេសកំណើត បើទោះបីលោកយល់និងដឹងថា មានព្យុះសង្ឃរាអាចនឹងត្រូវបោកបក់ មកលើរូបលោកយ៉ាងណាក៏ដោយ។ លោកប្រាថ្នាចង់ឃើញពលរដ្ឋខ្មែររស់នៅដោយជីវភាពសមរម្យ និងថ្លៃថ្នូរ និងមានសិទ្ធិសេរីភាពពេញលេញ។ ក្នុងន័យនេះស្មារតីនៃការផ្សះផ្សាជាតិពិត គឺជាផ្លូវដ៏ត្រឹមត្រូវបំផុត៕ដោយ៖កូឡាប