ភ្នំពេញ៖ នាយកគ្រប់គ្រងប្រចាំតំបន់អាស៊ីអាគ្នេយ៍ នៃវិទ្យុអាស៊ីសេរី បានស្នើសុំរដ្ឋមន្ត្រីក្រសួងព័ត៌មាន ជួយឲ្យមានការទម្លាក់បទចោទ ប្រឆាំងអតីតអ្នកយកព័ត៌មានវិទ្យុអាស៊ីសេរី ពីររូប គឺលោក អ៊ួន ឈិន និង លោក យាង សុធារិន្ទ ដើម្បីអាចជួយដល់អ្នកសារព័ត៌មានទាំងឡាយ រួមទាំងអ្នកយកព័ត៌មានអាស៊ីសេរីនាថ្ងៃអនាគត។
បើតាមការប្រកាសរបស់ស្ថានទូតសហរដ្ឋអាមេរិកប្រចាំកម្ពុជា បានផ្សាយព័ត៌មានលើហ្វេសប៊ុកផ្លូវការថា កាលពីព្រឹកមិញ (២២វិច្ឆិកា) មន្ត្រីស្ថានទូតអាមេរិក បានជួយសម្រួលឲ្យមានកិច្ចប្រជុំមួយរវាង លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និង លោក Mat Pennington នាយកគ្រប់គ្រងប្រចាំតំបន់អាស៊ីអាគ្នេយ៍ នៃវិទ្យុអាស៊ីសេរី ដើម្បីពិភាក្សាពីការត្រឡប់មកវិញនាអនាគត របស់វិទ្យុអាស៊ីសេរី នៅប្រទេសកម្ពុជា ។
លោក Pennington បានតស៊ូមតិផងដែរ ដើម្បីឲ្យមានការទម្លាក់បទចោទ ប្រឆាំងអតីតអ្នកយកព័ត៌មានវិទ្យុអាស៊ីសេរី ពីររូប គឺលោក អ៊ួន ឈិន និង លោក យាង សុធារិន្ទ ដោយជម្រាបថា ប្រការនេះ អាចជួយដល់អ្នកសារព័ត៌មានទាំងឡាយ រួមទាំងអ្នកយកព័ត៌មានអាស៊ីសេរីនាថ្ងៃអនាគត ឲ្យមានទំនុកចិត្តថាពួកគេត្រូវធ្វើការងាររបស់គេ ដោយមានសុវត្ថិភាព និងស្ថិតក្នុងបរិយាកាសអំណោយផល ដល់សេរីភាពសារព័ត៌មាន និងនីតិរដ្ឋ ។
ស្ថានទូតអាមេរិក រង់ចាំមើលនូវវឌ្ឍនភាពបន្ថែមទៀត លើសេរីភាពសារព័ត៌មាន ក្នុងប្រទេសកម្ពុជា ។
បើតាមការផ្សាយព័ត៌មានរបស់អង្គការលីកាដូ ថា នាព្រឹកថ្ងៃទី៣ ខែតុលា ឆ្នាំ២០១៩ សាលាដំបូងរាជធានីភ្នំពេញជាថ្មីម្ដងទៀត មិនទាន់បានសម្រេចពីការផ្ដន្ទាទោសករណីអតីតអ្នកសារព័ត៌មានវិទ្យុអាស៊ីសេរី លោក អ៊ួន ឈិន និងលោក យាង សុធារិន ដែលប្រឈមមុខនឹងការចោទប្រកាន់ ពាក់ព័ន្ធនឹងការផ្ដល់ព័ត៌មានឱ្យរដ្ឋបរទេសដែលអាចធ្វើឱ្យអន្តរាយការការពារជាតិនៅឡើយទេ។ ចៅក្រមជំនុំជម្រះបានចាត់តាំងចៅក្រមថ្មី ដើម្បីស៊ើបអង្កេតបន្ថែមទៀតលើករណីនេះ ដែលធ្វើឡើងបន្ទាប់ពីសវនាការមួយ ដោយមិនបានបង្ហាញពីភស្ដុតាងគួរឱ្យទុកចិត្តណាមួយ ក្នុងការដាក់បន្ទុកលើបទចោទទាំងនេះ។
អង្គការលីកាដូ សំណូមពរដោយទទូចឱ្យអាជ្ញាធរមេត្តា ទម្លាក់ចោលបទចោទទាំងអស់ប្រឆាំងនឹងអតីតអ្នកសារព័ត៌មានទាំងពីរនាក់។
ចៅក្រមសាលាដំបូងរាជធានីភ្នំពេញ បានប្រកាសសាលក្រមចាត់របៀបនាព្រឹកនេះថា តុលាការមិនទាន់បានសម្រេចពីការផ្ដន្ទាទោស ករណីអតីតអ្នកសារព័ត៌មានទាំងពីរនាក់ទេ ប៉ុន្តែត្រូវធ្វើការស៊ើបអង្កេតបន្ថែមទៀតទៅលើអង្គហេតុមួយចំនួនដូចជា ការធ្វើកោសល្យវិច័យចំពោះការវិភាគលើឧបករណ៍ផ្ទុកឯកសារ (hard drives) ដែលតុលាការបានរក្សាទុក អស់រយៈពេលជាង១៨ខែមកហើយនោះ។ ពេលវេលាជាក់លាក់នៃការស៊ើបអង្កេតបន្ថែមនេះ មិនទាន់ត្រូវបានកំណត់ទេ។ ការបន្តដំណើរការផ្លូវច្បាប់នេះបង្ហាញថា អតីតអ្នកសារព័ត៌មានទាំងពីររូប ត្រូវបន្តប្រឈមនឹងបទចោទដែលមិនបានលើកយកភស្ដុតាងជាក់លាក់គួរឱ្យជឿទុកចិត្តណាមួយមកបង្ហាញ។
លោក អ៊ួន ឈិន និងលោក យាង សុធារិន ត្រូវបានចោទប្រកាន់តាមមាត្រា៤៤៥ នៃក្រមព្រហ្មទណ្ឌ ចំពោះសកម្មភាពដែលអាច “ធ្វើឱ្យអន្តរាយការការពារជាតិ” និងមាត្រា៣៨ និងមាត្រា៣៩ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។ អ្នកទាំងពីរត្រូវបានចាប់ខ្លួនកាលពីថ្ងៃទី១៤ ខែវិច្ឆិកា ឆ្នាំ២០១៧ និងត្រូវបានឃុំខ្លួនបណ្ដោះអាសន្ន រង់ចាំសវនាការជាង៩ខែ មុនពេលដោះលែងឱ្យនៅក្រៅឃុំវិញ។ អ្នកទាំងពីរបានបម្រើការនៅវិទ្យុអាស៊ីសេរី មុនពេលដែលវិទ្យុនេះសម្រេចបិទការិយាល័យនៅរាជធានីភ្នំពេញ បន្ទាប់ពីបានអះអាងថា រងការគាបសង្កត់ពីសំណាក់អាជ្ញាធររដ្ឋ ដែលបានបិទការផ្សាយព័ត៌មាននៅតាមស្ថានីយវិទ្យុនានា ក្នុងនោះមានការផ្សាយបន្តផ្ទាល់របស់វិទ្យុអាស៊ីសេរីនៅតាមវិទ្យុមួយចំនួនផងដែរ។
អ្នកទាំងពីរបានបដិសេធការចោទប្រកាន់ទាំងនេះ ពីសំណាក់អាជ្ញាធរ ខណៈដែលស្ថាប័នធ្វើការលើបញ្ហាសិទ្ធិមនុស្សទាំងក្នុងស្រុកនិងក្រៅស្រុក និងស្ថាប័នធ្វើការលើសេរីភាពសារព័ត៌មាន បានអំពាវនាវម្ដងហើយម្ដងទៀត សូមឱ្យទម្លាក់ចោលបទចោទទាំងអស់ ប្រឆាំងនឹងអ្នកសារព័ត៌មានទាំងពីរនាក់នេះ៕ដោយ៖កូឡាប
