ភ្នំពេញ៖ បច្ចុប្បន្ន បើនិយាយ ពីទំនាក់ទំនងក្នុងវិស័យសេដ្ឋកិច្ច និងហិរញ្ញវត្ថុជាមួយកម្ពុជា ប្រទេសចិនឈរនៅលំដាប់ទី ១ លើវិស័យជាច្រើន ដូចជា ការវិនិយោគ ទំហំពាណិជ្ជកម្មទ្វេភាគី និងទេសចរណ៍ជាដើម ហើយក៏មានក្រុមហ៊ុនចិនជាច្រើនទៀត ក៏មានចំណាប់អារម្មណ៍មក វិនិយោគនៅកម្ពុជា។
ក្រសួងសេដ្ឋកិច្ច និង ហិរញ្ញវត្ថុ នៅថ្ងៃទី២៥ខែវិច្ឆិកានេះ បានចេញសេចក្តីប្រកាសព័ត៌មាន ស្តីពីកិច្ចពិភាក្សាការងារ រវាងលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ជាមួយលោក Lyu Xinhua ប្រធានក្រុមប្រឹក្សាជំរុញកិច្ចសហប្រតិបត្តិការត្បូង-ត្បូង នៃសាធារណរដ្ឋប្រជាមានិតចិន នារសៀលថ្ងៃទី ២២ ខែ វិច្ឆិកា ឆ្នាំ ២០១៩។
ក្រសួងសេដ្ឋកិច្ច បានបញ្ជាក់ថា នៅក្នុងឱកាសជំនួបពិភាក្សានោះ លោកអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន បានសម្តែងនូវការស្វាគមន៍យ៉ាងកក់ក្តៅ និងថ្លែងអំណរគុណយ៉ាងជ្រាលជ្រៅ ជូនចំពោះលោក Lyu Xinhua ប្រធានក្រុមប្រឹក្សាជំរុញកិច្ចសហប្រតិបត្តិការត្បូង-ត្បូងនៃសាធារណរដ្ឋប្រជាមានិតចិន និងប្រតិភូអមដំណើរ ដែលបានឆ្លៀតពេលដ៏មានតម្លៃអញ្ជើញមកបំពេញទស្សនកិច្ចនៅកម្ពុជា។ ទស្សនកិច្ចជាបន្តបន្ទាប់របស់គណៈប្រតិភូជាន់ខ្ពស់ចិននៅកម្ពុជា បានបង្ហាញឲ្យឃើញពីវឌ្ឍនភាពគួរឲ្យកត់សម្គាល់ នៃចំណងមិត្តភាព និងកិច្ចសហប្រតិបត្តិការ រវាងប្រទេសយើងទាំងពីរ ដែលពីមួយថ្ងៃទៅមួយថ្ងៃត្រូវបានពង្រឹង និងពង្រីកឥតឈប់ឈរ។ បច្ចុប្បន្ន បើនិយាយពីទំនាក់ទំនងក្នុងវិស័យសេដ្ឋកិច្ច និងហិរញ្ញវត្ថុជាមួយកម្ពុជា ប្រទេសចិនឈរនៅលំដាប់ទី ១ លើវិស័យជាច្រើន ដូចជា ការវិនិយោគ ទំហំពាណិជ្ជកម្មទ្វេភាគី និងទេសចរណ៍ជាដើម។ ទន្ទឹមនេះទំហំហិរញ្ញប្បទាន សហប្រតិបត្តិការ ពីរដ្ឋាភិបាល នៃសាធារណរដ្ឋប្រជាមានិតចិន ជូនរាជរដ្ឋាភិបាលកម្ពុជាទាំងឥណទានសម្បទាន និងហិរញ្ញប្បទានឥតសំណង ក៏ឈរនៅលំដាប់ទី ១ ផងដែរ។
លោក Lyu Xinhua បានជម្រាបលោកអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន ថា
ក្រុមប្រឹក្សាជំរុញកិច្ចសហប្រតិបត្តិការត្បូង-ត្បូង នៃសាធារណរដ្ឋប្រជាមានិតចិន ត្រូវបានបង្កើតឡើងកាលពីឆ្នាំ ២០១៤ និងជាស្ថាប័នមួយដែលបំពេញបេសកកម្ម តាមការតម្រង់ទិសរបស់ក្រសួងការបរទេសចិន។ ក្រុមប្រឹក្សានេះ គឺជាស្ថានតភ្ជាប់រវាងក្រុមហ៊ុន និង ស្ថាប័ន នៃប្រទេសចិន ជាមួយក្រុមហ៊ុន និងស្ថាប័ន នៃប្រទេសកំពុងអភិវឌ្ឍន៍ ដោយមានមុខងារជំរុញកិច្ចសហប្រតិបត្តិការរវាងប្រទេសចិន និងប្រទេសកំពុងអភិវឌ្ឍន៍ក្នុងវិស័យជាច្រើន មានដូចជា៖ វិស័នយោបាយ សេដ្ឋកិច្ចពាណិជ្ជកម្ម វប្បធម៌ អប់រំ វិទ្យាសាស្រ្ត បច្ចេកវិទ្យា ជាដើម។ ខណៈដែលកម្ពុជាគឺជាមិត្តដ៏ជិតស្និទ្ធបំផុតមួយ របស់ប្រទេសចិននិងប្រទេសយើងទាំងពីរ មានទំនាក់ទំនងល្អជាប្រពៃណី ជាពិសេស ទំនាក់ទំនងដ៏វិសេសវិសាលរវាង សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាមួយលោក Xi Jinping ប្រធានាធិបតី នៃសាធារណរដ្ឋប្រជាមានិតចិន រដ្ឋាភិបាលចិនគាំទ្រយ៉ាងពេញទំហឹង និងជំរុញក្រុមហ៊ុនចិន ឲ្យមកវិនិយោគនៅកម្ពុជាកាន់តែច្រើនឡើងថែមទៀត។
លោក Lyu Xinhua បានសង្កេតឃើញថា មានក្រុមហ៊ុនចិនរាប់ពាន់បានមកដាក់ទុនវិនិយោគនៅកម្ពុជា ដែល
មានតម្រោងវិនិយោគគ្រប ដណ្តប់ស្ទើរតែលើគ្រប់វិស័យ។ មានក្រុមហ៊ុនចិនជាច្រើនទៀត ក៏មានចំណាប់អារម្មណ៍មក
វិនិយោគនៅកម្ពុជាដែរ។ ជាមួយគ្នានេះ លោក Lyu Xinhua យល់ឃើញថា ការវិនិយោគលើធនធានមនុស្សដើរតួនាទី
យ៉ាងសំខាន់ និងជាកត្តាគន្លឹះមួយរួមចំណែកក្នុងការជួយទ្រទ្រង់ និងជំរុញកំណើនសេដ្ឋកិច្ចប្រកបដោយចីរភាព។ ក្នុងន័យនេះ ក្រុមប្រឹក្សាជំរុញកិច្ចសហប្រតិបត្តិការត្បូង-ត្បូង នៃសាធារណរដ្ឋប្រជាមានិតចិន ក៏លើកទឹកចិត្តឲ្យក្រុមហ៊ុនចិនវិនិយោគផងដែរ លើតម្រោងបង្កើតសាលារៀនអន្តរជាតិនៅកម្ពុជា ដើម្បីជួយបណ្តុះបណ្តាលកុមារ និងយុវជននៅកម្ពុជា។
ជាការឆ្លើយតប លោកអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន បានគូសបញ្ជាក់ថា កម្ពុជា និងចិន
គឺជាដៃគូយុទ្ធសាស្ត្រគ្រប់ជ្រុងជ្រោយ និងជាដៃគូកសាងសហគមន៍ជោគវាសនាតែមួយ។ កម្រិតនៃកិច្ចសហប្រតិបត្តិការរវាងប្រទេសយើងទាំងពីរ នាពេលបច្ចុប្បន្ន បានឈានដល់កម្រិតកំពូលដែលមិនធ្លាប់មានពីមុនមក។ ចំពោះការវិនិយោគផ្ទាល់ពីបរទេស កន្លងមកក្នុងមួយឆ្នាំៗ មានក្រុមហ៊ុនចិនរាប់រយបានចុះបញ្ជីវិនិយោគនៅកម្ពុជា ដែលមានដើមទុនវិនិយោគរាប់ពាន់លានដុល្លារអាមេរិក ។ រាជរដ្ឋាភិបាលកម្ពុជាសូមស្វាគន៍ គម្រោងវិនិយោគថ្មីបន្ថែមទៀតពីប្រទេសចិន ខណៈដែលកម្ពុជានៅមានសក្តានុពល និងកាលានុវត្តភាពជាច្រើនទៀត ក្នុងការវិនិយោគ។ ដើម្បីទាក់ទាញ និងជំរុញការវិនិយោគ រាជរដ្ឋាភិបាលកម្ពុជាបាននិងកំពុងខិតខំធ្វើកំណែទម្រង់លើគ្រប់វិស័យ ទាំងក្នុងក្របខ័ណ្ឌគោលនយោបាយ គតិយុត្ត និង បច្ចេកទេស ។
ទន្ទឹមនេះ ក្រសួង-ស្ថាប័នពាក់ព័ន្ធនៃរាជរដ្ឋាភិបាលកម្ពុជា ក៏បានត្រៀមខ្លួនជាស្រេចដើម្បី សហការជាមួយភាគីចិន។ នាពេលឆាប់ៗខាងមុខនេះ ភាគីទាំងពីរនឹងរួមគ្នារៀបចំវេទិកាសេដ្ឋកិច្ច និងពាណិជ្ជកម្មកម្ពុជា ចិន និងបង្កើតយន្តការសម្របសម្រួលមួយដើម្បីជំរុញ និងទាក់ទាញការវិនិយោគ។
ឆ្លៀតក្នុងឱកាសនោះ លោកអគ្គបណ្ឌិតសភាចារ្យ ឧបនាយករដ្ឋមន្ត្រី អូន ព័ន្ធមុនីរ័ត្ន បានសម្តែងនូវអំណរគុណ
យ៉ាងជ្រាលជ្រៅជូនចំពោះរដ្ឋាភិបាល និងប្រជាជនចិន ដែលបានជួយឧបត្ថម្ភគាំទ្រដល់រាជរដ្ឋាភិបាល និងប្រជាជនកម្ពុជា។
គម្រោងវិនិយោគពីប្រទេសចិន បានរួមវិភាគទានយ៉ាងធំធេង ដល់ការអភិវឌ្ឍនៅកម្ពុជា និងរួមចំណែកជួយឲ្យកម្ពុជាសម្រេចបាននូវកំណើនសេដ្ឋកិច្ចខ្ពស់ និងប្រកបដោយចីរភាព ព្រមទាំងបានបង្កើតការងារ និងផ្តល់ប្រភពចំណូលសម្រាប់ទ្រទ្រង់ជីវភាពរបស់ប្រជាជនកម្ពុជា៕ដោយ៖កូឡាប
