ខេត្តស្វាយរៀង ៖ លោក ម៉ែន វិបុល អភិបាល នៃគណៈអភិបាលខេត្តស្វាយរៀងនៅព្រឹកថ្ងៃទី២៥ ខែវិច្ឆិកា ឆ្នាំ២០១៩នេះ បានអញ្ជើញជាអធិបតីនៅក្នុងកិច្ចប្រជុំបូកសរុបលទ្ធផលការងារប្រចាំខែវិច្ឆិកា និងលើកទិសដៅការងារខែធ្នូ ឆ្នាំ២០១៩ របស់រដ្ឋបាលខេត្ត ដែលបានប្រព្រឹត្តទៅនៅសាលប្រជុំនន្ទី អគារ ខ សាលាខេត្តស្វាយរៀង។
ពិធីនេះក៏មានការអញ្ជើញចូលរួមពីសំណាក់អស់លោក លោកស្រីជាអភិបាលរងខេត្ត លោក លោកស្រី នាយក នាយករងរដ្ឋបាលសាលាខេត្ត លោកប្រធានសាលាដំបូងខេត្ត លោកព្រះរាជអាជ្ញារងសាលាដំបូងខេត្ត ឯកឧត្ដមសាកលវិទ្យាធិការសាកលវិទ្យាល័យស្វាយរៀង លោកស្នងការនគរបាលខេត្ត លោកមេបញ្ជាការរងតំបន់ប្រតិបត្តិសឹករងស្វាយរៀង លោកមេបញ្ជាការរងកងរាជអាវុធហត្ថខេត្ត លោកអនុប្រធានពន្ធធនាគារខេត្ត លោក លោកស្រីប្រធានមន្ទីរ-អង្គភាពនានាជុំវិញខេត្ត លោកអភិបាលក្រុង ស្រុក លោក លោកស្រីនាយកទីចាត់ការ/ប្រធានអង្គភាពចំណុះសាលាខេត្ត ប្រធានច្រកទ្វារព្រំដែន និងមន្ត្រីពាក់ព័ន្ធជាច្រើនរូបទៀត ។
លោកអភិបាលខេត្ត បានថ្លែងអំណរគុណ និងកោតសរសើរចំពោះ លោក លោកស្រីថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធក្នុងខេត្តស្វាយរៀងទាំងអស់ ដែលបានសហការអនុវត្តតួនាទី ភារកិច្ចរបស់ខ្លួន ក្នុងការផ្តល់សេវាសាធារណៈ ការដាក់វេនប្រចាំការ និងការចូលរួមសហការទប់ស្កាត់បដិវត្តពណ៌ ដែលដឹកនាំដោយជនក្បត់ជាតិ សម រង្ស៊ី ប៉ុនប៉ងផ្តួលរំលំរាជរដ្ឋាភិបាលស្របច្បាប់កាលពីថ្ងៃទី៩ ខែវិច្ឋិកា ឆ្នាំ២០១៩កន្លងទៅ ដែលធានាបាននូវ សន្ដិសុខ សុវត្ថិភាព ជូនដល់បងប្អូនប្រជាពលរដ្ឋបានល្អប្រសើរ ។
លោកអភិបាលខេត្ត ក៏បានផ្ដាំផ្ញើដល់ មន្ទីរ-អង្គភាព រដ្ឋបាលក្រុង ស្រុក កងកម្លាំងប្រដាប់អាវុធ និងអ្នកពាក់ព័ន្ធទាំងអស់ត្រូវបន្តយកចិត្តទុកដាក់អនុវត្តកិច្ចការសំខាន់ៗ មួយចំនួនដូចខាងក្រោម ៖
១.ត្រូវបន្តយកចិត្តទុកដាក់ថែរក្សាសន្តិសុខ សណ្តាប់ធ្នាប់សង្គម នៅក្នុងខេត្តឲ្យបានល្អប្រសើរ ។
២.ត្រូវផ្សព្វផ្សាយដល់អាជ្ញាធរមូលដ្ឋាន និងប្រជាពលរដ្ឋ ដើម្បីត្រៀមលក្ខណៈក្នុងការថែរក្សាទឹកទុកក្នុងកំឡុងពេលដែលភាពរាំងស្ងួត ដែលនឹងចូលមកដល់នារដូវប្រាំងខាងមុខនេះ។
៣- អាជ្ញាធរពាក់ព័ន្ធគ្រប់លំដាប់ថ្នាក់ត្រូវជំរុញការដោះស្រាយទំនាស់នៅតាមមូលដ្ឋានរបស់ខ្លួន ឲ្យបានទាន់ពេលវេលា ស្របតាមសំណូមពរ និងពាក្យបណ្តឹងរបស់បងប្អូនប្រជាពលរដ្ឋ។
៤.រដ្ឋបាលក្រុង-ស្រុក អង្គភាពពាក់ព័ន្ធត្រូវពង្រឹងការគ្រប់គ្រង ថែរក្សាការពារដីរដ្ឋឱ្យបានល្អ ។
៥. ត្រូវពិនិត្យទប់ស្កាត់ឲ្យបាននូវការសាង សង់សំណង់ ឫតូបលក់ដូរណាដែលរំលោភមកលើដីចំណីផ្លូវសាធារណៈឲ្យមានប្រសិទ្ធភាព។
៦.មន្ទីរកសិកម្ម រុក្ខាប្រមាញ់ និងនេសាទ ត្រូវពិនិត្យតាមដានការងារបង្ករបង្កើនផល និងការប្រមូលផលស្រូវរបស់ប្រជាពលរដ្ឋឲ្យបានទាន់ពេលវេលា ព្រមទាំងត្រូវសហការជាមួយអាជ្ញាធរដែនដី សមត្ថកិច្ចនៅតាមបណ្ដាច្រកទ្វារព្រំដែនធ្វើការសម្របសម្រួល និងបង្កលក្ខណៈងាយស្រួលដល់ការដឹកជញ្ជូនផលស្រូវឆ្លងកាត់ទៅលក់នៅប្រទេសជិតខាង ៕ វ៉ៃកូ
