ភ្នំពេញ៖ បន្ទាប់ពីមានករណីលើកឡើងពីសំណាក់មតិមួយចំនួន ចំពោះគម្រោងស្ថាបនាកំណាត់ផ្លូវជាតិលេខ៥ ភាគខាងត្បូង ចាប់ពីព្រែកក្តាម (ខេត្តកណ្តាល) ទៅដល់ធ្លាម្អម (ខេត្តពោធិ៍សាត់) បានផ្អាកដំណើរការ ការអនុវត្តការងាររបស់ខ្លួន នោះ ក្រសួងសាធារណការ បានចេញឆ្លើយបំភ្លឺជូនដល់សាធារណជនឲ្យបានជ្រាប់ថា គម្រោងស្ថាបនាផ្លូវជាតិលេខ៥ (ព្រែកក្តាម-ធ្លាម្អម) នៅដំណើរការធម្មតាស្របតាមផែនការដែលបានគ្រោងទុក។
បើតាមទំព័រហ្វេសប៊ុករបស់ក្រសួងសាធារណការនិងដឹកជញ្ជូន កាលពីថ្ងៃទី២៥ខែវិច្ឆិកា បានឲ្យដឹងថា ក្រសួងសូមធ្វើការឆ្លើយបំភ្លឺករណី ការលើកឡើងពីសំណាក់មតិមួយចំនួន ចំពោះគម្រោងស្ថាបនាកំណាត់ផ្លូវជាតិលេខ៥ ភាគខាងត្បូង ចាប់ពីព្រែកក្តាម (ខេត្តកណ្តាល) ទៅដល់ធ្លាម្អម (ខេត្តពោធិ៍សាត់) បានផ្អាកដំណើរការ ការអនុវត្តការងាររបស់ខ្លួន។
បច្ចុប្បន្ន ក្រុមការងារបានយកចិត្តទុកដាក់ខ្ពស់ និងខិតខំប្រឹងប្រែង ធ្វើការងារដោយមិនគិតថ្ងៃឈប់សម្រាក ក្នុងការស្ថាបនាផ្លូវជាតិលេខ៥ ភាគខាងត្បូងនេះ។ លើសពីនេះទៅទៀត ការសាងសង់ ក៏បានអនុវត្តតាមស្តង់ដារ គុណភាព សុវត្ថិភាព និងបច្ចេកទេសសាងសង់ ក្រោមការចុះពិនិត្យ តាមដាន អង្កេត និងវាយតម្លៃជាប្រចាំ របស់ភ្នាក់ងារសហប្រតិបត្តិការអន្តរជាតិជប៉ុន JICA ។
ក្រសួងស្នើសុំការសហការ និងអធ្យាស្រ័យ ពីបងប្អូនប្រជាពលរដ្ឋ ក្នុងករណីមានផលប៉ះពាល់ ដែលកើតមានឡើង អំឡុងពេលសាងសង់នេះ៕ ដោយ៖បញ្ញាស័ក្តិ