ភ្នំពេញ ៖ លោកតាម្នាក់ គាត់អាយុ ជិត៩០ឆ្នាំហើយ គាត់បាននាំលោកយាយ ជាភរិយាគាត់មកអង្គុយរង់ចាំឲ្យឧត្តមក្រុមប្រឹក្សាពិគ្រោះ និងផ្ដល់យោបល់ ពីគណបក្សខ្មែរក្រោក ឲ្យជួយគាត់ លើករណីឯកឧត្តម ឧកញ៉ាម្នាក់ ក្លែងបន្លំឯកសារ ប្រើអំណាចបន្លំអង្គហេតុ បំពានយកដីរបស់គាត់ ដែលជាដីរបស់គាត់សន្សំប្រាក់ទិញសម្រាប់ពេលជរា ។ ហើយគាត់បានប្ដឹងគ្រប់កន្លែង តែពុំទាន់មាននរណាអើពើជូនគាត់នៅឡើយ ។
នេះបើតាមឯកឧត្តម សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សា ពិគ្រោះ និងផ្ដល់យោបល់បានឲ្យដឹងនៅយប់ថ្ងៃទី ២៥ ខែវិច្ឆិកា ឆ្នាំ២០១៩នេះ។
លោកបានបន្ថែមឲ្យដឹងថា ករណីនេះខ្ញុំបានផ្ដល់ជាការប្រឹក្សាដល់គាត់ និងចូលរួមរីករាយសហកាជាមួយគាត់ក្នុងការតាមដាន រាល់ចំណាត់ការនានារបស់មន្ត្រីពាក់ព័ន្ធលើវិធានការ ដោះស្រាយជូនគាត់ ។
ជាចុងក្រោយលោកបានបង្ហើយថា “អស់លោក អើយ ឯកឧត្តមហើយឧកញ៉ាទៀត គ្រាន់តែងារ ប្រវែងស្មើទូកងរ តែសូម្បីចាស់ជរា ក៏អស់លោកអត់លើកលែងដែរ”។ ប៉ុន្តែទោះយ៉ាងណា លោកពុំបានបញ្ចេញឈ្មោះពិតប្រាកដរបស់ឯកឧត្តមឧកញ៉ានោះឲ្យសាធារណជនដឹងទេ៕ដោយ៖កូឡាប
