បុរសវ័យ ៦៣ឆ្នាំម្នាក់ក្នុងប្រទេសអាឡឺម៉ងបានស្លាប់ ដោយសារតែឆ្លងជំងឺដ៏កម្រម្យ៉ាង បន្ទាប់ពីឆ្កែរបស់គាត់លិឍ។
វេជ្ជបណ្ឌិតបានព្រមានឲ្យម្ចាស់សត្វចិញ្ជឹមទាំងអស់ ឲ្យស្វែងការព្យាបាលជាបន្ទាន់ ប្រសិនជាពួកគេមានរោគសញ្ញាដូចជំងឺផ្តាសាយធំ។
បើតាមសេចក្តីរាយការណ៍ បុរសរងគ្រោះនោះបានឆ្លងជំងឺដ៏កម្រ តាមរយៈការចម្លងបាក់តេរីដែលមាននៅក្នុងមាត់ឆ្កែ។
បាកតេរីដែលមាននៅក្នុងមាត់ឆ្កែ និងឆ្មាអាចចម្លងតាមរយៈការខាំរបស់ឆ្កែ ឬឆ្មា ប៉ុន្តែបុរសរងគ្រោះមិនបានត្រូវឆ្កែខាំឡើយ។
“គាត់ត្រូវបានឆ្កែប៉ះ និងលិឍ កាលពីប៉ុន្មានសប្តាហ៍មុន ប៉ុន្តែមិនបានខាំ ឬធ្វើឲ្យគាត់របួសឡើយ”។ នេះបើតាមសេចក្តីរាយការណ៍ដែលចេញដោយពេទ្យនៅមន្ទីរពេទ្យកាកបាទក្រហម ក្នុងទីក្រុងប៊ែរឡាំង។
របាយការណ៍និយាយទៀតថា ដំបូងឡើយគាត់គ្រាន់តែមានរោគសញ្ញាដូចកើតផ្តាសាយធំ ហើយក្រោយមកក៏វិវត្តន៍ទៅជាជំងឺជាំស្បែកធ្ងន់ធ្ងរ។
បុរសខាងលើ ត្រូវបានគេព្យាបាលយ៉ាងយកចិត្តទុកដាក់ ប៉ុន្តែសុខភាពរបស់គាត់កាន់តែដុនដាបទៅ និងបានស្លាប់៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
