ភ្នំពេញ៖ ក្នុងវេទិកា ផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានីភ្នំពេញនៅវត្ដវាលស្បូវ សង្កាត់វាលស្បូវ ខណ្ឌច្បារអំពៅ ប្រជាពលរដ្ឋ សុំឲ្យអាជ្ញាធរ ក្រុង, ខណ្ឌ,សង្កាត់ ជួយដោះស្រាយ រឿងក្មេងប្រើប្រាស់គ្រឿងញៀន លូ,ផ្លូវ,ទឹកលិច, ភ្លើងនិងសំរាម ។ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានី បានប្រព្រឹត្ដទៅកាលពីថ្ងៃអង្គារ១៥រោច ខែកត្ដិក ឆ្នាំកុរឯកស័កព.ស២៥៦៣ត្រូវនិងថ្ងៃទី២៧ វិច្ឆិកា ឆ្នាំ២០១៩ ក្រោមអធិបតី ភាព លោក ប៉ា សុជាតិវង្ស ប្រធានក្រុមប្រឹក្សារាជធានីភ្នំពេញ និង លោក នួន ផារ័ត្ន អភិបាលរងរាជធានីភ្នំពេញ ព្រមទាំងមានការចូលរូមពីប្រជាពលរដ្នជាច្រើនផងដែរ ។
ក្នុងឱកាសនោះដែរ អ្នកស្រី ម៉ៅ នារី ប្រជាពលរដ្ឋរស់នៅភូមិវាលស្បូវ បានស្នើឲ្យអាជ្ញាធរជួយ ដោះស្រាយ រឿងក្រុមហ៊ុនផានអ៊ីម៉ិច ចាក់ដីលុបរំលោភលើដីកម្មសិទ្ធិ របស់គាត់ ធ្វើឲ្យគាត់រស់នៅពិបាក់ ពិសេសការលក់ដូរ និងធ្វើដំណើរ ចេញចូលផ្ទះ មិនតែប៉ុណ្ណោះ ថែមទាំងប្ដឹងគាត់ឡើងតុលាការទៀតផង។
លោកសេង គូនណូ សមាជិកក្រុមប្រឹក្សារាជធានីភ្នំពេញ បានបញ្ជាក់ថា៖ វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សារាជធានី ត្រូវបានធ្វើឡើងក្នុង១ឆ្នាំម្តង សម្រាប់មួយខណ្ឌៗ មានន័យថា៖ទាំង ១៤ ខណ្ឌចំណុះ ឲ្យរដ្ឋបាលរាជធានីភ្នំពេញ និងធ្វើឡើងចំនួន១៤ដងផងដែរ ស្របពេលដែលឆ្នាំ២០១៩ នេះរដ្ឋបាលរាជធានីភ្នំពេញ បានបើកវេទិកាពិគ្រោះយោ បល់បានចំនួន៨ លើករួចមកហើយ ក្នុងនោះរួមមានខណ្ឌចំការមន, បឹងកេងកង ,ទួលគោក,មានជ័យ ,ឬស្សីកែវ, សែសុខ, ជ្រោយចង្វា និងច្បារអំពៅ សម្រាប់ព្រឹកថ្ងៃ២៧ វិច្ឆិកា ឆ្នាំ២០១៩នេះ ។
លោក ប៉ា សុជាតិវង្ស បញ្ជាក់ថា៖ វេទិកាផ្ស ព្វផ្សាយនិងពិគ្រោះយោបល់របស់ក្រុមប្រឹក្សារាជធានីនៅព្រឹកនេះ គឺផ្តោតសំខាន់ពាក់ព័ន្ធបញ្ហា៣ ចំណុច ដែលទាក់ទងនឹងកង្វល់ផ្ទាល់របស់ប្រជាពលរដ្ឋ ក្នុងនោះរួមមាន បញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍន៍មូលដ្ឋាន។ សម្រាប់រដ្ឋបាលរាជធានីភ្នំពេញ ការចូលរួមមតិយោបល់ និងលើក ឡើងនូវសំណើសំណួរ សំណូមពររបស់ប្រជាពលរដ្ឋ បាននាំមកនូវសក្តានុពលយ៉ាងធំធេង និងបានធ្វើឲ្យពលរដ្ឋបាលរាជធានីភ្នំពេញ ឆ្លុះបញ្ចាំងនូវចំណុចអសកម្មនាពេលកន្លងមក ដើម្បីរដ្ឋបាលរាជធានីធ្វើការកែលម្អឡើងវិញ និងអភិវឌ្ឍន៍ក្នុងមូលដ្ឋានឲ្យ បានល្អប្រសើរ និងស្វែងរកនូវដំណោះស្រាយជូនប្រជាពលរដ្ឋឲ្យមានតម្លាភាព និងមាន ប្រសិទ្ធភាពក្នុងនាមជាតំណាងរដ្ឋបាលសាធារណៈ ។
ក្នុងវេទិកានេះ មានប្រជាពលរដ្ឋប្រមាណជិត២០នាក់ បានឡើងចោទសួរទៅអាជ្ញាធរ នូវសំណើររបស់ពួកគាត់ ដែលទាក់ទងទៅនឹងបញ្ហាជាច្រើនដូចជា បញ្ហាដាក់បង្គោលភ្លើងបំភ្លឺផ្លូវសាធារណៈ ធ្វើផ្លូវថ្មី និងជួសជុលផ្លូវដែលខូត ឲ្យស្អាតល្អងាយស្រួលក្នុងធ្វើដំណើរ ដាក់បណ្តាញលូថ្មី បញ្ហាប្រជាជាពលរដ្ឋអ្នកជិតខាងផឹកស៊ីច្រៀងរាំ ដល់យប់ជ្រៅបង្កការរំខានដល់អ្នកជិតខាង បញ្ហាតចរន្តអគ្គិសនី បញ្ហាទឹកស្អាត និងបញ្ហាមួយចំនួនទៀត ដែលប្រជាពលរដ្ឋបានស្នើសុំតាំងពីឆ្នាំមុនៗរហូតមកដល់ឆ្នាំ២០១៩នេះ នៅតែមិនមានលទ្ធផល បញ្ហាទំនាស់ដីធ្លីរវាងប្រជាពលរដ្ឋ ជាមួយនឹងក្រុមហ៊ុនផានអ៊ីម៉ិច របស់លោកស្រីស៊ុយសុផាន ជាប្រធានក្រុមហ៊ុន ជាដើម។
លោក នួន ផារ័ត្ន អភិបាលរងរាជធានីភ្នំពេញ បានធានាថា៖ នឹងលើកយករាល់មតិយោបល់សំណួរ សំណើ និងសំណូមពររបស់អស់លោក លោកស្រីទៅពិនិត្យ និងពិចារណា ព្រមទាំងចាត់អាទិភាពដាក់បញ្ចូលទៅក្នុងគម្រោងផែនការអភិវឌ្ឍបីឆ្នាំរំកិលរបស់ក្រុមប្រឹក្សារាជធានី ក្រុមប្រឹក្សាខណ្ឌ ក្រុមប្រឹក្សាសង្កាត់ ដើម្បី ធានាដល់ការផ្តល់សេវាសាធារណៈឱ្យបានកាន់តែប្រសើរឡើង និងលើកកម្ពស់គុណភាពជីវភាពរស់នៅ របស់បងប្អូនប្រជាពលរដ្ឋក្នុងសង្កាត់ ខណ្ឌនៃរាជធានី ឱ្យកាន់តែមានតម្លាភាព និងប្រសិទ្ធភាព។ លើសពីនេះទៅទៀត រដ្ឋបាលរាជធានីភ្នំពេញនឹងកែលម្អ ការផ្តល់សេវាសាធារណៈរបស់ខ្លួន ក្នុងកំណែទម្រង់មួយដ៏ ស៊ីជម្រៅ និងជាក់លាក់ ប្រកបដោយប្រសិទ្ធភាព និងតម្លាភាពដែលអាចឆ្លើយតប បានទៅ នឹងតម្រូវការ របស់ប្រជាពលរដ្ឋ ជាក់ ស្តែងនៅសាលារាជធានី ភ្នំពេញ ក៏ដូចជានៅតាមសាលាខណ្ឌទាំង១៤ គឺយើងបានបង្កើតច្រកចេញចូលតែមួយ និងការិយាល័យ របស់ប្រជាពលរដ្ឋ ដែលអាច បម្រើសេវាជូនប្រជាពល រដ្ឋបានទាន់ចិត្ត ព្រមទាំងអាចកាត់បន្ថយភាពក្រីក្រនៅមូលដ្ឋានក្នុងរយៈពេលដ៏ខ្លីខាងមុខនេះ ៕ ដោយ៖កូឡាប