ភ្នំពេញ ៖ សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០២ ត្រូវបានរាជរដ្ឋាភិបាល គ្រោងនឹងចំណាយចំនួន៣៣.៣៣៩.៦៣៣ លានរៀល ស្មើប្រមាណ៨.១៩៦លានដុល្លារ ត្រូវជា២៨,០១ភាគរយ នៃផលិតផលក្នុងស្រុកសរុប (ផ.ស.ស) គឺមានកំណើន ២២,៧ភាគរយ ធៀបនឹងច្បាប់ថវិកាជាតិ ឆ្នាំ២០១៩។ ក្នុងច្បាប់ថវិកាជាតិ ឆ្នាំ២០២០ រាជរដ្ឋាភិបាលកំណត់ទំហំនៃការខ្ចីប្រាក់ពីដៃគូអភិវឌ្ឍន៍ សម្រាប់ឆ្នាំ២០២០ ក្នុងកម្រិត១.៤០០ លាន SDR ស្មើប្រមាណ១.៩២៧ លានដុល្លារអាម៉េរិក។
រដ្ឋសភាបានបន្តសម័យប្រជុំលើកទី៣ នីតិកាលទី៦ នៅព្រឹកថ្ងៃអង្គារ ទី២៦ ខែវិច្ឆិកា ឆ្នាំ២០១៩ ដើម្បីពិភាក្សា និងអនុម័តរបៀបវារៈចំនួន៤ រួមមាន៖ ១. ការពិភាក្សា និងអនុម័តសេចក្តីព្រាងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០២០។ ២. ការពិភាក្សា និងអនុម័តសេចក្តីព្រាងច្បាប់ស្តីពី ការទូទាត់ថវិកាទូទៅរបស់រដ្ឋ សម្រាប់ការគ្រប់គ្រង២០១៨។ ៣. ការពិភាក្សា និងអនុម័តសេចក្តីព្រាងច្បាប់ស្តីពី វិសោធនកម្មមាត្រា៣ មាត្រា១៧ មាត្រា២០ មាត្រា២១ មាត្រា២៧ មាត្រា២៨ មាត្រា២៩ មាត្រា៥៤ មាត្រា៥៥ និងមាត្រា៥៩ នៃច្បាប់ស្តីពីសហជីព ដែលត្រូវប្រកាសឱ្យប្រើដោយព្រះរាជក្រមលេខ នស/រកម/០៥១៦/០០៧ ចុះថ្ងៃទី១៧ ខែឧសភា ឆ្នាំ២០១៦។ ៤. ការពិភាក្សា និងអនុម័តសេចក្តីព្រាងច្បាប់ស្តីពី ការអនុម័តយល់ព្រមឱ្យព្រះរាជាណាចក្រកម្ពុជា ចូលជាសមាជិកនៃកិច្ចព្រមព្រៀងសម្រាប់អនុវត្តបទប្បញ្ញត្តិ នៃអនុសញ្ញា សហប្រជាជាតិស្តីពី ច្បាប់សមុទ្រ ចុះថ្ងៃទី១០ ខែធ្នូ ឆ្នាំ១៩៨២ ទាក់ទងនឹងការគ្រប់គ្រង និងការអភិរក្សផល ស្តុកត្រី ផ្លាស់ទីមធ្យម និងផលស្តុកត្រីផ្លាស់ទីឆ្ងាយ។
ក្នុងសម័យប្រជុំរដ្ឋសភាលើកទី៣ នីតិកាលទី៦ នៃរដ្ឋសភា ដែលបាន ពិភាក្សា សេចក្តីព្រាងច្បាប់ស្ដីពី ហិរញ្ញវត្ថុសម្រាប់ការគ្រប់គ្រងឆ្នាំ២០២០ នៅព្រឹកថ្ងៃទី២៦ ខែវិច្ឆិកា ឆ្នាំ២០១៩នេះ លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងថា ជារួម ថវិកាជាតិឆ្នាំ២០២០ ត្រូវបាន រាជរដ្ឋាភិបាល បង្កើនការចំណាយអាទិភាពចាំបាច់ តាមវិស័យទាំង ៤ រួមមាន៖ វិស័យរដ្ឋបាលទូទៅ វិស័យការពារជាតិ សន្តិសុខ សណ្តាប់ធ្នាប់សាធារណៈ វិស័យសង្គមកិច្ច និងវិស័យសេដ្ឋកិច្ច។ ក្នុងនោះ ក្រសួងអប់រំ យុវជន និងកីឡា ត្រូវបានរាជរដ្ឋាភិបាល គ្រោងនឹងចំណាយច្រើនជាងគេ នៅឆ្នាំ២០២០ មានចំនួន ៣.៧៣៨.១៣០ លានរៀល ស្មើប្រមាណ ៩១៩ លានដុល្លារអាម៉េរិក។ បន្ទាប់មក ក្រសួងសាធារណការ និងដឹកជញ្ជូន ចំនួន៣.២១៨.២៣២ លានរៀល ស្មើប្រមាណ៧៩១លានដុល្លារអាម៉េរិក។ ក្រសួងការពារជាតិ គ្រោងចំណាយ ២.៥៣៦.៧២៨ លានរៀល ស្មើប្រមាណ ៦២៣ លានដុល្លារអាម៉េរិក។ ក្រសួងសុខាភិបាល ២.១០២.៨៩៩ លានរៀល ស្មើប្រមាណ ៥១៧ លានដុល្លារ និងក្រសួងមហាផ្ទៃ. ២ ០៨៣.១០៧ លានរៀល ស្មើប្រមាណ ៥១២ លានដុល្លារ។ ជាមួយគ្នានេះដែរ ថវិកាជាតិ ឆ្នាំ២០២០ ក៏បានបង្កើនការចំណាយដល់រដ្ឋបាលថ្នាក់ក្រោមជាតិ ក្នុងនោះ ឧបត្ថម្ភរាជធានីខេត្ត ចំនួន៤៧.០២៤លានរៀល ឧបត្ថម្ភមូលនិធិក្រុង ស្រុក ចំនួន ២៣៥.១១៧ លានរៀល មានកំណើន ២២.៤ភាគរយ ធៀបនឹងច្បាប់ ឆ្នាំ២០១៩ និងឧបត្ថម្ភមូលនិធិឃុំ សង្កាត់ ចំនួន ៦០៧.៣៨៦ លានរៀល មានកំណើន ១៦ភាគរយ ធៀបនឹងច្បាប់ឆ្នាំ២០១៩ និងមូលនិធិអភិវឌ្ឍន៍ឃុំ សង្កាត់ ចំនួន១៩៥.៩៣១ លានរៀល ដែលជាការផ្ទេរធនធានបន្ថែមពីថវិការដ្ឋ ចំនួន១ភាគរយ ក្នុង១ឆ្នាំ នៃចំណូលចរន្តថ្នាក់ជាតិ ជូនរដ្ឋបាលឃុំ សង្កាត់ សម្រាប់ចំណាយអភិវឌ្ឍន៍មូលដ្ឋាន ចាប់ពីឆ្នាំ២០២០ ដល់ឆ្នាំ២០២៣។ ក្នុងនោះ ការឧបត្ថម្ភធនបន្ថែមនេះ នឹងធ្វើឱ្យទំហំមូលនិធិអភិវឌ្ឍន៍ឃុំ សង្កាត់ នឹងកើនឡើងទ្វេដង នៅឆ្នាំ២០២០ ពីប្រមាណ ៣៥.០០០ ដុល្លារអាម៉េរិក ជាមធ្យមក្នុង១ឆ្នាំ ទៅប្រមាណជាង ៧០.០០០ ដុល្លារអាម៉េរិក ជាមធ្យម ក្នុង១ឆ្នាំ។
ក្នុងច្បាប់ថវិកាជាតិ ឆ្នាំ២០២០ រាជរដ្ឋាភិបាលកំណត់ទំហំនៃការខ្ចីប្រាក់ពីដៃគូអភិវឌ្ឍន៍ សម្រាប់ឆ្នាំ២០២០ ក្នុងកម្រិត១.៤០០ លាន SDR ស្មើប្រមាណ១.៩២៧ លានដុល្លារអាម៉េរិក ខណៈកំណើនសេដ្ឋកិច្ចនឹងថយមកនៅត្រឹម៦,៥ ភាគរយ។ បើតាមការលើកឡើងរបស់ក្រសួងសេដ្ឋកិច្ច និងហិរញ្ញវត្ថុ បានគូសបញ្ជាក់ថា ការខ្ចីនេះ នឹងមិនបង្កើតជាបន្ទុកបំណុលវ័ណ្ឌករដល់កម្ពុជាទេ៕ដោយ៖បញ្ញាស័ក្តិ
