កោះកុង៖ ប្រជាការពារភូមិ គឺលោក ទិត្យ ស៊ីថា ត្រូវបានតុលាការខេត្តកោះកុង បញ្ជូនទៅឃុំខ្លួននៅពន្ធនាគារខេត្ត កាលពីល្ងាចថ្ងៃទី២៥ ខែវិច្ឆិកានេះ។ ក្រោយសមត្ថកិច្ចចាប់លោក ទិត្យ ស៊ីថា ដែលជាប្រជាការពារភូមិទៅតុលាការ គឺក្រុមអ្នកភូមិជាង១០០នាក់ បាននាំគ្នាទៅតវ៉ាមុខសាលាដំបូងខេត្តកោះកុង ដើម្បីទាមទារឲ្យដោះលែងលោក ទិត្យ ស៊ីថា មានសេរីភាពវិញ ។
កាលពីល្ងាចថ្ងៃទី២៥ ខែវិច្ឆិកានេះ សាលាដំបូងខេត្តកោះកុង បានសម្រេចបញ្ជូនប្រជាការពារភូមិម្នាក់ លោក ទិត្យ ស៊ីថា អាយុ៤០ នៅភូមិសំរុងតាកែវ ឃុំព្រែកខ្សាច់ ស្រុកគិរីសាគរ ទៅឃុំខ្លួនបណ្តោះអាសន្ន ក្រោមការចោទថា “គំរាមកំហែងថានឹងសម្លាប់” តាមមាត្រា២៣៣ នៃក្រមព្រហ្មទណ្ឌ ទៅតាមបណ្ដឹងលោកអភិបាលរងខេត្តកោះកុង សុខ សុទ្ធី។
ប្រជាការពារភូមិម្នាក់ឈ្នោះ ទិត្យ ស៊ីថា ត្រូវបានសមត្ថកិច្ចខេត្តកោះកុងចាប់បញ្ជូនទៅតុលាការនេះ ក្រោយពីមានជម្លោះជាមួយអភិបាលរងខេត្តកោះកុង លោក សុខ សុទ្ធី។ កន្លងមក ប្រជាការពារភូមិ លោក ទិត្យ ស៊ីថា តែងតែរិះគន់ថ្នាក់ដឹកនាំខេត្ត ដែលមិនបានដោះស្រាយបញ្ហាប្រឈមនានា ជូនពលរដ្ឋក្នុងសហគមន៍របស់ខ្លួន ជាពិសេសបញ្ហាផ្លូវ និងការរំលោភបំពានដីធ្លីពីសំណាក់ក្រុមហ៊ុន ឌឹវើលុបមែន គ្រុប (UDG)។
អភិបាលរងខេត្តកោះកុង លោក សុខ សុទ្ធី ប្រាប់កាសែតក្នុងស្រុកមួយថា លោកប្តឹងលោក ទិត្យ ស៊ីថា ពីបទ “គំរាមកំហែងថានឹងសម្លាប់” ដោយលោកថា ប្រជាការពារភូមិរូបនោះ បានគំរាមសម្លាប់លោក កាលពីថ្ងៃទី៨ ខែមេសា។ កន្លងមកលោកធ្លាប់ឲ្យលោក ទិត្យ ស៊ីថា សុំទោសជាសាធារណៈដើម្បីបញ្ចប់រឿងដែរ ប៉ុន្តែ លោក ទិត្យ ស៊ីថា មិនព្រមធ្វើ ទើបលោកឲ្យតុលាការចាត់ការតាមផ្លូវច្បាប់។
ក្នុងដីកាសន្និដ្ឋានបញ្ជូនរឿងឲ្យស៊ើបសួរចុះថ្ងៃទី៣០ ខែសីហា សាលាដំបូងខេត្តកោះកុង បានលើកឡើង ពីមូលហេតុដែលឈានដល់ការចាប់ខ្លួនប្រជាការពារភូមិ លោក ទិត្យ ស៊ីថា ថាកាលពីថ្ងៃទី៧ ខែមេសាឆ្នាំ២០១៩ តំណាងក្រុមហ៊ុន ញូញៀន ឌឹវើលុបមែន គ្រុប បានរាយការណ៍ប្រាប់អភិបាលរងខេត្តកោះកុង លោក សុខ សុទ្ធី ថាមានប្រជាពលរដ្ឋនៅភូមិសំរុងតាកែវ នាំគ្នាយកគ្រឿងចក្រឈូសឆាយផ្លូវក្នុងតំបន់អភិវឌ្ឍន៍របស់ក្រុមហ៊ុន។ ក្រោយពីលោកអភិបាលរងខេត្ត សុខ សុទ្ធី ទទួលបានដំណឹងនេះ លោកបានបញ្ជាទៅមេឃុំព្រែកខ្សាច់ លោក រៀម រុំ ឲ្យបញ្ឈប់សកម្មភាពប្រជាពលរដ្ឋ កុំឲ្យយកគ្រឿងចក្រទៅឈូសឆាយផ្លូវនោះតទៅទៀត ដោយថា ដើម្បីរង់ចាំការពិភាក្សាដោះស្រាយសិន។
តុលាការខេត្តកោះកុង បានស្រង់សំឡេងសាររបស់ប្រជាការពារភូមិ លោក ទិត្យ ស៊ីថា មកដាក់ក្នុងដីកាថា៖ “បងឯងនិយាយជាមួយមេឃុំ បងឯងគំរាមមេឃុំម៉េចខ្លះ។ ស្តាប់ពាក្យសម្តីបងឯងឲ្យច្បាស់ និយាយជាមួយមេឃុំ ហើយបងឯងគិតឧត្តមគតិខ្លួនឯងផង។ បងឯងនិយាយពីមុនយ៉ាងម៉េច និយាយក្រោយយ៉ាងម៉េច បងស្តាប់ឲ្យច្បាស់ ប្រយ័ត្នជាន់ដានខ្លួនឯងណាបងងាប់! ខ្ញុំឲ្យបងឯងងាប់ថ្ងៃណាក៏បានដែរ អ្នកភូមិខ្ញុំ ខ្ញុំប្រាប់មិនយកបងឯងជាមុខទេ បងឯងត្រៀមងាប់ទៅ។ បើបងឯងនិយាយខុសតែមួយម៉ាត់ អូខេបង ប្អូនថា ចាំទទួលបង ស្វាគមន៍បងជានិច្ច”។
តុលាការបញ្ជាក់ថា នៅចំពោះមុខអយ្យការគឺលោក ទិត្យ ស៊ីថា បានទទួលស្គាល់ថា សារសំឡេងនោះពិតជារបស់ខ្លួនដែលផ្ញើទៅលោក សុខ សុទ្ធីមែន ប៉ុន្តែ លោកប្រកែកថា លោកមិនមានបំណងធ្វើសកម្មភាពដូចការនិយាយក្នុងសារសំឡេងឡើយ៕
