ភ្នំពេញ៖ លោកថោង ខុន អនុប្រធានអចិន្ត្រៃយ៍ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ២០២៣ (CAMSOC) បានដឹកនាំកិច្ចប្រជុំត្រួតពិនិត្យលើគណៈកម្មការជំនាញពិសេសចំនួន៦ នៅថ្ងៃទី២៦ ខែវិច្ឆិកា ឆ្នាំ២០១៩ ដែលជាគណៈកម្មការឈានមុខ ដើម្បីរៀបចំផែនការងាររបស់ខ្លួន ចាប់ពីដើមឆ្នាំ២០២០ តទៅ។
មានប្រសាសន៍ក្រោយបញ្ចប់កិច្ចប្រជុំ លោក វ៉ាត់ ចំរើន អគ្គលេខាធិការ CAMSOC បានផ្តល់ខ្លឹមសាររួមស្តីពីកិច្ចប្រជុំនេះថា គណៈកម្មការជំនាញចំនួន៦នេះ មានរចនាសម្ព័ន្ធគ្រប់គ្រងរបស់ខ្លួនរួចរាល់អស់ហើយ ដើម្បីរៀបចំផែនការសកម្មភាពការងារ និងគម្រោងថវិកា សម្រាប់ដំណើរការ។ លោកអគ្គលេខាធិការ បានលើកឡើងនូវការចង្អុលបង្ហាញរបស់លោក ថោង ខុន ដោយបែងចែកការងារជូនដល់គណៈកម្មការជំនាញទាំងនេះ និងត្រួតពិនិត្យសកម្មភាពការងារជាប្រចាំ។ កិច្ចប្រជុំផ្តោតសំខាន់លើការកំណត់លើប្រភេទកីឡា ការកំណត់លើហេដ្ឋារចនាសម្ព័ន្ធ ការរៀបចំគ្រោងឆ្អឺងពិធីបើក-បិទ ការអប់រំផ្សព្វផ្សាយសង្គមទាក់ទងទៅនឹងយុទ្ធនាការមួយចំនួន ហើយត្រូវយកទៅឆ្លងថ្នាក់ដឹកនាំ ដោយត្រូវចាប់ដំណើរការពីឆ្នាំ២០២០ ដើម្បីឆ្ពោះទៅទទួលរៀបចំស៊ីហ្គេម លើកទី៣២ ឆ្នាំ២០២៣ នៅកម្ពុជាឲ្យទទួលបានជោគជ័យជាប្រវត្តិសាស្ត្រ។
លោកវ៉ាត់ ចំរើន អះអាងទៀតថា ចាប់ពីដើមឆ្នាំ២០២០ តទៅ គណៈកម្មការជំនាញទាំងនេះ នឹងត្រូវចាប់ផ្តើមសកម្មភាពរបស់ខ្លួន ដើម្បីបំផុសចលនាផ្សព្វផ្សាយស៊ីហ្គេមផង និងកំណត់ផែនការអភិវឌ្ឍកីឡាផង ដែលយើងកំណត់គោលដៅថា ស៊ីហ្គេម ឆ្នាំ២០១៩នេះ គឺជាដំណាក់កាលទី១នៃការកំណត់ប្រភេទកីឡាគោល ត្រៀមស៊ីហ្គេម ២០២៣ និងដាក់ចេញនូវវិធានការនៃការកសាងហេដ្ឋារចនាសម្ព័ន្ធកីឡា បូកជាមួយនឹងផែនការអភិវឌ្ឍន៍ឲ្យដល់ឆ្នាំ២០២៣។ រីឯសម្រាប់ដំណាក់កាលទី២ ក្រោយស៊ីហ្គេម នៅប្រទេសវៀតណាម ២០២១ នឹងការរុះរើកែសម្រួលន្តិចបន្តួច។
សម្រាប់ស៊ីហ្គេម ២០១៩ នៅប្រទេសហ្វីលីពីននេះ CAMSOC បានបញ្ជូនមន្ត្រីរបស់ខ្លួនទៅសិក្សាស្រាវជ្រាវ ដកស្រង់បទពិសោធន៍លើការគ្រប់គ្រងដឹកនាំ ការរៀបចំរបស់ម្ចាស់ផ្ទះ ២០១៩នេះ ហើយឯកឧត្តមបណ្ឌិត ថោង ខុន បានចង្អុលបង្ហាញឲ្យមន្ត្រី CAMSOC ទាំងអស់ត្រូវយកពិសោធន៍ចំណុចខ្លាំង ចំណុចខ្សោយ មកកែសម្រួលសម្រាប់ការងាររបស់កម្ពុជាយើង។
លោកអគ្គលេខាធិការ CAMSOC បន្ថែមទៀតថា នៅក្នុងកំណែទម្រង់ស៊ីជម្រៅរបស់ក្រសួងអប់រំ យុវជន និងកីឡា ក៏ដូចជាគណៈកម្មាធិការជាតិអូឡាំពិកកម្ពុជា បានឯកភាពគ្នាលើកិច្ចការជួយជំរុញអភិវឌ្ឍប្រភេទកីឡាជាតិទាំងអស់ ឲ្យមានមានការរីកចម្រើន ដើម្បីដើរឲ្យទាន់គ្នា ស្របតាមផែនការមេ ស៊ីហ្គេម ២០២៣ របស់រាជរដ្ឋាភិបាលកម្ពុជា។ ប្រភេទកីឡាទាំងអស់ដែលត្រៀមនោះ មិនប្រាកដបញ្ជូលក្នុងស៊ីហ្គេម ២០២៣ទាំងអស់នោះទេ ដោយត្រូវឆ្លងកាត់ការពិនិត្យវាយតម្លៃពីការដឹកនាំ គ្រប់គ្រងរបស់សហព័ន្ធកីឡាជាតិនានា បូករួមទាំងស្តង់ដារបច្ចេកទេស គុណផលកីឡាមានភាពច្បាស់លាស់។ ដូច្នេះក្រោយស៊ីហ្គេម ២០១៩នេះ ចំពោះប្រភេទកីឡាណាខ្លះ ដែលមិនទាន់មានការអភិវឌ្ឍ ឬមានបញ្ហាមិនប្រក្រតី នៅក្នុងការគ្រប់គ្រងដឹកនាំ នឹងត្រូវចាត់ចូលក្នុងប្រភេទកីឡាបម្រុង ដោយនឹងទទួលបានការជួយជ្រោមជ្រែងបន្ថែមល្បឿន ដោយធ្វើយ៉ាងឲ្យមានការរីកចម្រើនសម្រាប់ប្រភេទកីឡាចន្លោះពី ៣០ ដល់ ៣៥ប្រភេទកីឡា។
លោកស្នើឲ្យមានការចូលរួមគ្រប់ពីសមាសភាពពាក់ព័ន្ធ ដើម្បីធ្វើឲ្យកម្មវិធីកំណែទម្រង់ស៊ីជម្រៅនេះ ទទួលបានជោគជ័យ ហើយដើម្បីឲ្យទទួលបានជោគជ័យ គឺត្រូវតែគ្រប់សហព័ន្ធកីឡាជាតិទាំងអស់ មានការចូលរួម លះបង់នូវផលប៉ះពាល់ទាំងអស់ ដើម្បីរួមគ្នាទៅសម្រេចជោគជ័យសម្រាប់ជាតិទាំងអស់គ្នា៕ ដោយ៖កូឡាប