(ភ្នំពេញ)៖នាយឧត្តមសេនីយ៍ វង្ស ពិសេន បានចាត់ទុកសកម្មភាពជួយទប់ស្កាត់ទប់ស្កាត់ពួកជ្រុលនិយមដឹកនាំដោយទណ្ឌិត សម រង្ស៊ី ពីសំណាក់ភាគីថៃ បានគោរពដល់គោលការណ៍មិនជ្រៀតជ្រែកផ្ទៃក្នុងប្រទេសដទៃ ឯសភាពការណ៍នៅតាមបណ្តោយព្រំដែន មកដល់ពេលនេះមានភាពល្អប្រសើរ។
នៅថ្ងៃទី២៦ ខែវិច្ឆិកា ឆ្នាំ២០១៩នេះ លោក នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ បានអនុញ្ញាតឲ្យលោកនាយឧត្តមសេនីយ៍ Maanat Wongwat មេបញ្ជាការកងទ័ពជើងអាកាសភូមិន្ទថៃ ចូលជួបសម្តែងការគួរសម នៅបន្ទប់សវនាការអគ្គបញ្ជាការដ្ឋាន។
លោកនាយឧត្តមសេនីយ៍ វង្ស ពិសេន បានលើកឡើងពីទំនាក់ទំនង និងសហប្រតិបត្តិការដ៏ល្អរវាងប្រទេសទាំងពីរ។ លោកថា សភាពការណ៍នៅតាមបណ្តោយព្រំដែន មកដល់ពេលនេះមានភាពល្អប្រសើរ ដោយកងកម្លាំងប្រទេសទាំងពីរ បានផ្លាស់ប្តូរព័ត៌មានសន្តិសុខ ការសហការបង្ក្រាបបទល្មើសឆ្លងដែនខុសច្បាប់ ការជួញដូរគ្រឿងញៀន និងជួញដូរមនុស្សបានទាន់ពេលវេលា។
នាយឧត្តមសេនីយ៍ អគ្គមេបញ្ជាការ បានថ្លែងអំណរគុណចំពោះរាជរដ្ឋាភិបាលថៃ ក៏ដូចជា កងទ័ព និងប៉ូលីសថៃ ដែលបានសហការល្អជួយទប់ស្កាត់ពួកជ្រុលនិយមដឹកនាំដោយទណ្ឌិត សម រង្ស៊ី ក្នុងការប៉ុងប៉ងផ្តួលរំលំរាជរដ្ឋាភិបាលកម្ពុជានាពេលកន្លងមក។ លោកនាយឧត្តមសេនីយ៍ បានចាត់ទុកសកម្មភាពជួយទប់ស្កាត់របស់ភាគីថៃនេះថា បានគោរពដល់គោលការណ៍មិនជ្រៀតជ្រែកផ្ទៃក្នុងប្រទេសដទៃ។
លោកនាយឧត្តមសេនីយ៍ Maanat Wongwat បានថកលែងថា ពិពណ៌ការងារសន្តិសុខ និងការពារជាតិ នៅព្រះរាជាណាចក្រថៃ កាលពីថ្ងៃទី៨ ខែវិច្ឆិកាកន្លងទៅ មានសារសំខាន់ដល់ការគិតគូរពីសន្តិសុខរួម របស់អាស៊ាន ហើយដែលប្រទេសជាសមាជិកនីមួយៗត្រូវយកចិត្តទុកដាក់រក្សាសុវត្ថិភាពឲ្យបានល្អ។
នាយឧត្តមសេនីយ៍ Maanat Wongwat បានផ្តល់លទ្ធភាពដល់កងទ័ពជើងអាកាសកម្ពុជា ក្នុងការទៅធ្វើទស្សនកិច្ចស្វែងយល់ពីភាពរីកចម្រើនរបស់កងទ័ពជើងអាកាសភូមិន្ទថៃ ជាពិសេស ការងារជួសជុល និងកិច្ចប្រតិបត្តិការបន្ធូបន្ថយគ្រោះមហន្តរាយនានាដែលកើតមាន៕ ដោយ៖កូឡាប
