ប៊ូសាន ៖ ប្រធានាធិបតីសាធារណរដ្ឋកូរ៉េបានថ្លែងថា ប្រទេសតាមដងទន្លេមេគង្គទាំង៥ (កម្ពុជា ឡាវ ថៃ វៀតណាម និងមីយ៉ាន់ម៉ា) បានដើរតួនាទីយ៉ាងសំខាន់ ក្នុងការបន្ធូរបន្ថយភាពតានតឹងនៅឧបទ្វីកូរ៉េ នឹងជួយដល់ប្រទេសកូរ៉េខាងជើង ព្រមរំសាយកម្មវិធីអាវុធនុយក្លេអ៊ែរ។
លោក មូន ជេអ៊ីន ប្រធានាធិបតីសាធារណរដ្ឋកូរ៉េ បានថ្លែងនៅក្នុងពិធីជប់លៀង សម្រាប់មេដឹកនាំប្រទេស តាមដងទន្លេមេគង្គទាំង៥ នៅរាត្រីថ្ងៃទី២៦ ខែវិច្ឆិកា ឆ្នាំ២០១៩។
ពិធីជប់លៀង មុនពេលចាប់ផ្តើមកិច្ចប្រជុំកំពូលមេគង្គ-សាធារណរដ្ឋកូរ៉េជាលើកដំបូង នៅថ្ងៃទី២៧ ខែវិច្ឆិកា ឆ្នាំ២០១៩នេះ ត្រូវបានធ្វើឡើងនៅមជ្ឈមណ្ឌលវប្បធម៌អាស៊ាន-សាធារណរដ្ឋកូរ៉េ ដោយមានការអញ្ជើញ ចូលរួមពីលោកឧត្តមសេនីយ ប្រាយុទ្ធ ចាន់អូចា នាយករដ្ឋមន្ត្រីថៃ, លោក ថងលូន ស៊ីសូលីត នាយករដ្ឋមន្ត្រីឡាវ លោក ង្វៀន សួនហ្វ៊ុក នាយករដ្ឋមន្ត្រីវៀតណាម លោកស្រី អ៊ុង សានស៊ូជី ទីប្រឹក្សារដ្ឋមីយ៉ាន់ម៉ា និងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាតំណាងដ៏ខ្ង់ខ្ពស់ របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា។
លោក ប្រធានាធិបតីសាធារណរដ្ឋកូរ៉េ បានមានប្រសាសន៍ថា បណ្តាប្រទេសមេគង្គ បានដើរតួនាទីយ៉ាងសំខាន់ ក្នុងការបន្ធូរបន្ថយភាពតានតឹង នៅឧបទ្វីបកូរ៉េ ដោយបានជំរុញឱ្យកូរ៉េខាងជើង ក្លាយជាសមាជិកសហគមន៍អន្តរជាតិ។
ប្រទេសសមាជិកអាស៊ាន នឹងជួយដល់ប្រទេសកូរ៉េខាងជើង នៅពេលប្រទេសនេះ ព្រមរំសាយកម្មវិធីអាវុធនុយក្លេអ៊ែរ។
លោកប្រធានាធិបតីកូរ៉េខាងត្បូង បានបន្ថែមថា ខ្ញុំសង្ឃឹមថា មេដឹកនាំកូរ៉េទាំងពីរ អាចរៀបចំពិធីជប់លៀង ជាមួយមេដឹកនាំនៃប្រទេសទន្លេមេគង្គ។
សូមបញ្ជាក់ថា កិច្ចប្រជុំកំពូលមេគង្គ-សាធារណរដ្ឋកូរ៉េ នឹងត្រូវប្រារព្ធជាលើកដំបូងនៅថ្ងៃទី២៧ ខែវិច្ឆិកា ឆ្នាំ២០១៩ នេះ នៅទីក្រុងប៊ូសាន សាធារណរដ្ឋកូរ៉េ។ កិច្ចប្រជុំកំពូលនឹងធ្វើឡើងក្រោមប្រធានបទ ផ្លូវទៅកាន់ទន្លេមេគង្គ៕ ដោយ៖បញ្ញាស័ក្តិ
