ភ្នំពេញ៖ ស្នងការដ្ឋាននគរបាលរាជធានីភ្នំពេញ បានឲ្យដឹងថា បុរសម្នាក់ដែលស្លៀកពាក់ឯកសណ្ឋានប៉ូលិស ហើយធ្វើការឃាត់ម៉ូតូបុរសម្នាក់នៅម្តុំផ្លូវរថភ្លើង ភូមិអង្គ សង្កាត់ចោមចៅទី៣ នៅយប់ថ្ងៃទី ២៦ ខែវិច្ឆិកា ឆ្នាំ២០១៩ វេលាម៉ោង ១១និង៣០យប់ មិនមែនជាប៉ូលិសឡើយ ។
គ្រងឯកសណ្ឋាន ប៉ូលិសសក្តិ៣ ជិះម៉ូតូដេញកាក់ម៉ូតូ យុវជនម្នាក់ សុំពិនិត្យទឹកនោម និងសំឡុតគម្រាមយកទៅខណ្ឌ បង្កឲ្យមានការភ្ញាក់ផ្អើល ម៉ោង១២ និង៣០នាទី រំលងអធ្រាត្រ ឈានចូលថ្ងៃទី២៧ ខែវិច្ឆិកាឆ្នាំ២០១៩ នៅតាមបណ្ដោយផ្លូវជាតិលេខ៤ ចំណុចមុខបុរីសែនមនោរម្យ ក្នុងសង្កាត់ចោមចៅទី៣ ខណ្ឌពោធិ៍សែនជ័យ ចុងក្រោយប៉ូលិសក្លែងក្លាយសោះ និងឆ្លើយយ៉ាងឡូយព្រោះស្រឡាញ់ខោអាវប៉ូលិសពេក។
បុគ្គលមួយរូបបានយកឯកសណ្ឋានសមត្ថកិច្ចនគរបាលមកស្លៀក ហើយបានដើរតួនាទីភារកិច្ចដូចសមត្ថកិច្ច ដែលហេតុថាសុំឆែកឆេរប្រជាពលរដ្ឋធ្វើដំណើរនៅពេលយប់ ដោយសំអាងខុសច្បាប់នេះច្បាប់នោះ ការពិតកៀបស៊ីសោះ ។
ទីបំផុតបុគ្គលរូបនេះជាប៉ូលិសក្លែងក្លាយ នៅពេលសមត្ថកិច្ចពិតប្រាកដឃាត់ខ្លួនយកមកសួរនាំ ទើបឆ្លើយថាពាក់ស័ក្តិ៣ជាប៉ូលិសក្លែងក្លាយទិញឯកសណ្ឋានពីផ្សារយកមកពាក់ ។
ប៉ូលិសក្លែងក្លាយរូបនោះមានឈ្មោះ ទូច ដេវីត អាយុ២៤ឆ្នាំ មានមុខរបរលក់ផលិតផលតាមអនឡាញ ស្នាក់នៅម្ដុំទួលទំពូងទី២ ខណ្ឌចំការមន មានស្រុកកំណើត ស្រុកស្អាង ខេត្តកណ្ដាល ចំណែកឯជនរងគ្រោះមានឈ្មោះ ជា សុផាណាត់ អាយុ២៤ឆ្នាំ ជាកម្មកររោងចក្រ ស្នាក់ម្តុំវត្តអង្គ ខណ្ឌពោធិ៍សែនជ័យ រាជធានីភ្នំពេញ ៕ ដោយ៖កូឡាប
