អូស្លូ ប្រទេសណ័រវេស្ស៖ អនុរដ្ឋមន្ត្រីក្រសួងការបរទេសជប៉ុន លោកស្រី OMI Asako បានសរសើរកម្ពុជាដែលមានឆន្ទៈពិតប្រាកដក្នុងការបោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះ។
ព្រឹកថ្ងៃទី ២៦ ខែវិច្ឆិកា ឆ្នាំ២០១៩ បន្ទាប់ពីពិធីបើកសន្និសីទត្រួតពិនិត្យឡើងវិញលើកទី៤ ក្នុងទីក្រុងអូស្លូ លោកទេសរដ្ឋមន្ត្រី លី ធុជ បានជួបពិភាក្សាការងារជាមួយលោកស្រី OMI Asako, អនុរដ្ឋមន្ត្រីក្រសួងការបរទេស ប្រទេសជប៉ុន ។
លោកទេសរដ្ឋមន្ត្រី បានសម្តែងនូវការអរគុណចំពោះរដ្ឋាភិបាលជប៉ុន ដែលបានផ្តល់នូវការយកចិត្តទុកដាក់ និងផ្តល់នូវជំនួយជាបន្តបន្ទាប់ លើវិស័យបោសសម្អាតមីននៅកម្ពុជា ជាពិសេសការផ្តល់កិច្ចសហការ ដោយផ្ទាល់ជាមួយមជ្ឈមណ្ឌលសកម្មភាពកម្ចាត់មីនកម្ពុជា (ស៊ីម៉ាក់)។
លោកទេសរដ្ឋមន្ត្រី បានស្នើសុំរដ្ឋាភិបាលជប៉ុនបន្តជួយវិស័យបោសសម្អាតមីននៅកម្ពុជា ដើម្បីកម្ពុជាមានលទ្ធភាពសម្រេចបាននូវគោលដៅ កម្ពុជាអស់ការគម្រាមដោយសារមីននៅឆ្នាំ២០២៥។
លោកស្រី សម្តែងនូវការកោតសរសើររដ្ឋាភិបាលកម្ពុជា ដែលមានឆន្ទៈពិតប្រាកដ ក្នុងការបោសសម្អាតគ្រាប់មីន និងយុទ្ធភ័ណ្ឌមិនទាន់ផ្ទុះ និងបានទទួលយកសំណើរបស់កម្ពុជា ដាក់បញ្ចូលទៅក្នុងរបៀបវារៈ សម្រាប់ជជែកពិភាក្សាជាមួយរដ្ឋាភិបាលជប៉ុននៅពេលខាងមុខ៕ ដោយ៖កូឡាប
