ខេត្តមណ្ឌលគិរី៖ សេចក្តីរាយការណ៍ពីប្រជាពលរដ្ឋរស់នៅខេត្តមណ្ឌលគិរី បានឲ្យដឹងថា មានកម្មកជិត១០០នាក់ មកពីខេត្តព្រះវិហារ និងខេត្តសៀមរាប ត្រូវបានគេជួលមកដកបង្គោល ដែលគេបោះលើដីមានទំនាស់មួយកន្លែង ដែលមិនទាន់បានដោះស្រាយតាមផ្លូវច្បាប់ចប់នៅឡើយ។ ហើយត្រូវបានសាលាដំបូងខេត្តមណ្ឌលគិរី ចេញ ដីកាសម្រេចចាត់ចែងជាបណ្តោះអាសន្ន នៅចំណុចភូមិពូទ្រូ ឃុំសែនមនោរម្យ ស្រុកអូររាំង ខេត្តមណ្ឌលគិរី អស់ជាច្រើនបង្គោល។
ហេតុការណ៍នេះ បានកើតឡើងកាលពីព្រឹកថ្ងៃ២៦ ខែវិច្ឆិកា ឆ្នាំ២០១៩ បង្កឲ្យមានការភ្ញាក់ផ្អើលដល់ពលរដ្ឋ នៅមូលដ្ឋានភូមិពូទ្រូ ឃុំសែនមនោរម្យ។
ប្រជាពលរដ្ឋម្នាក់រស់នៅភូមិពូទ្រូម្នាក់ (ស្នើសុំមិនបញ្ចេញឈ្មោះ) បានឲ្យដឹងថា ពួកគាត់ពិតជាមានការភិតភ័យជាខ្លាំង នៅពេលឃើញមានរថយន្តសាំងយ៉ុងចំនួន ៦គ្រឿង ដឹកមនុស្សពេញៗឡានមកចុះនៅភូមិ របស់គាត់ ហើយដើរដកបង្គោលរបងជាច្រើនបង្គោល តាំងពីព្រឹកព្រលឹមស្រាងៗ ថ្ងៃទី២៦ ខែវិច្ឆិកា។
ប្រជាពលរដ្ឋបន្តទៀតថា ពេលដែលឃើញក្រុមមនុស្ស ប្លែកមុខជាច្រើននាក់ បានចុះមកធ្វើសកម្មដើរដកបង្គោលលើដី របស់ពួកគាត់ ថែមទាំងគំរាមមិនឲ្យថតរូបពីសកម្មភាពនោះថែមទៀត ទើបពួកគាត់សម្រេចប្តឹងទៅអាជ្ញាធរ ឲ្យចុះមកសួរនាំ និងទប់ស្កាត់។
ទាក់ទងបញ្ហានេះ មេឃុំសែនមនោរម្យ លោក ស្រី ត្វាន់ ត្រែល បានឲ្យដឹងថា អាជ្ញាធរមូលដ្ឋរបស់លោកស្រី ពុំបានទទួលបានការជូនដំណឹងអំពីសកម្មភាព ដែលកម្មករទាំងនោះ ចុះមកដកបង្គោលរបង របស់ប្រជាពលរដ្ឋក្នុងមូលដ្ឋាននេះទេនៅឡើយទេ។
លោកស្រីបន្តថា កាលពីសប្ដាហ៍មុន ក្នុងជំនួបនៅសាលាឃុំសែនមនោរម្យ ភាគីទំនាស់ដីធ្លីទាំងសងខាង បានបង្ហាញដីការក្សាការពារ មិនឲ្យភាគីខាងណាមួយធ្វើសកម្មភាព ឬអាស្រ័យផលលើដីដែលកំពុងមានទំនាស់ខាងលើនេះទេ។
បញ្ហានេះ លោកស្រីមេឃុំសែនមនោរម្យ បានបង្ហាញការហួសចិត្ត ចំពោះភាគីដែលកំពុងធ្វើសកម្មភាព ចុះដកបង្គោលនៅលើដីទំនាស់ ដោយមិនគោរពដល់អាជ្ញាធរពាក់ព័ន្ទ ជាពិសេសដីកា របស់សាលាដំបូងខេត្តមណ្ឌលគិរី ទាល់តែសោះ។ ក្នុងនោះ ភាគីម្ខាងបានចល័តកម្មកររាប់សិបនាក់ ចេញចូលពីខេត្តមួយទៅខេត្តមួយ ដោយមិនមានការជូនដំណឹងដល់អ្នកគ្រប់គ្រងមូលដ្ឋាន ដែលទង្វើនេះ វាពិតជាធ្វើឲ្យប៉ះពាល់គោលនយោបាយភូមិឃុំមានសុវត្ថិភាពជាខ្លាំង។
ជុំវិញករណីនេះ ក្រុមមេការ ៥នាក់ដែលព្យាយាមបិតបាំងអត្តសញ្ញាណ ដែលគេសង្ស័យថា ជាក្រុមមេការ របស់លោក សាន សូត្រ នៅពេលសមត្ថកិច្ចសួរនាំ អ្នកទាំង៥នាក់ ដែលនាំក្រុមកម្មកមកដលបង្គោលនៅទីតាំងខាងលើ គឺពួកគេមិនបាននិយាយអ្វីជាមួយអាជ្ញាធនោះទេ ដោយឆ្លើយយ៉ាងខ្លីថា ចាំតតាំងគ្នានៅតុលាការ។
យោងតាមខ្លឹមសារ របស់ដីកាសម្រេចចាត់ចែងជាបណ្តោះអាសន្ន លេខ១៥០/១៩/ ថ្ងៃទី៤ ខែកញ្ញា ឆ្នាំ២០១៩ របស់លោកចៅក្រម ទៀង សុថា ចៅក្រមសាលាដំបូងខេត្តមណ្ឌលគិរី បានសម្រេច ហាមឃាត់សហកូនបំណុលឈ្មោះ ថុក ថៃអូន ហៅយាយ អូន ឈ្មោះ ឡាយ ស្រីពៅ និង តតិយជន និងបក្ខពួក របស់ឈ្មោះ ថុក ថៃអូន មិនឲ្យចូលកាន់កាប់ គ្រប់គ្រង់ប្រើប្រាស់អាស្រ័យផលដាំដុះដំណាំគ្រប់ប្រភេទ ភ្ជួររាស់ និងឈូសឆាយ លក់ដូរជួលបញ្ចាំ។ល។ នៅលើដីដែលកំពុងមានទំនាស់មានទំហំ ១៧០ហិកតា នៅចំណុចភូមិ ពូទ្រូ ឃុំ សែនមនោរម្យ ស្រុក អូររាំង ខេត្តមណ្ឌលគិរី ដោយសំអាងហេតុ ពាក្យបណ្ដឹងសុំ ដីកាសម្រេចចាត់ចែងបណ្ដោះអាសន្ន ចុះថ្ងៃទី១១ ខែតុលា ឆ្នាំ២០១៩ របស់មេធាវីឈ្មោះ ឌុច ផារី មានលក្ខណៈត្រឹមត្រូវតាមទម្រង់ មេធាវីការពារតំណាងដោយអាណត្តិឲ្យម្ចាស់បំណុលឈ្មោះ សាន សូត្រ បញ្ជាក់ថា ៖ប្តឹងសុំឲ្យតុលាការចេញ ដីកាសម្រេចចាត់ចែងជាបណ្តោះអាសន្ន ហាមឃាត់មិនឲ្យធ្វើសកម្មភាព និងអាស្រ័យផលលើដីកំពុងមានទំនាស់នោះទេ៕ដោយ៖ដែនសីមា