ខេត្តព្រះសីហនុ៖ ជាថ្មីម្តងទៀត នៅក្នុងសប្តាហ៍នេះ លោកឧកញ៉ា ទៀ វិចិត្រ បានបន្តនាំយកកូនសត្វពង្រូលមួយក្បាលទៀត យកទៅលែង ឲ្យរស់នៅក្នុងព្រៃធម្មជាតិវិញ ក្រោយពេលរូបលោកបានទទួលពីប្រជាពលរដ្ឋម្នាក់។
លោកឧកញ៉ា ទៀ វិចិត្រ មានប្រសាសន៍ថា កូនសត្វពង្រូលនេះមានទម្ងន់ជាង ១គីឡូក្រាម ត្រូវប្រជាពលរដ្ឋទិញបាន រួចនាំយកមកប្រគល់ជូនរូបលោក ដើម្បីយកទៅលែងចូលក្នុងព្រៃ និងព្រែកធម្មជាតិវិញ។
ចំណែកប្រជាពលរដ្ឋ ដែលបានផ្តល់សត្វពង្រូលនោះ ឲ្យដឹងដែរថា ការដែលនាំយកកូនសត្វពង្រូលនេះ មកប្រគល់ជូនលោកឧកញ៉ា ទៀ វិចិត្រ ក៏ដោយសារតែកន្លងមកឃើញសកម្មភាព របស់លោកឧកញ៉ា ទៀ វិចិត្រ ស្រឡាញ់សត្វនិងលែងសត្វព្រៃ ឬសត្វកម្រជាបន្តបន្ទាប់។
ចំពោះលោកឧកញ៉ា ទៀ វិចិត្រ ក្រៅពីបានថ្លែងអំណរគុណដល់ពលរដ្ឋម្នាក់ ដែលបាននាំយកកូនសត្វពង្រូលមកប្រគល់ជូន ដើម្បីនាំយកទៅលែងឲ្យរស់នៅតាមបែបធម្មជាតិវិញ។
បន្ថែមលើសនេះ លោកឧកញ៉ា ទៀ វិចិត្រ ក៏បានអំពាវនាវដល់ប្រជាពលរដ្ឋគ្រប់សហគមន៍ ឲ្យចូលរួមជួយថែរក្សាការពារសត្វព្រៃ ឬសត្វកម្រគ្រប់ប្រភេទ តាមរយៈកុំប្រមាញ់ កុំសម្លាប់ ដើម្បីរួមចំណែកជាមួយសង្គមជាតិ លើការងារថែរក្សាសត្វព្រៃ និងបរិស្ថានធម្មជាតិផងដែរ៕ ដោយ៖ ដែន សីមា