ភ្នំពេញ៖ បន្ទាប់ពីមានការដោះស្រាយនូវផលប៉ះពាល់ជាមួយអាជីវករលក់ដូរ ទាំងផ្សាររដ្ឋ និងឯកជនរួចមក គម្រោងនៃការអភិវឌ្ឍន៍ផ្សារទំនើបសិនជូរីផ្លាហ្សា នៅព្រឹកថ្ងៃទី២៧ ខែវិច្ឆិកានេះ បានសម្រេចបើកការដ្ឋានសាង់សង់ជាផ្លូវការហើយ ក្រោមវត្តមាន លោក ឃួង ស្រេង អភិបាលរាជធានីភ្នំពេញ ដោយមានការចូលរួមពី អ្នកវិនិយោគិនជាតិ អន្តរជាតិ អាជ្ញាធរមូលដ្ឋាន និងបងប្អូនអាជីវករជាច្រើនរយនាក់។
លោកស្រីឧកញ៉ា ចាន់ សុទ្ធា អគ្គនាយិការ ក្រុមហ៊ុនសិនជូរីគ្រុបបានថ្លែងឱ្យដឹងថា ផ្សារទំនើបសិនជូរីផ្លាហ្សា នឹងក្លាយទៅជាមជ្ឈមណ្ឌល ពាណិជ្ជកម្ម ឧស្សាហកម្ម សេវាកម្ម និងទេសចរណ៍ដ៏ធំបំផុតនៅក្នុងរាជធានីភ្នំពេញ ហើយតំបន់នេះក៏នឹងក្លាយទៅជាទីចាប់អារម្មណ៍ខ្លាំងបំផុត របស់ភ្ញៀវទេសចរជាតិ និងអន្តរជាតិ បន្ទាប់ពីផ្សារទំនើបមួយនេះលេចចេញរូបរាងឡើង។ ផ្សារទំនើបសិនជូរីផ្លាហ្សា ផ្តើមសាងសង់រយៈរយពេល២៤ខែ គិតចាប់ពីថ្ងៃសម្ពោធបើកការដ្ឋាននេះទៅ មានកម្ពស់៧ជាន់ ផ្នែកខាងលើ៥ជាន់ និងក្រោមដី២ជាន់។
លោកស្រីឧកញ៉ា ចាន់ សុទ្ធា បានប្តេជ្ញាសម្រេចឱ្យបាននូវការអភិវឌ្ឍន៍ផ្សារទំនើបមួយនេះ ឱ្យរួចរាល់តាមផែនការ ដោយគោរពតាមបទដ្ឋានបច្ចេកទេស និងគោលការណ៍ណែនាំរបស់អាជ្ញាធររាជធានីភ្នំពេញ ក៏ដូចជាក្រសួងស្ថាប័នពាក់ព័ន្ធ ដើម្បីធានាបានថា ផ្សារទំនើបនេះកើតឡើងប្រកបដោយសោភ័ណភាព បរិស្ថាន អនាម័យ និងកម្រិតស្តង់ដារអន្តរជាតិ។
លោកហែម ដារិទ្ធិ អភិបាលនៃគណៈអភិបាលខណ្ឌពោធិ៍សែនជ័យ បានមានប្រសាសន៍ថា ផ្សារសិនជូរីផ្លាហ្សាបច្ចុប្បន្ន មានសភាពចាស់ទ្រុឌទ្រោម ហើយពុំមានអនាម័យ និងបរិស្ថានល្អ ទាំងនៅក្នុងផ្សារ និងជុំវិញបរិវេណផ្សារ ដោយបងប្អូនប្រជាពលរដ្ឋមកលក់ដូរទំនិញគ្រប់ប្រភេទ នៅតាមដងផ្លូវ និងលើចិញ្ចើមផ្លូវ ធ្វើឲ្យបាត់បង់នូវសោភ័ណភាពសណ្តាប់ធ្នាប់ របៀបរៀបរយសាធារណៈ។ ដើម្បីធានាបានក្នុងការគ្រប់គ្រងការលើកស្ទួយសោភ័ណភាពអនាម័យ បរិស្ថានល្អ នៅក្នុងផ្សារ និងជុំវិញផ្សារ ក្រុមហ៊ុនសិនជូរីបានធ្វើការវិនិយោគ ដោយសាងសង់ផ្សារទំនើប។
លោកបានបញ្ជាក់ថា គម្រោងសាសង់ផ្សារទំនើបសិនជូរីផ្លាហ្សា មានរយៈពេល២៤ខែ គិតចាប់ពីថ្ងៃបើកការដ្ឋាន ដែលមានកម្ពស់៧ជាន់ នៅផ្នែកខាងលើមាន៥ជាន់ និងជាន់ក្រោមដី២ជាន់។
ក្រុមហ៊ុន នឹងរៀបចំទីតាំងផ្សារ សម្រាប់អាជីវករ ចូលមកធ្វើអាជីវកម្មវិញនៅជាន់ GF-1 បែងចែកតូបតាមប្រភេទអាជីវកម្ម សរុបចំនួន៦៧៩តូប ក្នុងនោះ តូបគ្រប់គ្រងដោយរដ្ឋចំនួន៣៥០តូប និងតូបគ្រប់គ្រងដោយឯកជនចំនួន៣២៩តូប។
នាឱកាសនោះ លោក ឃួង ស្រេង ក៏បានស្នើឱ្យអាជីវករនិងប្រជាពលរដ្ឋមានការអធ្យាស្រ័យ និងយោគយល់ ចំពោះដំណើរការអនុវត្តគម្រោងសាងសង់នេះ ដើម្បីឱ្យសម្រេចបានតាមផែនការដែលបានគ្រោងទុក និងស្នើឱ្យអាជ្ញាមូលដ្ឋាន និងអ្នកពាក់ព័ន្ធសហការគ្នា សម្រួលរាល់ផលប៉ះពាល់ និងការងារចាំបាច់នានា របស់ក្រុមហ៊ុន និង អ្នករស់នៅជុំវិញបរិវេណផ្សារនេះ។ លោកក៏បានជំរុញឱ្យក្រុមហ៊ុនទទួលការសាងសង់ គោរពឱ្យតាមលក្ខខណ្ឌបច្ចេកទេស ដោយគិតទៅលើគុណភាព សុវត្ថិភាព សោភ័ណភាព និងបរិស្ថាន នៃរាជធានីទាំងក្នុងពេលបច្ចុប្បន្ននិងទៅថ្ងៃអនាគត។
បន្ថែមពីនេះ លោក អភិបាល សុំឱ្យប្រជាពលរដ្ឋជឿជាក់ មកលើរាជរដ្ឋាភិបាល ពិសេសការដឹកនាំដ៏វៃឆ្លាតរបស់សម្តេចតេជោ ដែលដឹកនាំប្រទេសឱ្យមានការអភិវឌ្ឍន៍រីកចម្រើនឥតឈប់ឈរលើគ្រប់វិស័យ ហើយបាននាំនាវាកម្ពុជា ឱ្យសម្រេចបាននូវគោលដៅមួយ គឺស្មើមុខស្មើមាត់ ជាមួយបណ្តាប្រទេស នៅក្នុងតំបន់ និងពិភពលោក។
លោកឃួង ស្រេង បានបញ្ជាក់ទៀតថា ចំពោះអាជីវករដែលបាននិងកំពុង លក់ដូរនៅក្នុងសិនជូរីផ្លាផ្សារបណ្ដោះអាសន្នដែលមានទីតាំងនៅលើសួនច្បារកុមារពោធិចិនតុងនោះ រដ្ឋបាលរាជធានីភ្នំពេញ ជាអ្នករៀបចំតបណ្ដាញទឹក តភ្លើង ឱ្យដោយមិនគិតប្រាក់។ ប៉ុន្តែចំពោះការផ្ដល់សេវាប្រចាំខែ ទៅលើទឹក ភ្លើងនេះ អាជីវករជាអ្នកបង់ខ្លួនឯង៕ដោយ៖កូឡាប
