កំពង់ស្ពឺ៖ រដ្ឋមន្ត្រីក្រសួងធនធានទឹក បានថ្លែងថា យោងតាមសារាចរណែនាំ លេខ១១ សរណន ចុះថ្ងៃទី២១ ខែវិច្ឆិកា ឆ្នាំ២០១៩ របស់រាជរដ្ឋាភិបាល ស្ដីពីការចាត់វិធានការថែរក្សាទឹកទុក បានណែនាំឲ្យក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ត្រូវចូលរូបចាត់វិធានការថែរក្សាទឹកទុកឲ្យបានល្អ ដើម្បីផ្គត់ផ្គង់សម្រាប់តែការប្រើប្រាស់ប្រចាំថ្ងៃតែប៉ុណ្ណោះ រហូតដល់ពេលមានភ្លៀងធ្លាក់ល្អប្រសើរឡើងវិញ ។
នាព្រឹកថ្ងៃទី២៨ ខែវិច្ឆិកា ឆ្នាំ២០១៩ រដ្ឋបាលខេត្តកំពង់ស្ពឺ សហការជាមួយមន្ទីរធនធានទឹក និងឧតុនិយមខេត្ត បានរៀបចំកិច្ចប្រជុំផ្សព្វផ្សាយសារាចរណែនាំ លេខ១១ សរណន ចុះថ្ងៃទី២១ ខែវិច្ឆិកា ឆ្នាំ២០១៩ របស់រាជរដ្ឋាភិបាល ស្ដីពីការចាត់វិធានការថែរក្សាទឹកទុក ក្រោមអធិបតីភាពលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម និងលោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ ។
លោក វ៉ី សំណាង អភិបាល នៃគណៈអភិបាលខេត្ត បានលើកឡើងថា អាស្រ័យដោយភូមិសាស្ត្រ និងលក្ខណៈពិសេសរបស់ខេត្តស្ទើរតែជារៀងរាល់ឆ្នាំ គ្រោះទឹកជំនន់ និងគ្រោះរាំងស្ញួតបានគំរាមកំហែងជាបន្តបន្ទាប់ ជាពិសេសក្នុងឆ្នាំ ២០១៨ កន្លងទៅត្រូវជួបប្រទះគ្រោះទឹកជំនន់ចំនួន ៣ លើក ធ្វើឱ្យខូចខាតផលដំណាំចំនួន ៤.៦០០ ហិកតា និងគ្រោះរាំងស្ងួតចំនួន ១ លើក នៅក្នុងស្រុកសំរោងទងចំនួន ៥ ឃុំ និងស្រុកគងពិសីចំនួន ១ ឃុំ ដែលធ្វើឱ្យប៉ះពាល់ដល់សំណាប សន្ទូង និងផលដំណាំផ្សេងៗរបស់ប្រជាកសិករ ហើយបានជះឥទ្ធិពល ដល់ជីវភាពប្រចាំថ្ងៃរបស់ប្រជារាស្រ្តយើងថែមទៀតផង។
លោកបានបន្តទៀតថា ដោយឡែកក្នុងឆ្នាំ២០១៩ នេះគិតមកដល់បច្ចុប្បន្នកម្រិតទឹកភ្លៀង ជាមធ្យមទូទាំងខេត្តមានកម្ពស់១០១០,៣ មិល្លីម៉ែត្រ បើប្រៀបធៀបរយៈពេលដូចគ្នានៅឆ្នាំ ២០១៨ ទាបជាងចំនួន ២៨៩,៩ មិល្លីម៉ែត្រ ស្រុកដែលទទួលទឹកភ្លៀងតិចជាងគេមានស្រុកគងពិសី ឯក្រុង ស្រុកចំនួន ៧ ទៀត បានទទួលទឹកភ្លៀងជាមធ្យម ។ ឆ្នាំនេះការងារបង្កបង្កើនផលស្រូវរដូវវស្សា ត្រូវជួបការលំបាក និងយឺតយ៉ាវបន្តិចមែន ប៉ុន្តែយើងនូវតែអនុវត្តបានចំនួន ១១៤.៩៩៤ ហិកតា ស្មើនឹង១០១,២៣% នៃផែនការ ១១៣.៦០០ ហិកតា លើសផែនការចំនួន ១,២៣% ។ ហើយសម្រាប់ការងារប្រមូលផលស្រូវស្រាល និងស្រូវកណ្តាល យើងទើបតែនឹងអនុវត្តបានចំនួន ១១.០៩១ ហិកតា ស្មើនឹង ៩,៦៤% តែប៉ុណ្ណោះ ។ ហើយសង្ឃឹមថានូវប៉ុន្មានថ្ងៃខាងមុខនេះ យើងនឹងខិតខំធ្វើឱ្យសម្រេចបានទៅតាមផែនការ ។ កន្លងមកយើងតែងជួបបញ្ហាប្រឈមទឹកជំនន់ និងគ្រោះរាំងស្ងួតជារឿយៗ ដែលទឹកជំនន់ទឹកភ្លៀង តែងតែកើតមាននូវពាក់កណ្តាលខែតុលា ដល់ពាក់កណ្តាលខែវិច្ឆិកា នៅតាមតំបន់ក្បែរៗស្ទឹងមានរយៈពេលខ្លី មិនបង្កការខូចខាតធ្ងន់ធ្ងរដល់ដំណាំកសិកម្មឡើយ ។ ហើយគ្រោះរាំងស្ងួតតែងតែជួបប្រទះជារៀងរាល់ឆ្នាំ (កូនរដូវប្រាំងតែងកើតមានចន្លោះពីពាក់កណ្តាលខែកក្កដា ដល់ពាកកណ្តាលខែកញ្ញា) មានស្រុកបីគឺ ស្រុកគងពិសី ស្រុកសំរោងទង ស្រុកភ្នំស្រួច សម្រាប់ឆ្នាំ២០១៩នេះ បរិមាណទឹកភ្លៀងបានតែប្រមាណ ៩០០ មិល្លីម៉ែត្រ បង្កឲ្យមានផលប៉ះពាល់ដល់ស្រូវប្រមាណពី ៧-៨ %។
ទន្ទឹមនឹងនេះដែរ ស្ថិតក្នុងស្ថានភាពការលំបាក់នេះ ដោយមានជួយឧបត្ថម្ភជ្រោមជ្រែង ពីក្រសួងធនធានទឹក និងឧតុនិយម ព្រមទាំងមន្ទីរធនធានទឹក និងឧតុនិយមខេត្តកំពង់ស្ពឺ បានខិតខំប្រឹងប្រែងបូមទឹកជួយអន្តរាគមន៍សង្គ្រោះស្រូវរដូវវស្សាឆ្នាំ ២០១៩ នេះនៅទូទាំង ០៨ ក្រុង ស្រុក ដែលជួបប្រទះគ្រោះរាំងស្ងួតសរុបបានចំនួន ៣.៤១៦ ហិកតា។
លោក លឹម គានហោ រដ្ឋមន្ត្រីក្រសួងធនធានទឹកនិងឧតុនិយម មានលើកឡើងថា យោងតាមការព្យាករ ក៏ដូចជាស្ថានភាពជាក់ស្តែងបានបង្ហាញយ៉ាងច្បាស់ថាក្នុងឆ្នាំ ២០១៩ នៃព្រះរាជាណាចក្រកម្ពុជា ក៏ដូចជាបណ្តាប្រទេសក្នុងតំបន់ បានទទួលរងឥទ្ធិពលយ៉ាងធ្ងន់ធ្ងរពីបាតុភូត អែលនីណូ (El Nino) ដោយបានបង្កឲ្យមានកត្តាអវិជ្ជមានជាច្រើន ដូចជាធាតុអាកាសមានសភាពក្តៅហួតហែងខ្លាំង រដូវវស្សាមកដល់មានសភាពយឺតយ៉ាវ របាយទឹកភ្លៀងមានភាពរអាក់រអួលមិនស្មើគ្នា របបទឹកទន្លេមេគង្គ មានការប្រែប្រួលខ្លាំងពិសេសជំនន់ មានតែមួយលើក ហើយបន្ទាប់មក ក៏បានស្រកចុះជាបន្តបន្ទាប់ដល់កម្រិតទាបបំផុតមួយ ដែលមិនធ្លាប់ជួបប្រទះក្នុងរយៈកាលកន្លងមក។ បើទោះបី ជាចាប់ពីខែកក្កដា ឆ្នាំ ២០១៩ បាតុភូត អែលនីណូ បានថមថយឥទ្ធិពលជាបណ្តើរៗ ទន្ទឹមនឹងអាងទឹក នាពេកកន្លង មកបានរក្សាទឹកទុកស្ទើរតែ១០០ភាគរយ ក្នុងក្របខ័ណ្ឌទូទាំងប្រទេស យ៉ាងណាក្តីបញ្ហាគ្រប់គ្រង និងប្រើប្រាស់ទឹកនៅតែត្រូវបានចាត់ទុកជាអាទិភាព ដើម្បីបម្រើឲ្យស្រូវធ្ងន់ចុងរដូវវស្សា និងស្រូវរដូវប្រាំ) ២០១៩ -២០២០ និង ការប្រើប្រាស់ប្រចាំថ្ងៃរហូតដល់មានភ្លៀងកក់ខែនាឆ្នាំថ្មីបន្ត ។
សូមបញ្ជាក់ផងដែរថា យោងតាមស្ថានភាពដូចបានជម្រាបជូនខាងលើ រាជរដ្ឋាភិបាលសូមធ្វើការណែនាំដូចខាងក្រោម ៖
១- ការងារបង្កបង្កើនផលស្រូវប្រាំងក្នុងឆ្នាំ ២០១៩-២០២០ គឺអាចធ្វើបានតែ១ដង ប៉ុណ្ណោះដោយមិនអាចធ្វើស្រូវប្រាំងលើកទី២ បានទេ បើទោះបីជាទឹកនៅតាមបណ្តាអាង ដែលបានរក្សាទុកនិងកន្លែងមួយចំនួន ដែលមានទឹកជាធម្មជាតិក៏ដោយ គួរគប្បីរក្សាទឹកទាំងនោះទុកសម្រាប់ប្រើប្រាស់ប្រចាំថ្ងៃ និងការដាំដំណាំរួមផ្សំផ្សេងទៀតក្រៅពីស្រូវ ។
២- ក្រសួង ស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ ត្រូវចូលរូបចាត់វិធានការថែរក្សាទឹកទុកឲ្យបានល្អ ដើម្បីផ្គត់ផ្គង់សម្រាប់តែការប្រើប្រាស់ប្រចាំថ្ងៃតែប៉ុណ្ណោះ រហូតដល់ពេលមានភ្លៀងធ្លាក់ល្អប្រសើរឡើងវិញ ៕ដោយ៖កូឡាប
