ក្រុមអ្នកតវ៉ាមួយក្រុមក្នុងប្រទេសអ៊ីរ៉ាក់ បានដុតស្ថានកុងស៊ុលរបស់អ៊ីរ៉ង នៅភាគខាងត្បូងទីក្រុង Najaf ក្រោយពេលមានការតវ៉ាប្រឆាំងនឹងរដ្ឋាភិបាល។
អ្នកតវ៉ាបានស្រែកថា “អ៊ីរ៉ងចេញពីប្រទេសអ៊ីរ៉ាក់ទៅ” ខណៈពេលដែលភ្លើងកំពុងតែឆាបឆេះអគារស្ថានកុងស៊ុលរបស់អ៊ីរ៉ង។
សេចក្តីរាយការណ៍បានឲ្យដឹងថា បុគ្គលិកនៅស្ថានកុងស៊ុលនោះបានរត់ចេញ មុនពេលក្រុមអ្នកតវ៉ាបានទម្លុះចូលក្នុងអគារ។
នេះគឺជាការវាយប្រហារជាលើកទី ២ ហើយទៅលើស្ថានកុងស៊ុលរបស់ប្រទេសអ៊ីរ៉ង នៅក្នុងប្រទេសអ៊ីរ៉ាក់ក្នុងខែនេះ។
មនុស្សយ៉ាងតិចណាស់ចំនួន ៣៤៤បានស្លាប់ក្នុងភាពចលាចល ដែលអូសបន្លាយអស់រយៈពេលជិត ២ខែមកហើយ។
អ្នកតវ៉ាទាមទារឲ្យមានការបញ្ចប់អំពើពុករលួយ បង្កើតការងារឲ្យបានច្រើន និងផ្តល់សេវាសាធារណៈឲ្យបានល្អ ដែលអំពើទាំងនោះកំពុងតែញាំញី ដល់ភាគខាងត្បូងប្រទេសអ៊ីរ៉ាក់ និងរដ្ឋធានីបាដាដ។
ក្រុមអ្នកតវ៉ា បានចោទប្រកាន់ប្រទេសអ៊ីរ៉ងថា បានជ្រៀតជ្រែកចូលកិច្ចការផ្ទៃក្នុងរបស់ប្រទេសអ៊ីរ៉ាក់ និងបានគាំទ្ររដ្ឋាភិបាលអ៊ីរ៉ាក់។
តើមានអ្វីកើឡើងទៅលើស្ថានកុងស៊ុលអ៊ីរ៉ង?
ក្រុមអ្នកតវ៉ាបានសម្រុកចូលអគារកុងស៊ុល និងបានដុតភ្លើង ទោះបីយ៉ាងមានការហាមឃាត់ពីប៉ូលីសក៏ដោយ។
អ៊ីរ៉ង ដែលគាំទ្ររដ្ឋាភិបាលអ៊ីរ៉ាក់ និងក្រុមមនុស្សមានឥទ្ធិពលដទៃទៀត ដែលកាលពីគ្រាមុន បានជំរុញឲ្យអ្នកតវ៉ាស្វែងរកការផ្លាស់ប្តូរតាមរយៈរចនាសម្ព័ន្ធផ្លូវច្បាប់។
អ៊ីរ៉ងក៏បានចោទប្រកាន់ប្រទេសភាគខាងលិចថា បានធ្វើឲ្យរីករាលដាលភាពចលាចលក្នុងប្រទេសអ៊ីរ៉ង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC