ខេត្តព្រះសីហនុ៖ កម្លាំងមូលដ្ឋានកងរាជអាវុធហត្ថក្រុងព្រះសីហនុ បើកយុទ្ធនាការក្តៅចុះបង្រ្កាបមុខសញ្ញាក្រុមចោរឆក់កាបូប ដោតចាប់ឃាត់ខ្លួនជនសង្ស័យចំនួន ៣នាក់។
លោក ហ៊ត សីហា មេបញ្ជាការមូលដ្ឋានកងរាជអាវុធហត្ថក្រុងព្រះសីហនុ បានឲ្យដឹងថា កាលពីម៉ោង១៣ និង១៥នាទី រសៀលថ្ងៃទី២៧ ខែវិច្ឆិកា ឆ្នាំ២០១៩ មានករណីបទល្មើសឆក់កាបូប តាមដងផ្លូវ ត្រង់ចំណុចហ្គារ៉ាស់សាំងតូតាល់ឃ្លាំងលើ ស្ថិតក្នុងភូមិ១ សង្កាត់លេខ១ ក្រុងព្រះសីហនុ ខេត្តព្រះសីហនុ។
លោក ហ៊ត សីហា បន្តថា ក្រោយពីទទួលបានព័ត៌មានបទបញ្ជាពីលោក ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុភ្លាម លោក ហ៊ត សីហា ក៏បានបញ្ជាដល់កម្លាំងជំនាញ សហការជាមួយកម្លាំងឈរជើងប្រចាំការតាមគោលដៅក្នុងភូមិសាស្រ្តក្រុង ចេញអន្តរាគមន៍កំណត់មុខសញ្ញារហូតឈានដល់ការឃាត់ជនសង្ស័យបានចំនួន១នាក់។ លុះដល់ម៉ោង ១៣ និង២៥នាទី ថ្ងៃខែឆ្នាំដដែល កម្លាំងបានបន្តស្រាវជ្រាវ ពួនស្ទាក់ឃាត់ខ្លួនបក្ខពួកជនសង្ស័យបានចំនួន២នាក់ទៀត នៅចំណុចក្រោយមន្ទីរឧស្សាហកម្ម និងសិប្បកម្មឃ្លាំងលើ ស្ថិតក្នុងភូមិ២ សង្កាត់១ ក្រុងព្រះសីហនុ ខេត្តព្រះសីហនុ។
លោក ហ៊ត សីហា បញ្ជាក់ថា ជនរងគ្រោះ ដែលត្រូវចោរឆក់កាបូបឈ្មោះ សីង លីងលី ភេទស្រី ឆ្នាំកំណើត ១៩.១០.១៩៧១ ជនជាតិចិន កាន់អត្តសញ្ញាណប័ណ្ណជនជាតិចិនលេខ: ៣៣២៦០១១៩៧១១០១៩២៧២៨។
ចំណែកជនសង្ស័យមានឈ្មោះ៖
១- ឈ្មោះ ហ៊ាន វិសាល ភេទប្រុស អាយុ១៩ឆ្នាំ មុខរបរ មិនពិតប្រាកដ មានទីលំនៅមិនពិតប្រាកដ។
២- ឈ្មោះ ហែម សុខលី ភេទប្រុស អាយុ២០ឆ្នាំ មុខរបរ មិនពិតប្រាកដ មានទីលំនៅ ភូមិចំការអណ្តូង ឃុំចំការអណ្តូង ស្រុកចំការលើ ខេត្តកំពង់ចាម។
៣- ឈ្មោះ ខា បញ្ញា ភេទប្រុស អាយុ២១ឆ្នាំ មុខរបរ មិនពិតប្រាកដ មានស្រុកកំណើត ភូមិជួរ ឃុំកោះពីរ ស្រុកក្រូចឆ្មា ខេត្តត្បូងឃ្មុំ។
ចំពោះវត្ថុតាងដកហូតបានរួមមាន ៖
១- ម៉ូតូម៉ាក Honda C-១២៥ សេរី២០២០ ពណ៌ក្រហម អត់មានផ្លាកលេខ ចំនួន ១គ្រឿង
២- ម៉ូតូម៉ាក Honda C-១២៥ ស៊េរីឆ្នាំផលិត២០១៩ ពណ៌ខ្មៅ ពាក់ផ្លាកលេខភ្នំពេញ ១FW-៩៥៧៥ ចំនួន០១គ្រឿង
៣- ទូរស័ព្ទដៃ ចំនួន៣គ្រឿង
៤- នាឡិកា ចំនួន០៣គ្រឿង
៥- ជញ្ជៀនលោហ:ធាតុពណ៌លឿង ចំនួន០២វង់
៦- លុយ ចំនួន៣០,០០០រៀល
៧- កាតក្រីម៉ូតូ ចំនួន០១សន្លឹក
៨- អត្តសញ្ញាណប័ណ្ណជនជាតិចិន ចំនួន ០២សន្លឹក
៩- កាបូបដៃ ចំនួន០២
បច្ចុប្បន្នជនសង្ស័យ រួមនឹងវត្ថុតាង ត្រូវបានបញ្ជូនទៅកាន់បញ្ជាការដ្ឋាន កងរាជអាវុធហត្ថខេត្តព្រះសីហនុ ដើម្បីកសាងសំណុំរឿងបន្តអនុវត្តនីតិវិធីច្បាប់៕ ដោយ៖ ដែន សីមា