ភ្នំពេញ ៖ អាជ្ញាធរ បង្កើតតំបន់ថ្មីមួយ ដែលមានទំហំដីប្រមាណ៤០ហិកតា ក្នុងភូមិដំបូកកកោះ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ដើម្បីឲ្យអ្នកដែលត្រូវបម្លាស់ទីចេញពីដងទន្លេ ចូលទៅរស់នៅ។ ការបម្លាស់ទីនេះ បង្កឲ្យមានមានរិះគន់ខ្លាំងលើបណ្តាញសង្គមនានាថា អាជ្ញាធរខ្មែរ កាត់ដីឲ្យជនជាតិវៀតណាម ដ្បិតថា អ្នកដែលត្រូវបម្លាស់ទីចេញពីទន្លេ គឺជាជនជាតិវៀតណាម។
ករណីខាងលើនេះ នៅថ្ងៃទី ២៨ ខែ វិច្ឆិកា ឆ្នាំ ២០១៩ នេះសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ បានបើកកិច្ចប្រជុំប្រចាំខែរបស់ខ្លួន នៅវិមានសន្តិភាព ទីស្ដីការនាយករដ្ឋមន្ត្រី។
នៅថ្ងៃនេះដែរ លោក សុខសុវណ្ណ វឌ្ឍនាសាប៊ុង ហៅ វិល្លាម ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សា បាន លើកយកបញ្ហាការរិះគន់ និងការបញ្ចេញមតិរបស់ពលរដ្ឋពាក់ព័ន្ធនឹងការជួលដី៤០ ហិកតា ដល់ការបន្លាស់ទីរបស់អន្តោប្រវេសន៍វៀតណាម ពីលើទឹក មកគោក ហើយបញ្ហានេះដែរ លោក ក៏ធ្លាប់បានជំរុញឲ្យបណ្ដេញចេញ ចំពោះជនអន្តោប្រវេសន៍វៀតណាម ដែលត្រៀមប្ដូរទីលំនៅពីទឹកមកគោកនេះកាលពីឆ្នាំ២០១៨កន្លងទៅ ។
នេះបើតាមលោកបានឲ្យដឹងថា “ខ្ញុំបានពាំនាំ ការរិះគន់នឹងការបញ្ចេញមតិរបស់ពលរដ្ឋ ពាក់ព័ន្ធនឹងគោលការណ៍របស់រដ្ឋបាលខេត្តកំពង់ឆ្នាំង ដែលបន្លាស់ទីជនអន្តោប្រវេសន៍វៀតណាម (ភាគច្រើន) សរុបប្រមាណ ២៣៩៧ គ្រួសារ និងមានជនជាតិខ្មែរយើងរួមទាំងឥស្លាមមួយចំនួនផង ពីការរស់នៅតាមដងទន្លេសាប មករស់នៅលើគោកក្នុងលក្ខណៈជួលដី ៤០ហិកតា ព្រោះយ៉ាងណាមិញ ករណីនេះ យើងខ្ញុំធ្លាប់បានផ្ដល់យោបល់ជូនរាជរដ្ឋាភិបាលរួចហើយតាំងពីឆ្នាំ២០១៨ ដោយផ្ដោតលើការអនុវត្តន៍ច្បាប់អន្តោប្រវេសន៍ លើជនទាំងនោះ ប្រសើរជាងផ្ដល់ទីតាំងរស់នៅ ។”
លោក បានបញ្ជាក់ថា ជាពិសេសថ្មីៗនេះ យើងក៏បានពិនិត្យ ជនជាតិវៀតណាម គេមានដីដែលសមាគមគេបានជួលឲ្យនៅ ដោយឡែកពលរដ្ឋខ្មែរដែលបានជម្លៀសពីលើទឹកមកលើដីនោះ ពុំទាន់ទទួលបានការចាត់ចែង ផ្ដល់ទីតាំងដីសម្រាប់ពួកគាត់ ចប់សព្វគ្រប់នៅឡើយទេ។
លោកក៏បានគូសបញ្ជាក់ថា មានករណីមួយចំនួនខ្ញុំបានចូលរួមតាមដាន និងធ្វើរួចរាល់ហើយ ក្នុងករណីមិនទាន់ទទួល បានលទ្ធផលយើងខ្ញុំក៏បន្តតាមដាន និងលើកយកមកជជែករកដំណោះស្រាយ តាមដំណាក់កាល ជាពិសេសកិច្ចការទាំងអស់គឺ ផ្អែកលើមូលដ្ឋានច្បាប់ បទដ្ឋានគតិយុត្ត និងលក្ខណៈវិទ្យាសាស្ត្រ ដើម្បីចូលរួមការពារឲ្យបាននូវផលប្រយោជន៍ជាតិ និងប្រជាជនទូទៅ ។
ជារួមឈរលើគោលការណ៍ ដែលបានដាក់ចេញគឺ នៅជាមួយពលរដ្ឋ បម្រើពលរដ្ឋ ដើម្បីពលរដ្ឋ យើងខ្ញុំតែងតែចូលរួមលើករាល់បញ្ហាសង្គមទូទៅ ដែលពលរដ្ឋលោកសម្ដែងការមិនពេញចិត្តយកទៅជជែករកដំណោះស្រាយជានិច្ច។
លោក ស៊ុន សុវណ្ណរិទ្ធិ អភិបាលរងខេត្តកំពង់ឆ្នាំង និងជាប្រធានគណៈកម្មការរៀបចំការបម្លាស់ទី បានប្រាប់សារព័ត៌មានក្នុងស្រុក នាថ្ងៃទី២៦ ខែវិច្ឆិកា ឆ្នាំ២០១៩ នេះថា ការរិះគន់នេះ គឺមិនត្រឹមត្រូវឡើយ។ កុំឲ្យសាធារណជនយល់ច្រឡំ លោកអភិបាលរង បកស្រាយថា តាមពិត អ្នក ដែលត្រូវបម្លាស់ចេញពីទន្លេ ឲ្យទៅរស់នៅលើគោក មិនមែនមានតែវៀតណាមនោះទេ គឺមានទាំងខ្មែរ និងខ្មែរ-អិស្លាម ដែលសរុបទាំងអស់មានប្រមាណ៤ពាន់គ្រួសារ។ លោក មិនហៅថា បម្លាស់ទីជនជាតិវៀតណាមទេ លោក ហៅថា បម្លាស់ទីផ្ទះលើទឹក។ ប្រជាជនទាំងនោះ ត្រូវបានបម្លាស់ចេញពីគោលដៅចំនួន៦ នៅលើដងទន្លេ ហើយយកទៅរស់នៅជាមួយគ្នាជាសហគមន៍ ក្នុងតំបន់ថ្មីខាងលើ។ ប្រជាជនមកពីគោលដៅទាំង៦នោះ បើគិតជារួម ប្រជាជនខ្មែរ និងខ្មែរ-អ៊ិស្លាម មានច្រើនជាងវៀតណាម តែបើគិតជាគោលដៅនីមួយៗវិញ មានគោលដៅខ្លះ វៀតណាម មានច្រើនជាង។
លោក ស៊ុន សុវណ្ណារិទ្ធ បានឲ្យដឹងថា ដោយអនុវត្តតាមផែនការបម្លាស់ទីផ្ទះបណ្តែតទឹក កន្លងមកតាមសំណើររបស់អាជ្ញាធរខេត្ត ប្រមុខរាជរដ្ឋាភិបាលបានធ្វើអនុប្រយោគកាត់ដីលិច ទឹកនៅភូមិដំបូកកកោះ ឃុំស្វាយជ្រុំ ចំនួន ៤០ហិកតាប្រគល់ឲ្យអាជ្ញាធរខេត្ត រៀបចំទីតាំងភូមិថ្មីមួយ សម្រាប់ផ្តល់ដីជូនប្រជាពលរដ្ឋបម្លាស់ទីផ្ទះបណ្តែតទឹកជាង២ ពាន់គ្រួសារ មានខ្មែរ វៀតណាម និងឥស្លាមនៅក្នុងក្រុងកំពង់ឆ្នាំង ភាគច្រើនគឺជនជាតិវៀតណាមឲ្យឡើងមករស់នៅលើគោកវិញ។ មកដល់ពេលនេះ មានប្រជាពលរដ្ឋប្រមាណ ៨០%ហើយបានអូសបង្គឿងផ្ទះទឹករបស់ខ្លួន រស់នៅលើខ្នងកោះចំការជាប់មាត់ទន្លេក្នុងភូមិទី៧ សង្កាត់ខ្សាម ក្រុងកំពង់ ឆ្នាំង ជាង១ឆ្នាំមកហើយ។ ដោយឡែកនៅក្នុងទន្លេគឺមានផ្ទះទឹក ដែលមានបែរចិញ្ចឹមត្រីនៅពីក្រោមជាង២០០ខ្នងទៀត តាមផែនការតម្រូវឲ្យអ្នករស់នៅលើបែត្រីទាំងអស់នោះឡើង មករស់នៅលើគោកវិញ គឺអនុញ្ញាតឲ្យទុកបែត្រីចិញ្ចឹមនៅក្នុងទន្លេ តែត្រូវរុះដំបូលចេញ និងបង្គន់អនាម័យចេញផងដែរ៕ដោយ៖កូឡាប
