សាកសពកូនឆ្កែមួយក្បាលត្រូវបានអ្នកវិទ្យាសាស្រ្តរកឃើញ ហើយទម្រង់ខ្លួនវានៅរក្សាបានយ៉ាងល្អឥតខ្ជោះ ដែលធ្វើឲ្យអ្នកវិទ្យាសាស្រ្តមានការឆ្ងល់យ៉ាងខ្លាំង។
សាកសពកូនឆ្កែនោះមានអាយុកាល ១៨.០០០ឆ្នាំ។ វាត្រូវបានរកឃើញដោយអ្នកវិទ្យាសាស្រ្តរុស្សីនៅទីក្រុង Yakutsk ស្ថិតនៅភាគខាងកើតតំបន់ស៊ីបេរី។ រោម ច្រមុះ និងធ្មេញរបស់វាត្រូវបានរក្សាយ៉ាងល្អ។
ដោយប្រើប្រាស់កាបូន ដើម្បីកំណត់អាយុកាលរបស់វា អ្នកជំនាញ់មកពីវិទ្យាស្ថានសិក្សាពីហ្សែនេតិចរបស់ប្រទេសស៊ុយអ៊ែត អាចបញ្ជាក់បានថា សាកសពរបស់កូនឆ្កែនោះបានកកអស់រយៈពេល ១៨.០០០ឆ្នាំមកហើយ។ ប៉ុន្តែការពិនិត្យលើ DNA មិនទាន់អាចបញ្ជាក់បានទេថា តើវាគឺជាអំបូរចចក ឬឆ្កែ។
ឆ្កែស្រុកនៅសម័យបច្ចុប្បន្ន ត្រូវបានគេគិតថា ផ្សាំងចេញពីឆ្កែចចក ប៉ុន្តែគេមិនច្បាស់ថានៅពេលណានោះទេ ប៉ុន្តែកាលពីឆ្នាំ ២០១៧ ការសិក្សាមួយដែលបានចុះផ្សាយនៅលើទស្សនាវដ្តីទំនាក់ទំនងធម្មជាតិ បានរកឃើញថា ឆ្កែសម័យទំនើបបច្ចុប្បន្ន ត្រូវបានគេផ្សាំងចេញពីពួកឆ្កែចចក ពី ២០.០០០ ទៅ ៤០.០០០ឆ្នាំមកហើយ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
