ខេត្តព្រះសីហនុ៖ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានដឹកនាំមន្ត្រីស្ថាប័នពាក់ព័ន្ធបន្តចុះពិនិត្យការស្ថាបនាផ្លូវមួយចំនួន ដែលស្ថិតក្នុងគម្រោង ផ្លូវត្រូវស្ថាបនាចំនួន៣៤ខ្សែ ក្នុងមូលដ្ឋានក្រុងព្រះសីហនុ។
ដំណើរចុះពិនិត្យផ្លូវខាងលើនេះ ធ្វើឡើង នៅព្រឹកថ្ងៃទី២៨ ខែវិច្ឆិកា ឆ្នាំ២០១៩នេះ។
ការចុះពិនិត្យផ្លូវទាំងនោះរួមមាន៖ ផ្លូវក្រវ៉ាត់ក្រុង ចេញពីព្រលានយន្តហោះអន្តរជាតិខេត្តព្រះសីហនុ ស្ថិតក្នុងឃុំរាម ស្រុកព្រៃនប់ ឆ្ពោះទៅកាន់ឆ្នេររាម។
បន្ថែមលើនេះ លោក ជា សុផារ៉ា ក៏បានបន្តដំណើរចុះទៅពិនិត្យការស្ថាបនាផ្លូវ ភ្នំជំទាវម៉ៅ ចូលមកក្រុងព្រះសីហនុថែមទៀតផង។
នាឱកាសចុះពិនិត្យការស្ថាបនាផ្លូវនោះ របស់ លោក ជា សុផារ៉ា កាលពីព្រឹកថ្ងៃទី២៨ ខែវិច្ឆិកានេះ ក៏ឃើញវត្តមាន លោក យស ឆោមណារ៉ាឌី រដ្ឋលេខាធិការក្រសួងរៀបចំដែនដី, លោក គួច ចំរើន អភិបាលខេត្តព្រះសីហនុ និងមន្ត្រីមន្ទីរជំនាញមួយចំនួនទៀត បានចូលរួមអមដំណើរ លោក ជា សុផារ៉ា ផងដែរ៕ ដោយ៖ ដែន សីមា
