ខេត្តព្រះសីហនុ៖ ក្រុមការងារក្រុមហ៊ុន ជី.ធី.វី.ស៊ី, ស្ពីដបូត កម្ពុជា (G.T.V.C, SPEED BOAT) របស់លោកឧកញ៉ា ទៀ វិចិត្រ បានបន្តចេញអូប័រល្បឿនលឿន និងបុគ្គលិកជំនាញ ទៅជួយសង្គ្រោះជនជាតិរុស្សីចំនួន ២នាក់ ដែលរងគ្រោះលិចទូកក្ដោងនៅក្នុងលំហសមុទ្រ ឲ្យរួចផុតពីសេចក្តីស្លាប់។
ចំណុច ដែលជនជាតិរុស្ស៊ីលិចទូកក្តោងខាងលើនេះ ស្ថិតនៅម្តុំខាងមុខកោះតូច ក្រុងកោះរ៉ុង ខេត្តព្រះសីហនុ នាឱកាសពួកគេទាំង២នាក់ ជិះទូកក្តោងលេងកម្សាន្ត ក្នុងសមុទ្រកំពុងមានខ្យល់បោកបក់ និងមានរលកខ្លាំងនារដូវខ្យល់ធ្លាក់ឆ្នាំនេះ។
លោកឧកញ៉ា ទៀ វិចិត្រមានប្រសាសន៍ថា សកម្មភាពមនុស្សធម៌ ដើម្បីសង្គ្រោះជនរងគ្រោះលិចទូក នៅក្នុងកំហសមុទ្រនេះ ក្រុមហ៊ុន របស់លោក បានអនុវត្តជាបន្តបន្ទាប់ នៅពេលទទួលបានព័ត៌មានពីការលិចលង់ខាងលើនេះ។
លោកឧកញ៉ាបន្តថា ជានិច្ចកាល ក្រុមការងារសង្គ្រោះ របស់ ក្រុមហ៊ុន ជី.ធី.វី.ស៊ី, ស្ពីដបូត កម្ពុជា តែងបានជួយសង្គ្រោះទទួលលទ្ធផលជោគជ័យជានិច្ច ដោយបានស្រង់យកជនរងគ្រោះ ដែលជួបគ្រោះលិចទូកក្នុងលំហសមុទ្រនោះ ឲ្យរួចផុតពីសេចក្តីស្លាប់បានជាច្រើនករណី។ ជាក់ស្តែង ជនជាតិរុស្ស៊ីចំនួន ២នាក់ (បុរសម្នាក់ស្ត្រីម្នាក់) ត្រូវបានសង្គ្រោះយកចេញពីក្នុងទឹកសមុទ្រ នាំមកកាន់ដីគោកវិញដោយសុវត្ថិភាព៕ ដោយ៖ ដែន សីមា