ភ្នំពេញ ៖ សាកសពកម្មការិនីរោងចក្រម្នាក់ត្រូវបានគេប្រទះឃើញ នៅក្នុងបន្ទប់ជួលរបស់នាង ដោយឃាតករធ្វើសកម្មភាពរឹតកសម្លាប់ ហើយរត់គេចខ្លួនបាត់សម្រោល ។
ករណីនេះបង្កការភ្ញាក់ផ្អើលនៅថ្ងៃទី២៧ ខែវិច្ឆិកា ឆ្នាំ២០១៩ វេលាម៉ោង១៩និង៣០នាទី នៅចំណុចបន្ទប់ជួលលេខ៦ ផ្លូវបតុង ភូមិទ្រុងមាន់ សង្កាត់អូរបែកក្អម ខណ្ឌសែន ។
ជនរងគ្រោះឈ្មោះ សឿន ស្រីដា អាយុ២២ឆ្នាំ ជនជាតិខ្មែរ មុខរបរកម្មកររោងចក្រ មានស្រុកកំណើត ភូមិគោល ឃុំរភាពប្រាំង ស្រុកត្បូងឃ្មុំ ខេត្តត្បូងឃ្មូំ ស្នាក់នៅបន្ទប់ជួលកន្លែងកើតហេតុខាងលើ ។ សម្ភារៈបាត់បង់ ៖ ទូរស័ព្ទដៃ ០១គ្រឿង ម៉ាកអាយហ្វូន , ចិញ្ចៀនផ្លាកទីន២វង់ , កងដៃផ្លាកទីន២កង ។
ប្រភពបានឲ្យដឹងថា សាកសពស្ត្រីកម្មការិនីរោងចក្រម្នាក់ ត្រូវបានគេប្រទះឃើញដេកស្លាប់នៅក្នុងបន្ទប់ជួល បន្ទាប់ពីជះក្លិនស្អុយពេញបរិបេណនោះ បង្កឲ្យមានការសង្ស័យ នៅពេលម្ចាស់មកចាក់សោចូលមើល ស្រាប់តែឃើញសពនាងរងគ្រោះដេកស្លាប់ដោយផ្កាប់មុខនិង មានស្នាមរឹតករួចរុំភួយជិត និងមានចាក់សោពីក្រៅ សង្ស័យករណីឃាតកម្មប្លន់សម្លាប់យកគ្រឿងអលង្ការ ពីសំណាក់មនុស្សស្គាល់គ្នា ជិតស្និទ្ធ ។
តាមប្រភពពីប្រជាពលរដ្ឋនៅកន្លែងកើតហេតុ បានឲ្យដឹងថា នៅវេលាកើតហេតុមានធុំក្លិនស្អុយ សាយភាយចេញពីកន្លែងកើតហេតុ ដោយមិនដឹងថាស្អុយអ្វីនោះទេ តែដោយ មានការសង្ស័យបាននាំគ្នារាយការណ៍ ទៅប្រាប់ម្ចាស់ផ្ទះឲ្យមកជួយពិនិត្យក្រោយពីម្ចាស់ផ្ទះជួល មកដល់បានឡើងទៅមើល ឃើញទ្វាបន្ទប់របស់ជនរងគ្រោះ ចាក់សោពីខាងក្រៅជាប់ ក្រោយពេលចាក់សោចូលមើលក៏ឃើញ ជនរងគ្រោះដេកស្លាប់ផ្កាប់មុខនិងមានស្នាមរឹតក និងរុំភួយហើយសភាពសពហើមធុំក្លិនស្អុយ ដោយមិនដឹងថាស្លាប់ប៉ុន្មានថ្ងៃមកហើយ។
ប្រភពដដែលបានបន្តទៀតថា ជនរងគ្រោះគេមិនឃើញទៅធ្វើការរយៈពេល៤-៥ថ្ងៃទៅហើយ លុះថ្ងៃកើតហេតុ ក៏ឃើញដេកស្លាប់ ក្នុងបន្ទប់ផ្ទះជួលបែបនេះទៅវិញ។ បន្ទាប់មកក៏បានរាយការណ៍ទៅសមត្ថកិច្ចមូលដ្ឋាន និងជំនាញចុះមកពិនិត្យនៅកន្លែងកើតហេតុ។ ប្រភពខ្លះបានឲ្យដឹងថា កាលពីបីបួនថ្ងៃមុន គេឃើញជនរងគ្រោះ រួមនឹងមនុស្សប្រុសម្នាក់ចេញចូលបន្ទប់នាងតែគេមិនចាប់អារម្មណ៍នោះទេដោយសារ គេមានទស្សនៈថា មិនឲ្យចេះដឹងរឿងគេ ទុកមាត់ស៊ីមាន់វិញឆ្ងាញ់ជាង និយាយដើមគេ ហើយក៏មិនដឹងថា វាមានរឿងរហូតដល់ថ្នាក់នឹងដែរ ទោះបីសមត្ថកិច្ចមិនបង្ហើបថា ជារឿងអីនៅឡើយតែ សាច់ញាតិជនរងគ្រោះថា ករណីនេះ គឺជាករណីឃាតកម្មយ៉ាងច្បាស់ក្រឡែត ។
បច្ចុប្បន្ន ករណីខាងលើកម្លាំងអធិការដ្ឋាននគរបាលខណ្ឌសែនសុខ កំពុងធ្វើការស្រាវជ្រាវ ៕ដោយ៖បញ្ញាស័ក្តិ