ខេត្តព្រះសីហនុ៖ ថ្នាក់ដឹកនាំរដ្ឋបាលខេត្តព្រះសីហនុ បានដឹកនាំមន្ត្រីមន្ទីរពាក់ព័ន្ធបើកកិច្ចប្រជុំ ស្តីពីការជំរុញចលនាភូមិមួយ ផលិតផលមួយ ដើម្បីឲ្យមានដំណើរការរលូន និងមានប្រសិទ្ធភាពយូរអង្វែង។
កិច្ចប្រជុំនេះ ដឹកនាំដោយ លោក គង់ វិតាណ: អភិបាលរងខេត្តព្រះសីហនុ នាសាលប្រជុំសាលាខេត្តព្រះសីហនុ ព្រឹកថ្ងៃព្រហស្បត្តិ៍ ទី២៨ ខែវិច្ឆិកា ឆ្នាំ២០១៩ ដោយមានការចូលរួមពីអភិបាលរងក្រុង ស្រុក អនុប្រធានមន្ទីរជុំវិញខេត្តព្រះសីហនុផង។
នាឱកាសនោះ លោក គង់ វិតាណ: មានប្រសាសន៍ថា តាមគោលនយោបាយជាតិ ស្តីពីជម្រុញចលនាភូមិមួយ ផលិតផលមួយ របស់រាជរដ្ឋាភិបាលកម្ពុជា ឆ្នាំ២០១៦ -២០២៦ ដើម្បីរុញច្រានផលិតផល របស់ប្រទេសជាតិ ដែលមានសេដ្ឋកិច្ចរីកចម្រើន គឺត្រូវបង្កើនយន្តការរុញច្រានសេដ្ឋកិច្ចកម្ពុជា ឲ្យឈានទៅមុខលើវិស័យមួយចំនួន មានដូចជា៖ វិស័យកសិកម្ម , ឧស្សាហកម្ម និងពាណិជ្ជកម្ម ក្នុងដែនសមត្ថកិច្ចរៀងៗខ្លួន។
លោក គង់ វិតាណ: អភិបាលរងខេត្តព្រះសីហនុ ឲ្យដឹងដូច្នេះ រួចបញ្ជាក់ថា ថ្នាក់ដឹកនាំនៅតាមក្រុង ស្រុក និងឃុំ សង្កាត់នីមួយៗ នាខេត្តព្រះសីហនុ ត្រូវបង្កើនចលនាប្រជាពលរដ្ឋ ដោយត្រូវជម្រុញញលើកទឹកចិត្ត ដល់ប្រជាពលរដ្ឋ ឲ្យចូលរួមផលិត នូវវត្ថុធាតុដើម, ការកែច្នៃវត្ថុអនុស្សាវរីយ៍ ដើម្បីនាំយកមកដាក់លក់នៅលើទីផ្សារនានា ក្នុងខេត្ត ព្រះសីហនុ ដែលប្រជាពលរដ្ឋនៅតាមមូលដ្ឋានផលិតបាន។
លោក វិតាណៈ បន្តថា ចលនាភូមិមួយ ផលិតផលមួយ មានចរិតជាការអភិវឌ្ឍសេដ្ឋកិច្ចជនបទ និងការអភិវឌ្ឍចម្រុះនៅតាមសហគមន៍ ដែលចលនានេះ មានដើមកំណើតនៅខេត្ត អយតា ប្រទេសជប៉ុននាទស្សវត្សរ៍ ឆ្នាំ១៩៧០ ត្រូវបានប្រទេសកំពុងអភិវឌ្ឍ បានយកទៅអនុវត្ត ដោយប្រែក្លាយជាចលនាសកល ស្របតាមភូមិសាស្ត្រសេដ្ឋកិច្ច នយោបាយ និងសង្គម ដោយ ពឹងផ្អែកលើគោលការណ៍គ្រឹះសំខាន់ៗមួយចំនួនរួមមាន៖
១- គិតជាសកល ដោយធ្វើតាមមូលដ្ឋាន សំដៅលើគំនិតផ្សាភ្ជាប់ជាមួយវប្បធម៌ ប្រពៃណីតាមមូលដ្ឋាន បង្កើតផលិតផលរកទីផ្សារទាំងក្នុង និងក្រៅប្រទេស។
២- ពឹងផ្អែកលើខ្លួនឯង ដោយការច្នៃប្រឌិតរស់រវើក ហើយរដ្ឋបាលមូល ដ្ឋានមានភារកិច្ចសម្របសម្រួលផ្នែកបច្ចេកទេស និងទីផ្សារ។
៣- ជម្រុញការអភិវឌ្ឍធនធានមនុស្ស ចាំបាច់ក្នុងការអភិវឌ្ឍសហគមន៍មួយ ឆ្លើយតបប្រកប ដោយការកែច្នៃប្រឌិតរស់រវើក។
លោក គង់ វិតាណៈ បញ្ជាក់ថា គំនិត នៃកាំរជម្រុញចលនាភូមិមួយ ផលិតផលមួយ ឬផលិតផលនៅតាមតំបន់ ក៏បានឆ្លុះបញ្ចាំងពីលក្ខណៈវប្បធម៌ ប្រពៃណីតាមបែបបុរាណ និងតាមបែបសម័យទំនើប ដែលផ្តល់នូវកិត្យានុភាព និងមោទនភាព ចំពោះភូមិឋាន ដោយពង្រឹង ពង្រីកបរិមាណ គុណភាព និងសោភ័ណភាព បង្កើនតម្លៃបន្ថែម ជួយបង្កើនប្រាក់ ចំណូលប្រចាំគ្រួសារ។ ក្នុងនោះ ចក្ខុវិស័យ របស់រាជរដ្ឋាភិបាល បានផ្តោតលើការលើកកម្ពស់ជីវភាពប្រជាពលរដ្ឋ ធ្វើឲ្យកម្ពុជាក្លាយជាប្រទេស មានប្រាក់ចំណូលខ្ពស់នៅឆ្នាំ២០៥០ខាងមុខ និងចូលរួមលើកកម្ពស់សុខុមាលភាពប្រជាពលរដ្ឋ ឲ្យកាន់តែល្អប្រសើរឡើង សំដៅជម្រុញដល់ការអភិវឌ្ឍផលិតកម្ម ជាទំនិញ និងសេវាកម្មនានា នៅតាមភូមិឋាន ឬសហគមន៍ទូទាំងខេត្តព្រះសីហនុ ដើម្បីធានាដល់ការចូលរួមលើការងារអភិវឌ្ឍន៍ប្រទេសជាតិ ប្រកបដោយចីរភាពលើគ្រប់វិស័យ រួមមាន៖ សេដ្ឋកិច្ច បរិស្ថាន និងសង្គម ក្នុងកម្រិតភូមិឋាន សហគមន៍ ប្រទេសជាតិ និងសកលលោក៕ ដោយ៖ ដែន សីមា