ភ្នំពេញ៖ ជាធម្មតា ប្រទេសជាមិត្ត ជាពិសេសប្រទេសប្រជាធិបតេយ្យ ដែលមានទំនាក់ទំនងការទូតជាមួយយើងនោះ មានទូតជាតំណាងប្រទេសគេជាផ្លូវការ សម្រាប់ពង្រឹងនិងពង្រីកចំណងទាក់ទងរវាងប្រទេសនិងប្រទេស រវាងប្រជាពលរដ្ឋនិងប្រជាពលរដ្ឋ។ នេះបើតាមការបញ្ជាក់ពីលោកម៊ុត ចន្ថា នាយខុទ្ទកាល័យលោកកឹម សខា នៅថ្ងៃ២៩ខែវិច្ឆិកានេះ។
លោក បានលើកឡើងថា ក្នុងកិច្ចការទំនាក់ទំនងរវាងប្រជាពលរដ្ឋ និងប្រជាពលរដ្ឋនោះហើយ ទើបទូតនៃបណ្តាប្រទេសទាំងនោះ ធ្វើប្រាស្រ័យទាក់ទងនិងអន្តរកម្មផ្ទាល់ ឬស្វែងយល់ស្តាប់ទាំងសំឡេងខាងរាជរដ្ឋាភិបាល អ្នកកាន់អំណាច និងទាំងតំណាងសំឡេងប្រឆាំង ហើយបណ្តាអង្គទូតទាំងនោះ ក៏មិនបានបោះបង់ចោលទាំងស្រុងដែរ នូវសំឡេងផ្សេងៗ។ ក៏ប៉ុន្តែឯកអគ្គរាជទូត-ឯកអគ្គរដ្ឋទូត ដែលជាតំណាងប្រទេសទាំងនោះ ប្រាកដជាបានកំណត់ថា អ្នកណាជាតំណាងសំឡេងប្រឆាំង ឬក្រៅរដ្ឋាភិបាល ដើម្បីឆ្លុះបញ្ចាំងពីទស្សនៈ និងឆន្ទៈរបស់ប្រជាពលរដ្ឋ ពិតប្រាកដដែលមានទម្ងន់។
លោកបានថ្លែងថា ហេតុដូច្នេះ ហើយបានជាតំណាងបេសកកម្មការទូតទាំងនោះ បន្ទាប់ពីបានថ្វាយសារតាំងផ្លូវការរួច រយៈពេលបំពេញបេសកកម្ម និងពេលបញ្ចប់អាណតិ្ត អង្គទូតទាំងនោះបានជួបតំណាងរាជរដ្ឋាភិបាល និងអាចជួបតំណាងសំឡេងប្រឆាំង ឬក្រៅរដ្ឋាភិបាលដែលគេទទួលស្គាល់ផងដែរ។
ដូច្នេះគេអាចពិចារណាៈ តើអ្នកណាជាអ្នកណា? អង្គទូតដែលជាតំណាងបណ្តាប្រទេសទាំងនោះកំណត់ឲ្យតម្លៃ មិនអាស្រ័យលើអ្នកលើកបន្តុបខ្លួនឯងនោះទេ។
សូមបញ្ជាក់ថា លោកកឹម សុខា បានជួបសម្តែងការគួរសម សំណេះសំណាល ឯកអគ្គរដ្ឋទូត រាជទូតជាច្រើន ដូចជា
អូស្រ្តាលី ស៊ុយអែដ បែលហ្សិក ហ្វាំងឡង់ បារាំង សហរដ្ឋអាមេរិក អាល្លឺម៉ង់ អូស្ត្រាលី ជប៉ុន ចក្រភពអង់គ្លេស ស្វីស និងសហភាពអឺរ៉ុប។
ក្នុងពេលជួបពិភាក្សាការងារ ជាមួយបណ្តាអង្គទូតប្រចាំព្រះរាជាណាចក្រកម្ពុជា លោកកឹម សុខា បានថ្លែងថា ខ្ញុំបានទទួលជួបពិភាក្សាជាមួយឯកអគ្គរាជទូត និងរដ្ឋទូតតំណាងឲ្យប្រទេសនានា ខ្ញុំមានសេចក្តីរីករាយណាស់ ដែលប្រទេសដែលជាមិត្តរបស់កម្ពុជា តែងឈរជាមួយប្រជាពលរដ្ឋខ្មែរ និងលទ្ធិប្រជាធិបតេយ្យ។ ហើយខ្ញុំសង្ឃឹមថា តទៅថ្ងៃមុខកម្ពុជា នឹងដើរទៅរកផ្លូវផ្សះផ្សាជាតិ ដែលនាំមកនូវអភិវឌ្ឍន៍ យុត្តិធម៌ និងសេរីភាពពេញលេញដល់ខ្មែរគ្រប់និន្នាកា និងលើកកម្ពស់មុខមាត់កម្ពុជា នៅលើឆាកអន្តរជាតិ៕ដោយ៖កូឡាប
