ខេត្តតាកែវ ៖ កម្លាំងសមត្ថកិច្ចចម្រុះ ដែលមានមន្ត្រីកាំកុងត្រូល មន្ទីឧស្សាហកម្ម និងសិប្បកម្មរួម ជាមួយសមត្ថកិច្ច អាជ្ញាធរស្រុកបាទី បានចុះបង្ក្រាបទីតាំងលួចផលិតស្ករត្នោតក្លែងក្លាយចំនួន៤ទីតាំង នៅថ្ងៃទី២៨ វិច្ឆិកា នៅក្នុងភូមិព្រៃខ្លា ឃុំកុមារាជា ស្រុកបាទី ដោយរឹបអូសវត្ថុតាងមួយចំនួន យកទៅរក្សាទុកនៅសាលាស្រុកបាទី ដោយឡែក ស្ករដែលបានកែច្នៃហើយ ត្រូវដុតបំផ្លាញចោលជាក់ស្តែង ។
លោក ភួន ឈីម អភិបាលស្រុកបាទី បានឱ្យដឹងថា បញ្ហាលួចផលិតស្ករត្នោតក្លែងក្លាយ ដោយយកស្ករស លាយជាមួយទឹកនិងប្រេងឆា មកកែច្នៃជាស្ករត្នោតនេះ កន្លងមកអាជ្ញាធរស្រុកបាទី បានហៅម្ចាស់ទីតាំងផលិតទាំងជាង៤០ទីតាំង នៅក្នុងស្រុកបាទីមកអប់រំ និងបានចុះបង្ក្រាបជាច្រើនលើកច្រើនសារមកហើយ ក៏ប៉ុន្តែបងប្អូនប្រជាពលរដ្ឋមួយចំនួន នៅតែបន្តលួចលាក់ផលិតដដែល ។ ការយកស្ករសមកកែច្នៃជាស្ករត្នោត ដាក់លក់នៅលើទីផ្សារនេះ វាជាទង្វើខុសច្បាប់ ។ អាជ្ញាធរស្រុកនិងអាជ្ញាពាក់ព័ន្ធនិងបន្តបង្ក្រាប ដោយមិនអនុញ្ញាតឲ្យមានការកែច្នៃ ដោយខុសច្បាប់នេះ កើតឡើងទៀតនោះទេ ហើយអ្នកដែលបន្តលួចផលិត បើអាជ្ញាធចាប់ខ្លួនបាននិងត្រូវបញ្ជូនទៅតុលាការ ដើម្បីចាត់ការទៅតាមច្បាប់ ដោយគ្មានយោគយល់ទៀតទ្បើយ ។
លោក អភិបាលស្រុកបាទី បានអំពាវនាវឲ្យបងប្អូនប្រជាពលរដ្ឋដែលលួចលាក់ផលិតស្ករត្នោតក្លែងក្លាយនេះ សូមបញ្ឈប់សកម្មភាពខុសច្បាប់តទៅទៀត ហើយងាកទៅប្រកបមុខរបរ ដែលត្រឹមត្រូវទៅតាមច្បាប់ ។ ការលួចផលិតស្ករត្នោតក្លែងក្លាយនេះ វាមិនត្រូវទេ ហើយតែជាទង្វើខុសច្បាប់ និងបំផ្លាញសុខភាពបងប្អូនប្រជាពលរដ្ឋ ដែលទិញស្ករនេះទៅប្រើប្រាស់ ជាពិសេស វាបានប៉ះពាលដល់ផលិតផលស្ករឆ្នោតពិតប្រាក ដែលយកទឹកត្នោតមកកែច្នៃធ្វើជាស្ករត្នោត ហើយស្ករត្នោតពិតប្រាកដនេះ មានការទទួលស្គាល់ពីបងប្អូនប្រជាពលរដ្ឋ ឬក្រសួងថែមទៀត និងមានការនាំចេញទៅក្រៅប្រទេស ។
កម្លាំងចម្រុះបានចុះបង្ក្រាបនៅឃុំកុមារាជា ចំណែកឃុំលំពង់ កងកម្លាំងមិនបានចុះបង្ក្រាបឡើយ ហើយការចុះបង្ក្រាបនេះ គឺបានតែ៤ទីតាំងតែប៉ុណ្ណោះ លើជាង៤០ទីតាំង ដោយបានរឹបអូសបានម៉ូទ័រ១១គ្រឿង ស្ករត្នោត១០៩ធុងស្ពេតត្រូ ខ្ទះ២០ ជញ្ជីង៤ កាកស្ករ១៣៧បាវ រថយន្តសាំយ៉ុង២គ្រឿង រថយន្តកូរ៉េ១គ្រឿង និងសម្ភារមួយចំនួន យកទៅដុតកម្ទេចចោលជាក់ស្តែង៕ដោយ៖បញ្ញាស័ក្តិ