អនាគតកូនប្រសាស្រីរបស់នាយករដ្ឋមន្រ្តីប្រទេសអាល់បានី ឈ្មោះ Edi Rama ស្ថិតក្នុងចំណោមជនរងគ្រោះជាច្រើននាក់ ដែលបានស្លាប់ក្នុងគ្រោះរញ្ជួយដី កាលពីថ្ងៃអង្គារកន្លងទៅនេះ។ នេះបើតាមការបញ្ជាក់របស់ការិយាល័យនាយករដ្ឋមន្រ្តី។
ស្រ្តីឈ្មោះ Kristi Reçi ដែលជាគូដណ្តឹងរបស់ លោក Gregor Rama កូនប្រុសនាយករដ្ឋមន្រ្តីអាល់បានី បានស្លាប់ជាមួយឪពុកម្តាយ និងបងប្រុស ក្នុងគ្រោះរញ្ជួយដី។
លោក Gregor Rama បានបង្ហោះរឿងទុក្ខសោកនៅក្នុងបណ្តាញសង្គម Instagram ដែលលោកបានសរសេរថា ក្នុងចំណោមជនរងគ្រោះ នៃសោកនាដកម្មក៏មានមនុស្សម្នាក់ ដែលស្និទ្ធនឹងខ្ញុំបំផុតដែរ។ គាត់បានស្លាប់ជាមួយបងប្រុសរបស់នាង ឪពុក និងម្តាយរបស់នាង។ ពួកគេ ៤នាក់នោះត្រូវរកឃើញស្លាប់នៅក្រោមគំនរបាក់បែក។
សូមបញ្ជាក់ថា គ្រោះរញ្ជួយដីរង្វាស់ ៦,៤រ៉ិចទ័រ បានវាយប្រហារទីក្រុងកំពង់ផែ Durres ស្ថិតនៅចំងាយប្រមាណ ៣៦គីឡូម៉ែត្រពីរដ្ឋធានី Tirana បណ្តាលឲ្យមនុស្សយ៉ាងតិចចំនួន ៤៦នាក់បានស្លាប់។ វាគឺជាគ្រោះរញ្ជួយដីដ៏ខ្លាំងបំផុត ដែលបានវាយប្រហារប្រទេសនេះ ក្នុងរយៈពេល ៤០ឆ្នាំចុងក្រោយ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN