ភ្នំពេញ ៖ ជនត្រូវចោទ គង់ រ៉ៃយ៉ា ដែលត្រូវចោទប្រកាន់ពាក់ព័ន្ធ នឹងករណីញុះញង់ឲ្យប្រព្រឹត្តបទឧក្រិដ្ឋជាអាទិ៍ នៅព្រឹកថ្ងៃទី២៩ ខែវិច្ឆិកា ឆ្នាំ២០១៩នេះ លោកស្រី អ៊ុក រ៉េតគន្ធា ចៅក្រមជំនុំជម្រះសាលាដំបូងរាជធានីភ្នំពេញបានបើកសវនាការប្រកាសសាលក្រមដោយសម្រេច អនុញ្ញាតឲ្យនៅក្រៅឃុំជាបណ្តោះ តាមការស្នើសុំ។
ចៅក្រមជំនុំជម្រះបានបង្គាប់ឲ្យជនត្រូវចោទ ត្រូវចូលខ្លួនមកកាន់តុលាការវិញ នៅព្រឹកថ្ងៃទី២០ ខែធ្នូ ឆ្នាំ២០១៩ ដើម្បីជំនុំជម្រះលើអង្គសេចក្តី។
សូមបញ្ជាក់ថា ឈ្មោះ គង់ រ៉ៃយ៉ា និងបក្ខពួក ៣នាក់ទៀត ត្រូវកម្លាំងនគរបាលព្រហ្មទណ្ឌឃាត់ខ្លួន កាលពីថ្ងៃទី៩ ខែកក្កដា ឆ្នាំ២០១៩ បន្ទាប់ពួកគេបានបោះពុម្ពទ្រឹស្ដីរបស់ លោកបណ្ឌិត កែម ឡី នៅលើអាវយឺតពណ៌ខ្មៅ និងស ដែលសមត្ថកិច្ចសង្ស័យថា មានខ្លឹមសារញុះញង់ឲ្យមានកំហឹងឈឺចាប់ ដើម្បីបំផុសបំផុលដោយភ្ជាប់នឹងថ្ងៃមរណភាព លោកបណ្ឌិត កែម ឡី កាលពីថ្ងៃទី១០ ខែកក្កដា ឆ្នាំ២០១៦។ ក្រោយឃាត់ខ្លួនយកទៅសាកសួរ សមត្ថកិច្ចបានសម្រេចឲ្យមនុស្ស៣នាក់ ទៅផ្ទះវិញដោយទុកតែឈ្មោះ គង់ រ៉ៃយ៉ា ម្នាក់ដើម្បីកសាងសំណុំរឿង បញ្ជូនខ្លួនទៅតុលាការ។
សំណុំរឿងនេះ ចៅក្រមស៊ើបសួរ នៃសាលាដំបូងរាជធានីភ្នំពេញ លោក ឯក ប៉ូលីហ្វីល កាលពីរសៀលថ្ងៃទី១១ ខែកក្កដា ឆ្នាំ២០១៩ បានសម្រេចចេញដីកាឃុំខ្លួនជនត្រូវចោទ គង់ រ៉ៃយ៉ា ក្រោមការចោទប្រកាន់ពាក់ព័ន្ធ នឹងករណីញុះញង់ឲ្យប្រព្រឹត្តបទឧក្រិដ្ឋជាអាទិ៍៕ ដោយ៖បញ្ញាស័ក្តិ
