ភ្នំពេញ ៖ រដ្ឋាភិបាលជប៉ុន បានឯកភាពផ្តល់ថវិកាសរុបចំនួន ៤៣៩.២៦១ ដុល្លារអាមេរិក ដល់អង្គការIVY ក្រោមគ្រោងការណ៍ជំនួយហិរញ្ញប្បទានឥតសំណង សម្រាប់គម្រោងរបស់អង្គការក្រៅរដ្ឋាភិបាលជប៉ុន។ កិច្ចសន្យាផ្តល់ជំនួយ ត្រូវបានចុះហត្ថលេខានៅថ្ងៃទី២៩វិច្ឆិកានេះ ដោយលោក មិកាមិ ម៉ាសាហ៊ីរ៉ូ ឯកអគ្គរាជទូតវិសាមញ្ញ និងពេញ
សមត្ថភាពរបស់ប្រទេសជប៉ុន ប្រចាំព្រះរាជាណាចក្រកម្ពុជា និង លោកស្រី ឈើហូក សឺវ៉ីស៊ីម៉ាក ជំនួយការនាយកនៃអង្គការ WY ដើម្បីអនុវត្តគម្រោង គាំទ្រកសិករខ្នាតតូចធ្វើកសិកម្មតាមកិច្ចសន្យាលើដំណាំស្វាយចន្ទីសរីរាង្គតាមរយៈសហគមន៍កសិកម្ម (ឆ្នាំទី ២)” ។
សព្វថ្ងៃ ផលិតផលកសិកម្ម សរីរាង្គ កាន់តែ មានប្រជាប្រិយភាព នៅលើទីផ្សារហើយ ផលិតផលទាំងនោះ ត្រូវបាន លក់ក្នុងតម្លៃខ្ពស់។ ក្នុងគម្រោង នេះ អង្គការIVY នឹងគាំទ្រ ដល់កសិករនិង សហគមន៍កសិកម្មក្នុងស្រុក (AC) ក្នុង ខេត្តព្រះវិហារ ដូច្នេះកសិករអាច ផលិតនិងលក់គ្រាប់ស្វាយចន្ទីសរីរាង្គដែលមានតម្លៃបន្ថែម និង ទទួលបានប្រាក់ចំណូលបន្ថែមទៀត ដើម្បីគេចផុតពីភាពក្រីក្រ ។
កម្មវិធីជំនួយឥតសំណងសម្រាប់គម្រោងអង្គការក្រៅរដ្ឋាភិបាលជប៉ុន បានចាប់ផ្តើមនៅប្រទេសកម្ពុជាតាំងពីឆ្នាំ២០០២ ដើម្បីគាំទ្រដល់សកម្មភាពអង្គការក្រៅរដ្ឋាភិបាលជប៉ុន ក្នុងកិច្ចខិតខំប្រឹងប្រែងដើម្បីជួយដល់ការអភិវឌ្ឍ និងស្ថាបនាប្រទេសកម្ពុជាឡើងវិញ នៅតាមកម្រិតមូលដ្ឋាន។ ចាប់តាំងពីឆ្នាំ២០០២ មក រដ្ឋាភិបាលជប៉ុន បានផ្តល់ថវិកាជាង៣៧លានដុល្លារអាមេរិក ដល់គម្រោងចំនួន១២២ ដែលផ្តោតសំខាន់ទៅលើវិស័យអប់រំនៅកម្រិតមូលដ្ឋាន វិស័យសុខាភិបាល វិស័យកសិកម្ម និងសកម្មភាពបោសសម្អាតមីន
ក្នុងប្រទេសកម្ពុជា។
លោកឯកអគ្គរាជទូត បានថ្លែងថា លើកនេះ រដ្ឋាភិបាលជប៉ុនផ្តល់ថវិកាប្រមាណ ៤៤ ម៉ឺនដុល្លារសហរដ្ឋអាមេរិកដល់អង្គការ IVY។ ខេត្តព្រះវិហារជាខេត្តដែលអង្គការកំពុងធ្វើសកម្មភាពនេះ ជាខេត្តមួយក្នុងចំណោមខេត្តដែលមានអត្រាភាពក្រីក្រខ្ពស់នៅកម្ពុជា ដូច្នេះការកាត់បន្ថយភាពក្រីក្រមានសារសំខាន់ណាស់។ នៅក្នុងខេត្តព្រះវិហារ គម្រោងនេះកំពុងតែគាំទ្រនិងខិតខំប្រឹងប្រែង
ក្នុងការលើកកម្ពស់ប្រាក់ចំណូលរបស់កសិករ តាមរយៈការយកចិត្តទុកដាក់ទៅលើគ្រាប់ស្វាយចន្ទីដែលបានដាំដុះយ៉ាងសកម្ម ក្នុងរយៈពេលប៉ុន្មានឆ្នាំចុងក្រោយ ធ្វើការណែនាំពីការដាំដុះសរីរាង្គដល់កសិករ និងការដឹកជញ្ជូនរួមគ្នាតាមរយៈសហគមន៍កសិកម្ម។ នៅឆ្នាំនេះ អង្គការនឹងធ្វើការអនុវត្តគម្រោងដើម្បីឲ្យសហគមន៍កសិកម្មចំនួន៦ថែមទៀតទទួលបានវិញ្ញាបនបត្រសរីរាង្គ ហើយក៏ខិតខំប្រឹងប្រែងបង្កើនបច្ចេកទេសរបស់កសិករ តាមរយៈការណែនាំបច្ចេកទេសដាំដុះថ្មី ដូចជាការផ្សាំឈើ និង កាត់មែកដែលមិនចាំបាច់ចេញ។ យើងរំពឹងថាប្រាក់ចំណូលរបស់កសិករ នឹងកើនឡើងកាន់តែខ្លាំងដោយកសិករគោលដៅ
នឹងអាចដាំដុះគ្រាប់ស្វាយចន្ទី ដែលមានតម្លៃបន្ថែម ក្នុងនាមជាដំណាំសរីរាង្គប្រកបដោយស្ថេរភាព៕ដោយ៖កូឡាប
