ខេត្តព្រះសីហនុ៖ សេចក្តីរាយការណ៍ បានឲ្យដឹងថា ក្នុងប៉ុន្មានខែចុងឆ្នាំ២០១៩នេះ មានក្រុមហ៊ុនកាស៊ីណូជាច្រើន នាក្រុងព្រះសីហនុ ត្រូវបានថៅកែជនជាតិចិន សម្រេចបិទទ្វារមិនដំណើរការ ជាបណ្តោះអាសន្ន និងមិនបានបើកប្រាក់ខែជូនបុគ្គលិកជាដើម។
ការបិទទ្វារកាស៊ីណូមួយចំនួន យ៉ាងតក់ក្រហល់ ក្នុងក្រុងព្រះសីហនុកន្លងមកនេះ បណ្តាលឲ្យបុគ្គលិកបម្រើការនៅតាមកាស៊ីណូទាំងនោះ ប្រមូលផ្តុំគ្នាតវ៉ា ជាច្រើនលើកច្រើនសារ ដោយសារថៅកែក្រុមហ៊ុនមួយចំនួននោះ មិនបើកប្រាក់ខែជូន និងមិនបានជូនដំណឹងដល់បុគ្គលិកឲ្យបានដឹងមុនជាដើម..។
ជាក់ស្តែងនៅព្រឹកថ្ងៃទី២៩ ខែវិច្ឆិកា ឆ្នាំ២០១៩នេះ មានបុគ្គលិកមួយចំនួនបម្រើការនៅកាស៊ីណូ ឈ្មោះ វួយនីសឺ ហៅកាត់ ឌីវី (DV) មានទីតាំងនៅក្នុងសង្កាត់លេខ៤ ក្រុង-ខេត្តព្រះសីហនុ ត្រង់ចំណុចម្តុំឆ្នេរកន្ទុយនាគ បានរាយការណ៍មកថា បុគ្គលិកជាច្រើននាក់ ដែលបម្រើការងារនៅក្នុងកាស៊ីណូខាងលើនេះ បានប្រមូលផ្តុំគ្នាតវ៉ា និងស្នើរកកិច្ចអន្តរាគមន៍ពីមន្ត្រីមន្ទីរស្ថាប័នជំនាញពាក់ព័ន្ធ នៃរដ្ឋបាលខេត្តព្រះសីហនុ ឲ្យជួយរកដំណោះស្រាយដល់ពួកគេ។
ក្រុមបុគ្គលិកកាស៊ីណូ វួយនីសឺ ហៅកាត់ DV បានឲ្យដឹងថា មូលហេតុ ដែលពួកគាត់ប្រមូលផ្តុំគ្នាតវ៉ានេះ ដោយសារតែថៅកែកាស៊ីណូមួយនេះ វានបិទផ្អាកសកម្មភាព របស់ក្រុមហ៊ុន ដោយមិនបានជូនដំណឹងដល់បុគ្គលិក និងមិនទាន់បានដំណោះស្រាយប្រាក់បៀវត្សរ៍ជូនបុគ្គលិកនៅឡើយទេ។
យ៉ាងណាក៏ដោយចុះ ចំពោះការប្រមូលផ្តុំគ្នាតវ៉ា របស់បុគ្គលិកកាស៊ីណូ វួយនីសឺ ហៅកាត់ DV កាលពីព្រឹកមិញនេះ គេមិនទាន់ឃើញមានវត្តមានមន្ត្រីមន្ទីរស្ថាប័នជំនាញពាក់ព័ន្ធណាមួយ នៃរដ្ឋបាលខេត្តព្រះសីហនុ ចេញមុខមកជួយសម្របសម្រួល ដោះបញ្ចប់វិវាទការងារខាងលើនេះនៅឡើយទេ។
ផ្តើមពីបញ្ហានេះ តំណាងម្នាក់ នៃបុគ្គលិកកាស៊ីណូ វួយនីសឺ ហៅកាត់ ឌីវី (DV) បានសំណូមពរដល់អ្នកសារព័ត៌មាន ឲ្យជួយផ្សព្វផ្សាយ ឲ្យបានទូលំទូលាយ ដើម្បីឲ្យបានដឹងឮដល់ថ្នាក់ដឹកនាំក្រសួង មន្ទីរ ជាពិសេស លោក គួច ចំរើន អភិបាលខេត្តព្រះសីហនុ ឲ្យចុះមកជួយរកដំណោះស្រាយជូនពួកគាត់ឲ្យបានឆាប់។
បន្ថែមលើនេះ ទាំងអ្នកសារព័ត៌មាន និងមន្ត្រីស្ថាប័នជំនាញនានា ក៏អាចទាក់ទងមកតំណាងបុគ្គលិកាស៊ីណូខាងលើនេះ តាមរយៈទូរស័ព្ទលេខ៖ ០៩៦ ៨០ ៩៧ ៧៨៧៕ ដោយ៖ ដែន សីមា