កណ្តាល៖ លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានឲ្យដឹងថា អ្នកបើកបររថយន្តបុកមន្ដ្រីនគរបាលចរាចរណ៍ម្នាក់ ពេលកំពុងឈរការពារក្បូនថ្នាក់ដឹកនាំជាន់ខ្ពស់ នៅក្រុងតាខ្មៅ ខេត្តកណ្ដាល ត្រូវបានបងស្រីនាំខ្លួនយកមកប្រគល់ឲ្យសមត្ថកិច្ច នៅស្នងការដ្ឋាននគរបាលខេត្តកណ្ដាល ដើម្បីអនុវត្តតាមផ្លូវច្បាប់ នៅវេលាម៉ោង៩នឹង៣០នាទីព្រឹកថ្ងៃទី២៩ ខែវិច្ឆិកា ឆ្នាំ២០១៩នេះ ដើម្បីទទួលទោសតាមផ្លូវច្បាប់ ក្រោយបើករថយន្ដបុកមន្ដ្រីនគរបាលម្នាក់បណ្ដាលឲ្យរងរបួស។
លោកស្នងការខេត្តបន្តថា រហូតមកដល់ពេលនេះ មន្ដ្រីនគរបាលយុត្តិធម៌ នៃស្នងការដ្ឋាននគរបាលខេត្តកណ្ដាល ក្រោមការសម្របសម្រួលពីតំណាងអយ្យការ កំពុងសួរនាំជនបង្ក ដើម្បីកសាងសំណុំរឿងចាត់ការតាមនីតិវិធី។
លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្តកណ្តាល បានបញ្ជាក់ថា អ្នកបើករថយន្តមានឈ្មោះ សំណាន សំណាង អាយុ៣៣ឆ្នាំ មានទីលំនៅស្រុកស្អាង ខេត្តកណ្តាល។
លោកអ៊ាវ ចំរើន ស្នងការនគរបាលខេត្តកណ្តាល បានថ្លែងថា “ជំនួសមុខឲ្យមន្ត្រីនគរបាលចរាចរណ៍ខេត្តកណ្តាលមួយរូប ដែលត្រូវរថយន្តបុកពេលកំពុងបំពេញការងារ និងក្រុមគ្រួសារ ខ្ញុំបាទផ្ទាល់ក៏ដូចជា នគរបាលចរាចរណ៍ទាំងអស់ នៃស្នងការដ្ឋាននគរបាលខេត្តកណ្តាល សូមគោរពអរគុណយ៉ាងជ្រាលជ្រៅបំផុតចំពោះសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានឆ្លៀតឱកាសដ៏មមាញឹក គោរពអញ្ជើញមកសាកសួរសុខទុក្ខ ដោយផ្ទាល់នៅបន្ទប់សំរាកព្យាបាល លោក អនុសេនីយ៍ឯក ទូច សៅហេង និងក្រុមគ្រួសារនៅមន្ទីរពេទ្យកាល់ម៉ែត ក្នុងគ្រាដែលសម្តេច កំពុងបំពេញកាតព្វកិច្ចដ៏កតញ្ញូបំផុត គឺមើលថែទាំអ្នកម្តាយ នៅមន្ទីរពេទ្យកាល់ម៉ែតនេះស្រាប់ “។
សូមរំលឹកថា កាលពីវេលាម៉ោង២០និង១០នាទីថ្ងៃទី២៨ ខែវិច្ឆិកា ឆ្នាំ២០១៩ ត្រង់ចំណុចភ្លើងស្តុបស្ពានព្រែកហូរ ស្ថិតក្នុងសង្កាត់ព្រែកហូរ ក្រុងតាខ្មៅ ខេត្តកណ្តាល រថយន្តតាកូម៉ាមួយគ្រឿងបើកបរ ដោយជនមិនស្គាល់អត្តសញ្ញាណបានបើកបំបុក មន្ត្រីនគរបាលចរាចរណ៍ខេត្តកណ្តាលម្នាក់ កំពុងឈរបញ្ជាចរាចរណ៍លើដងផ្លូវ បណ្តាលឲ្យរងរបួសបាក់ជើងទាំងសងខាង និងបាក់ឆ្អឹងកង្កេះ ស្រាំលលាដ៏ កកឈាមក្នុងខួរក្បាលយ៉ាងធ្ងន់ធ្ងរ។ ក្រោយមានហេតុការណ៍កើតឡើង ជនបង្កបានព្យាយាមបើករថយន្តយកទៅប្លុងចោលរួចគេចខ្លួនបាត់។
មន្ត្រីនគរបាលចរាចរណ៍ដែលត្រូវរថយន្តបើកបុកពេលបំពេញការងារនោះឈ្មោះ ទូច សៅហេង មានតួនាទីជា នាយរងផ្នែក មានឋានន្តរស័ក្តិថ្នាក់អនុសេនីយ៍ឯក។
ចំណែកឯរថយន្តបង្កម៉ាកតូយូតា តាកូម៉ា ពណ៌ខ្មៅ ពាក់ផ្លាកលេខភ្នំពេញ2S-3669 បើកបរដោយជនមិនស្គាល់អត្តសញ្ញាណ បច្ចុប្បន្នសមត្ថកិច្ចកំពុងស្រាវជ្រាវ។
លោក ឆេង សំអឿន នាយការិយាល័យចរាចរណ៍ជើងគោក បានឲ្យដឹងថា លោកទូក សៅហេង និងមន្ត្រីនគរបាលចរាចរណ៍៥រូបទៀត ត្រូវបានចាត់ឲ្យឈរជើងនៅគោលដៅស្តុបស្ពានព្រែកហូរ លើកំណាត់ផ្លូវជាតិលេខ២ ដើម្បី សម្រួលចរាចរណ៍នៅទីនោះ។ នៅមុនពេលកើតហេតុ លោក ទូច សៅហេង បានចេញឈរបញ្ជាចរាចរណ៍ ដោយបានបញ្ជាឲ្យរថយន្តតាកូម៉ាមួយគ្រឿងឈប់ មិនត្រឹមតែមិនស្តាប់តាមការបញ្ជាអ្នកបើកបរដែលមានចរិតសាហាវព្រៃផ្សៃរូបនេះ បានជាន់ហ្គាបន្ថែមល្បឿនបំបុកមន្ត្រីនគរបាលទាំងកម្រោលបណ្តាលអោយប៉ើងខ្ទាតប្រមាណ៥ទៅ៦ម៉ែត្រ ធ្វើឲ្យមន្ត្រីនគរបាលរងរបួសយ៉ាងធ្ងន់ធ្ងរ។ ក្រោយពីមាន ហេតុការណ៍កើតឡើងអ្នកបើកបររថយន្តបង្កបានបើកគេចពីចំណុចកើតហេតុ យករថយន្តទៅប្លុងចោល ត្រូវបានសមត្ថកិច្ចហៅរថយន្តស្ទូចៗយកទៅរក្សាទុក ដើម្បីចាត់ការតាមច្បាប់។
លោកនាយការិយាល័យបានបញ្ជាក់ថា ចំពោះលោកទូចសៅហេង ក្រោយពីពិនិត្យក្រុមគ្រូពេទ្យបានបញ្ជាក់ថា លោកទទួលរងរបួសបាក់ជើងទាំងសងខាង បាក់ឆ្អឹងចង្កេះ និងស្រាំលលាដ៍ កកឈាមក្នុងខួរក្បាលទៀតផង បច្ចុប្បន្ន កំពុងសង្គ្រោះ។ ក្រោយពីទទួលបានព័ត៌មានមន្ត្រីនគរបាល ត្រូវរថយន្តបុកពេលបំពេញការងារ លោកឧត្តមសេនីយ៍ទោ អ៊ាវ ចំរើន ស្នងការនគរបាលខេត្ត បញ្ជាឲ្យរថយន្តសាមុយចេញដឹកមន្ត្រីមានរបួសបញ្ជូន ទៅសង្គ្រោះនៅមន្ទីរពេទ្យភ្លាមៗ និងបានឧបត្ថម្ភថវិកាចំនួន៤លានរៀល ដល់ភរិយាមន្ត្រីនគរបាលទុកសម្រាប់ជួយសម្រួលដល់ការព្យាបាល។ មួយផ្នែកទៀត លោកឧត្តមសេនីយ៍ អ៊ាវ ចំរើន ក៏បានបង្កើតមូលនិធិសង្គ្រោះ ដោយមានមន្ត្រីនគរបាលខេត្តកណ្តាលជាច្រើនរូប ចូលរួមឧបត្ថម្ភដល់ជនរងគ្រោះ ដែលជាមន្ត្រីនគរបាលដូចគ្នា៕ដោយ៖កូឡាប