ភ្នំពេញ ៖ កម្លាំងនគរបាលនៃការិយាល័យព្រហ្មទណ្ឌស្នងការដ្ឋាននគរបាលរាជធានីភ្នំពេញ កម្លាំងនគរបាលអធិការដ្ឋានខណ្ឌពោធិ៍សែនជ័យ នគរបាលខណ្ឌច្បារអំពៅ សហការជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ ចំណាយពេលាវេលាស្រាវជ្រាវស៊ើបអង្កេតកន្លះខែ ឈានដល់បំបែកសំណុំរឿងប្លន់ប្រដាប់អាវុធ១ករណី យករថយន្តម៉ាកហាយឡិនឌ័រ១គ្រឿងនៅរាជធានីភ្នំពេញ ។
ជនសង្ស័យម្នាក់រួមនិងអាវុធ៣ដើម ត្រូវបានបង្ក្រាបចាប់ខ្លួនកាលពី២៧ ខែវិច្ឆិកា ឆ្នាំ២០១៩ ស្ថិតនៅក្នុងភូមិសាស្ត្រខណ្ឌពោធិ៍សែនជ័យ រាជធានីភ្នំពេញ ហើយនៅព្រឹកថ្ងៃទី២៩ ខែវិច្ឆិកា កម្លាំងនគរបាលរិយាល័យព្រហ្មទណ្ឌកម្រិតធ្ងន់រាជធានីភ្នំពេញបញ្ជូនទៅកាន់តុលាការចាត់ការតាមផ្លូវច្បាប់ ។
លោកឧត្តមសេនីយ៍ទោ សុង លី ស្នងការរងទទួលផែនការងារព្រហ្មទណ្ឌ នៃស្នងការដ្ឋាននគរបាលរាជធានីភ្នំពេញ បានប្រាប់ឱ្យដឹងថា ជនសង្ស័យឈ្មោះ ជុត ជីវ័ន្ត ភេទប្រុស អាយុ២៧ឆ្នាំ ស្រុកកំណើតនៅភូមិក្បាលដំរី ឃុំបឹងព្រះ ស្រុកបាភ្នំ ខេត្តព្រៃវែង កាលពីថ្ងៃទី១២ ខែវិច្ឆិកា ឆ្នាំ២០១៩ ជាថ្ងៃដំបូងនៃព្រះរាជពិធីបុណ្យអុំទូក បានជួលរថយន្តតាក់ស៊ី១គ្រឿងម៉ាកហាយឡិនឌ័រ ពណ៌ទឹកប្រាក់ ពាក់ផ្លាកលេខស្វាយរៀង 2B-4517 របស់ឈ្មោះ ពុធ រិទ្ធី ភេទប្រុស អាយុ៣៣ឆ្នាំ រស់នៅឃុំព្រៃគគីរ ស្រុកចន្ទ្រា ខេត្តស្វាយរៀង ដោយសារពួកគេទាំង២នាក់បានស្គាល់គ្នា និងបើកដឹកជនសង្ស័យពីទីរួមខេត្តព្រៃវែង ដើម្បីមកលេងបុណ្យអុំទូកនៅរាជធានីភ្នំពេញ ។
លោកឧត្តមសេនីយ៍ទោ បន្តថា ក្រោយពីជនរងគ្រោះបើកដឹកជនសង្ស័យ ដល់ចំណុចម្តុំផ្លូវថៃហ្គ័រ ភូមិបោះអង្កាញ់ សង្កាត់ព្រែកឯង ខណ្ឌច្បារអំពៅ ដែលជាទីកន្លែងស្ងាត់ ជនសង្ស័យក៏បានយកកាំភ្លើងដែលលាក់ទុកក្នុងកាបូបខ្មៅភ្ជង់គំរាមជនរងគ្រោះឲ្យចុះពីរថយន្ត ហើយរូបគេបើករថយន្តនោះចូលក្នុងទីក្រុងភ្នំពេញ ។ ដោយឡែកម្ចាស់រថយន្តត្រូវបានជនសង្ស័យរក្សាទុកជីវិតមិនធ្វើអ្វីនោះទេ ។
លោកឧត្តមសេនីយ៍ស្នងការរង ប្រាប់ឱ្យដឹងទៀតថា ក្រោយពីអំពើប្លន់រថយន្តបានសម្រេច ជនសង្ស័យក៏មកជួលបន្ទប់ផ្ទះសំណាក់ស្នាក់នៅ និងលាក់ទុកអាវុធនៅក្នុងផ្ទះសំណាក់ ហើយជនសង្ស័យក៏បានយករថយន្តទៅផ្ញើនៅកន្លែងណាហ្គាវើល ក្រោយមកក៏រកម៉ូយទិញរថយន្តក្នុងតម្លៃ១ម៉ឺន៤ពាន់ដុល្លារ បន្ទាប់មកក៏យកទៅលេងល្បែងស៊ីសងអស់ រួចគេចខ្លួនបាត់ ។
លោកឧត្តមសេនីយ៍ទោ សុង លី បញ្ជាក់ទៀតថា ក្រោយពីមានអំពើប្លន់ប្រដាប់អាវុធបែបនោះកើតឡើង អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ លោក ឧត្តមសេនីយ៍ឯក ស ថេត ក៏បានបញ្ជាកម្លាំងនគរបាលការិយាល័យជំនាញ និងកម្លាំងនគរបាលតាមបណ្តាអធិការដ្ឋានខណ្ឌពាក់ព័ន្ធនានា បើកការស្រាវជ្រាវស៊ើបអង្កេតហើយក៏កំណត់បានមុខសញ្ញាជនសង្ស័យ ។ លុះនៅថ្ងៃទី២៧ ខែវិច្ឆិកា កម្លាំងនគរបាលបានឃើញជនសង្ស័យ នៅក្នុងភូមិសាស្ត្រខណ្ឌពោធិ៍សែនជ័យ ក៏ចាប់ឃាត់ខ្លួន និងនាំយកទៅឆែកឆេរកន្លែងស្នាក់នៅ រកឃើញដកហូតកាំភ្លើង៣ដើម ក្នុងនោះកាំភ្លើងអាកា៤៧ ចំនួន២ដើម និងកាំភ្លើងហ្វាងឡុង១ដើម ។
ជនសង្ស័យបានឆ្លើយសារភាពថា មូលហេតុដែលរូបគេក្លាយខ្លួនជាចោរប្លន់ ដោយសារល្បែងស៊ីសង រូបគេក៏លេងចាញ់ល្បែងអស់រថយន្តផ្ទាល់ខ្លួន១គ្រឿង ម៉ាកឡិចស៊ីស៣០០ម្តងរួចមកហើយផងដែរ ។
ជុំវិញពាក់ព័ន្ធនឹងបញ្ហាសន្តិសុខនេះផងដែរ អគ្គស្នងការរងនគរបាលជាតិ លោកឧត្តមសេនីយ៍ឯក ស ថេត បានលើកឡើងនៅពេលគោរទង់ជាតិ កាលពីថ្ងៃចន្ទដើមសប្តាហ៍នេះ ដោយវាយតម្លៃខ្ពស់កោតសរសើរដល់កងកម្លាំងនគរបាលរាជធានីភ្នំពេញដែលបានបំពេញភារកិច្ចល្អ ធ្វើឱ្យបទល្មើសនៅរាជធានីភ្នំពេញមានការថយចុះ ។ ជាពិសេសនៅពេលមានបទល្មើសកើតឡើង កម្លាំងនគរបាលចេញប្រតិបត្តិការ បង្ក្រាបចាប់ជនល្មើសបានជាបន្តបន្ទាប់ ដើម្បីយកមកផ្តន្ទាទោសតាមច្បាប់ ៕ដោយ៖កូឡាប
