តុលាការប្រទេសកូរ៉េខាងត្បូង បានកាត់ទោសតារាកូរ៉េចំនួន ២រូបឈ្មោះ Jung Joon-Young និង Choi Jong-Hoon អោយជាប់គុករយៈពេល ៥ឆ្នាំ និងម្នាក់ទៀត ៦ឆ្នាំពីបទរំលោភបូកទៅលើស្រ្តីស្រវឹងជាច្រើននាក់ ដែលសន្លប់បាត់ស្មារតី។
តារាម្នាក់ត្រូវចោទប្រកាន់ពីបទថតវីដេអូ និងបានចែកចាយវីដេអូនោះ។
តារាទាំងពីរក៏តុលាការតម្រូវឲ្យចូលសិក្សា ពីវគ្គអប់រំស្តីពីការព្យាបាលអំពើហឹង្សាផ្លូវភេទ រយៈពេល ៨០ម៉ោងផងដែរ និងត្រូវបានហាមឃាត់មិនឲ្យធ្វើការងារជាមួយនឹងកុមារឡើយ។
វាគឺជាករណីមួយក្នុងចំណោមរឿងអាស្រូវជាច្រើនទៀត ដែលបានធ្វើឲ្យរញ្ជួយពិភពលោក K-pop ក្នុងរយៈពេលប៉ុន្មានឆ្នាំចុងក្រោយនេះ។
ចៅក្រម Kang Seong-Soo បាននិយាយថា ជនជាប់ចោទឈ្មោះ Jung Joon-Young វ័យ ៣០ឆ្នាំ បានធ្វើការរំលោភលើស្រ្តីជាច្រើន ដែលមានសភាពស្រវឹង និងមិនមានលទ្ធភាពរើបម្រាស់ និងបានថតវីដេអូស្រាតរបស់ស្រ្តីរងគ្រោះ និងរួមភេទ រួចបន្ទាប់មកបានធ្វើការចែកចាយចូលក្នុងក្រុមសន្ទនា (Group Chat)។
លោកចៅក្រមថ្លែងថា “ពួកយើងពិតជាមិនអាចស្រមៃមើល ដឹងពីភាពឈឺចាប់របស់ជនរងគ្រោះឡើយ”។
លោកក៏បានលើកឡើងថា ជនជាប់ចោទ Jung Joon-Young បានចាត់ទុកជនរងគ្រោះជាឧបករណ៍សប្បាយ។
នៅក្នុងតុលាការ Jung Joon-Young ដែលចាប់ផ្តើមមានឈ្មោះល្បីតាមរយៈកម្មវិធីទូរទស្សន៍ បាននិយាយថា “ខ្ញុំពិតជាមានការសោកស្តាយខ្លាំងណាស់ ចំពោះទង្វើរបស់ខ្ញុំ។ ខ្ញុំពិតជាមានវិប្បដិសារីណាស់”។
កាលពីខែមីនា ទណ្ឌិតរូបនោះបានឈប់ពីសិល្បៈ ក្រោយបានទទួលស្គាល់ថា គាត់បានធ្វើការថតវីដេអូ ដោយសម្ងាត់លើស្រ្តីជាច្រើន និងបានធ្វើការចែកចាយវា។
ចំណែកទណ្ឌិតម្នាក់ទៀតឈ្មោះ Choi Jong-Hoon ដែលជាអតីតសមាជិករបស់ក្រុមចម្រៀង F.T Island ដែលមានចម្រៀងអាល់ប៊ុមលេខ ១ក្នុងប្រទេសកូរ៉េ ត្រូវបានតុលាការនិយាយថា ទណ្ឌិតវ័យ ៣០ឆ្នាំរូបនោះនិយាយថា មិនបានបង្ហាញពីវិប្បដិសារីនោះទេ ក្រោយធ្វើការចាប់រំលោភជនរងគ្រោះជាច្រើន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC