ខេត្តស្វាយរៀងៈ លោក ម៉ែន វិបុល អភិបាលខេត្តស្វាយរៀងនៅព្រឹកថ្ងៃទី៣០ ខែវិច្ឆិកា ឆ្នាំ២០១៩នេះ បានអញ្ជើញជាអធិបតី ក្នុងពិធីអបអរសាទរខួបលើកទី៤១ នៃកំណើតសហភាពសហព័ន្ធយុវជនកម្ពុជា ២ធ្នូ ១៩៧៨-២ធ្នូ ២០១៩ ក្រោមប្រធានបទ “ស.ស.យ.ក ក្រុមគ្រួសារ ចិត្ត បេះដូង ស្មារតី ភាសា កម្លាំងតែមួយ” ដែលរៀបចំនៅរង្វង់មូលខាងមុខសាលាក្រុងស្វាយរៀង ខេត្តស្វាយរៀង ។
មានប្រសាសន៍ទៅកាន់សមាជិក សមាជិកា ស.ស.យ.ក ខេត្តស្វាយរៀងជាង១.០០០នាក់ នៃពិធីនេះ លោកអភិបាលខេត្តបានថ្លែងអំណរគុណ និងកោតសរសើរចំពោះយុវជនសហភាពសហព័ន្ធយុវជនកម្ពុជាខេត្តស្វាយរៀង ដែលតែងតែបានរួមចំណែកយ៉ាងសកម្ម ក្នុងកិច្ចការងារជាច្រើន ក្នុងបុព្វហេតុដើម្បីសុខសន្តិភាព និងការអភិវឌ្ឍន៍រីកចម្រើនសម្រាប់សង្គមជាតិ ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។
លោកអភិបាលខេត្តបានបន្តថា ក្នុងនាមថ្នាក់ដឹកនាំខេត្តស្វាយរៀង ពិតជាបានមើលឃើញ នូវការរួមចំណែករបស់យុវជនប្រកបដោយឆន្ទៈ ការលះបង់ខ្ពស់ ដោយគិតពីប្រយោជន៍ជាតិ និងប្រជាជនជាធំ ម្យ៉ាងទៀត សហភាពសហព័ន្ធយុវជនកម្ពុជាខេត្តស្វាយរៀង បានក្លាយជាដៃគូដ៏សំខាន់របស់អាជ្ញាធរ និងកងកម្លាំងគ្រប់លំដាប់ថ្នាក់ក្នុងការកសាងអភិវឌ្ឍន៍ខេត្ត ការងារសង្គម និងសកម្មភាពមនុស្សធម៌នានា តួយ៉ាងសកម្មភាពនៃការជួយឧបត្ថម្ភដល់ប្រជាពលរដ្ឋដែលជួបគ្រោះថ្នាក់សង្គមផ្សេងៗ ការជួយជួសជុលផ្ទះជូនជាប្រជាពលរដ្ឋ ដែលមានជីវភាពខ្វះខាត ចាស់ជរាគ្មានទីពឹង ការពិនិត្យព្យាបាលជំងឺដោយឥតគិតថ្លៃ ការសហការរៀបចំព្រឹត្តិការណ៍សង្ក្រាន្តស្វាយរៀង ការងារផ្សព្វផ្សាយអប់រំពាក់ព័ន្ធនឹងច្បាប់ចរាចរណ៍ផ្លូវគោក ការប្រយុទ្ធប្រឆាំងគ្រឿងញៀន និងសកម្មភាពការងារសង្គមផ្សេងៗជាច្រើនទៀត ដែលជាចំណែកមួយយ៉ាងសំខាន់ ធ្វើឲ្យកិច្ចការទាំងអស់នោះ ទទួលបានលទ្ធផលល្អប្រសើរជូនសង្គមជាតិ ។
ជាមួយនេះ លោក ក៏បានមានប្រសាសន៍ លើកទឹកចិត្តបន្ថែមទៀត ដល់យុវជនទាំងអស់ ឲ្យបន្តអនុវត្តន៍នូវសកម្មភាពដ៏ល្អប្រពៃនេះ ដោយមិនត្រូវប្រព្រឹត្តនូវទង្វើទាំងឡាយណា ដែលសង្គមស្អប់ខ្ពើម ហើយក្នុងនាមជាយុវជនជំនាន់ក្រោយ និងជាអ្នកបន្តវេនដឹកនាំប្រទេសជាតិទៅថ្ងៃអនាគត ត្រូវខិតខំជួយថែរក្សាការពារ ឲ្យបាននូវសុខសន្តិភាព និងការអភិវឌ្ឍន៍ដែលរកបានយ៉ាងលំបាក ដោយយុវជនជំនាន់មុន ជាពិសេសសម្ដេចតេជោនាយករដ្ឋមន្ត្រី ៕ ដោយ៖វ៉ៃកូ