យន្តហោះមួយគ្រឿងបានធ្លាក់នៅក្នុងរដ្ឋ South Dakota សហរដ្ឋអាមេរិច បណ្តាលឲ្យស្លាប់មួយគ្រួសារ មានសមាជិកចំនួន ៩នាក់។ នេះបើតាមការបញ្ជាក់របស់មន្រ្តីអាមេរិច។
ជនរងគ្រោះជាសមាជិកគ្រួសារតែមួយមកពី ៤ជំនាន់ ដែលមានអាយុចន្លោះ ៧ឆ្នាំ និង ៨១ឆ្នាំ។
គ្រួសារទាំងនោះបានធ្វើដំណើរត្រឡប់មកផ្ទះ ពីការបរបាញ់សត្វកំសាន្ត នៅពេលយន្តហោះម៉ាស៊ីនមួយពួកគេបានធ្លាក់ ភ្លាមៗក្រោយពេលហោះឡើង។ នេះបើតាមការចុះផ្សាយរបស់កាសែត New York Times។
ក្នុងចំណោមអ្នកស្លាប់ ក៏មានអ្នកបើកយន្តហោះផងដែរ។ មានមនុស្សចំនួន ១២នាក់បាននៅលើយន្តហោះ មុនពេលវាធ្លាក់ ចំងាយប្រហែលជិត ២គីឡូម៉ែត្រពីព្រលាន Chamberlain។
ជនរងគ្រោះចំនួន ៣នាក់ដែលនៅរស់រាន ត្រូវបានគេបញ្ជូនទៅកាន់មន្ទីរពេទ្យនៅក្នុងតំបន់ទីក្រុង Sioux Falls៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia