បុគ្គលិកសង្រ្គោះបន្ទាន់ចំនួន ៣នាក់បានស្លាប់ ក្នុងហេតុការណ៍ធ្លាក់យន្តហោះស្ថិតនៅក្បែរទីក្រុង Marseille ប្រទេសបារាំង ខណៈពេលពួកគេកំពុងធ្វើប្រតិបត្តិការសង្រ្គោះនៅភាគខាងត្បូងបារាំង ដែលរងគ្រោះដោយទឹកជំនន់។ នេះបើតាមការបញ្ជាក់របស់ក្រសួងមហាផ្ទៃនៅថ្ងៃចន្ទនេះ។
ឧទ្ធម្ភាគចក្រប្រភេទ EC145 របស់ពួកគេបានបាត់បង់ការទាក់ទង និងរ៉ាដា ខណៈពេលកំពុងធ្វើបេសកម្មសង្រ្គោះ និងធ្វើការហោះហើរសង្កេតមើលនៅតំបន់ Var កាលពីយប់ថ្ងៃអាទិត្យ។
ជនរងគ្រោះទាំង ៣នោះត្រូវបានគេប្រទះឃើញស្លាប់នៅម៉ោង ១កន្លះយប់ ក្បែរទីក្រុងRove។ នេះបើតាមការបញ្ជាក់របស់រដ្ឋមន្រ្តីក្រសួងមហាផ្ទៃ លោក Christophe Castaner និយាយនៅក្នុងសេចក្តីប្រកាស។
អាជ្ញាធរបារាំងកំពុងតែធ្វើការស៊ើបអង្កេត ដើម្បីដឹងពីមូលហេតុនៃគ្រោះអកុសលនោះ។
សូមបញ្ជាក់ថា ក៏មានមនុស្សចំនួន ២នាក់ផងដែរ បានស្លាប់កាលពីថ្ងៃអាទិត្យ ដោយសារតែទឹកជំនន់ នៅតំបន់ Riviera ដែលកំពុងរងការវាយប្រហារដោយភ្លៀងធ្លាក់ខ្លាំង៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
