សហរដ្ឋអាមេរិចកំពុងរៀបចំយកពន្ធនាំចូលពីបារាំង ដែលមានទំហំជាទឹកប្រាក់ ២,៤ពាន់លានដុល្លារ ដើម្បីជាការសងសឹកចំពោះបារាំងដែលបានកំណត់ពន្ធថ្មី លើផលិតផលបច្ចេកវិទ្យាអាមេរិច។
មន្រ្តីពាណិជ្ជកម្មជាន់ខ្ពស់អាមេរិច បាននិយាយថា ពន្ធថ្មីដែលបារាំងបានអនុម័តកាលពីខែកក្កដា មានគោលដៅលើក្រុមហ៊ុនបច្ចេកវិទ្យាធំៗរបស់អាមេរិច។
ផលិតផលបារាំងដែលអាចប្រឈមនឹងការយកពន្ធ ១០០ភាគរយរួមមានផលិតផលផលិតពីទឹកដោះគោ ស្រា ផលិតផលតុបតែងខ្លួន និងកាបូបយួរជាដើម។
អ្នកតំណាងពាណិជ្ជកម្មអាមេរិចលោក Robert Lighthizer បានថ្លែងថា “ការសម្រេចចិត្តរបស់អាមេរិចបានផ្ញើសារយ៉ាងច្បាស់ថា អាមេរិចនឹងចាត់វិធានការប្រឆាំងទៅនឹងរបបពន្ធ ដែលមានការរើសអើង ឬក៏ការដាក់បន្ទុកលើក្រុមហ៊ុនអាមេរិច”។
បារាំងធ្លាប់បានអះអាងជាយូរមកហើយថា ការយកពន្ធមិនផ្អែកទៅលើសកម្មភាពឌីជីថល ហើយមិនគិតទៅលើថា ក្រុមហ៊ុនទាំងនោះមានទីស្នាក់ការធំមកពីណានោះទេ។
ច្បាប់ថ្មីរបស់បារាំងនឹងធ្វើការយកពន្ធចំនួន ៣ភាគរយលើការលក់សេវាកម្មបច្ចេកវិទ្យា ដែលស្ថិតក្នុងទឹកដីរបស់ខ្លួន។ ច្បាប់នោះនឹងអនុវត្តលើក្រុមហ៊ុនបច្ចេកវិទ្យាណា ដែលមានចំណូលច្រើនជាង ៨៥០លានដុល្លារ ហើយក្នុងចំណូលនោះ មានចំនួនយ៉ាងតិច ៣០លានដុល្លាររកបាននៅបារាំង។
ច្បាប់ពន្ធនោះដែលចូលជាធរមានកាលពីដើមឆ្នាំ ២០១៩ ត្រូវគេរំពឹងថានឹងអាចរកចំណូលជូនរដ្ឋបានជិត ៥០០លានដុល្លារឆ្នាំនេះ។
ក្រុមហ៊ុនប្រហែល ៣០ នឹងត្រូវធ្វើការបង់ពន្ធជូនបារាំង ហើយក្រុមហ៊ុនភាគច្រើនជារបស់អាមេរិចមានដូចជា ក្រុមហ៊ុន Apple, Facebook, Amazon, Microsoft និង Alphabet ជាដើម។
ក្រុមហ៊ុន Amazon បានធ្វើការឆ្លើយតបចំពោះវិធានការ របស់បារាំងរួចហើយ ដោយធ្វើការដំឡើងតម្លៃចំនួន ៣ភាគរយសម្រាប់ជំនួញបារាំង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC