ស៊ីហ្គេមហ្វីលីពីន៖ ក្រុមកីឡាប៉ែតង់កម្ពុជាផ្នែកនារីបានយកឈ្នះ២ប្រកួត វិញ្ញាសាក្រុម ដោយឈ្នះម៉ាឡេស៊ី ដោយលទ្ធផលពិន្ទុ ១៣ទល់១០ និងបន្តយកឈ្នះក្រុមនារីឥណ្ឌូណេស៊ី ក្នុងពិន្ទុដាច់ឆ្ងាយ ១៣ទល់១ ខណៈក្រុមប៉េតង់កម្ពុជាផ្នែកបុរសឈ្នះ១ប្រកួត និងចាញ់១ប្រកួត នៅក្នុងវគ្គជម្រុះពូលA ថ្ងៃទី២ ធ្នូ ម្សិលមិញ នៃស៊ីហ្គេម លើកទី៣០ នៅប្រទេសហ្វីលីពីន។
កីឡាករជម្រើសជាតិកម្ពុជា សុខ ចាន់មាន បញ្ជាក់ថា សម្រាប់ក្រុមនារីកម្ពុជា ដែលឈ្នះ២ប្រកួតនេះ គឺឈរលេខ១ក្នុងពូលA បើទោះបីជានៅសល់១ប្រកួតទៀត ជាមួយក្រុមនារីម្ចាស់ផ្ទះ ហ្វីលីពីន នាថ្ងៃទី៤ធ្នូនោះ ចាញ់ក៏ដោយ ក៏ក្រុមនារីបានឡើងទៅប្រកួត នៅវគ្គពាក់កណ្តាលផ្តាច់ព្រ័ត្រដែរ ពោលគឺឈរនៅក្នុងចំណាត់ថ្នាក់មេដាយសំរឹទ្ធ លើវិញ្ញាសានេះហើយ។
ចំពោះក្រុមប៉េតង់បុរសកម្ពុជា បានយកឈ្នះនៅជុំទី១ ជាមួយម្ចាស់ផ្ទះ ហ្វីលីពីន ដោយលទ្ធផលពិន្ទុ ១០ទល់៩ ដោយអស់ម៉ោង ខណៈនៅប្រកួតទី២ គឺប្រកួតចាញ់វៀតណាម ដោយលទ្ធផល ៩ទល់១២ ដូច្នេះក្រុមបុរសកម្ពុជាត្រូវការឈ្នះ១ប្រកួតជាមួយក្រុមឡាវ នាថ្ងៃស្អែក ដើម្បីកក់កៅអីឡើងទៅវគ្គពាក់កណ្តាលផ្តាច់ព្រ័ត្រ ប៉ុន្តែបើកម្ពុជាចាញ់ឡាវ នឹងត្រូវធ្លាក់ចេញត្រឹមវគ្គជម្រុះក្នុងពូលA នេះហើយ ដោយការប្រកួតជាមួយឡាវ ត្រូវប្រកួតនៅថ្ងៃអង្គារ៍នេះ ប៉ុន្តែត្រូវលើកពេល ដោយសារមានខ្យល់ព្យុះបោកបក់លើមកទីក្រុងម៉ានិល និងទីក្រុងClark។
សហព័ន្ធកីឡាប៊ូល និងប៉េតង់កម្ពុជា បានបញ្ជូនកីឡាករ៦នាក់ និងកីឡាការិនី ៦នាក់ ដើម្បីចូលរួមប្រកួតប្រជែងមេដាយ ក្នុងស៊ីហ្គេម នៅហ្វីលីពីន។
គិតមកដល់ត្រឹមព្រឹកថ្ងៃទី៣ ខែធ្នូនេះ គឺកម្ពុជាឈរនៅចំណាត់ថ្នាក់លេខ៧បណ្តោះអាសន្ន ដោយឈ្នះបានមេដាយមាស១គ្រឿង ប្រាក់៣ និងសំរឹទ្ធ១៣គ្រឿង សរុប១៧គ្រឿង ខណៈម្ចាស់ផ្ទះ ហ្វីលីពីនឈរលេខ១ លើតារាងមេដាយ ដោយឈ្នះមេដាយមាសលើសលុប ៣៨គ្រឿងសរុប៧២គ្រឿង។
លោក វ៉ាត់ ចំរើន នាយបេសកកម្មស៊ីហ្គេមកម្ពុជា បានជម្រាបដល់ក្រុមកីឡាកម្ពុជាទាំងអស់ថា តាមម្ចាស់ផ្ទះជូនដំណឹង ព្យុះមានភ្លៀងនឹងមកដល់ Clark និងManila នៅថ្ងៃអង្គារ៍នេះ ដោយប្រភេទកីឡាខ្លះត្រូវលើកពេលប្រកួត ឬត្រូវពន្យារពេល ដើម្បីបង្កើនការប្រុងប្រយ័ត្នខ្ពស់ ក្នុងការដើរចេញក្រៅ ឬជ្រកក្រោមដើមឈើ។ លោកស្នើឲ្យក្រុមកីឡាកម្ពុជាទាំងអស់ តាមដានព័ត៌មានជាមួយគណៈកម្មការ រៀបចំការប្រកួតតាមប្រភេទកីឡានីមួយៗ បើមានការប្រែប្រួល សូមផ្តល់ដំណឹងតាមក្រុមនេះជាប្រញាប់៕ដោយ៖បញ្ញាស័ក្តិ