ភ្នំពេញ៖ អភិបាលក្រុងប្រាហ្សាវិល (Brazzaville) ប្រទេសកុងហ្គោ និងជាអនុប្រធានសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF) បានថ្លែងថា ប្រតិភូទាំងមូល នឹងប្រឹងប្រែងធ្វើយ៉ាងណាធ្វើការសង្កេតការណ៍ និងសិក្សាពីកម្ពុជា ដើម្បីយកបទពិសោធន៍ទាំងនេះ ទៅអនុវត្តនៅតាមប្រទេសរបស់គាត់រៀងៗខ្លួន។
នៅព្រឹកថ្ងៃទី៣ ខែធ្នូ ឆ្នាំ២០១៩នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានទទួលជួបពិភាក្សាការងារជាមួយលោក គ្រីស្យង់ រ៉ូហ្សេ អូគេមបា (Christian Roger Okemba) អភិបាលក្រុងប្រាហ្សាវិល (Brazzaville) ប្រទេសកុងហ្គោ និងជាអនុប្រធានសមាគមអន្តរជាតិអភិបាលក្រុងប្រើប្រាស់ភាសាបារាំង (AIMF)។
ក្នុងជំនួបនេះ ប្រតិភូអភិបាលក្រុងប្រើប្រាស់ភាសាបារាំង បានជម្រាបជូនសម្តេចតេជោនាយករដ្ឋមន្ត្រីថា ប្រតិភូរបស់លោកបានមកកាន់ព្រះរាជាណាចក្រកម្ពុជា ថ្វីត្បិតតែមិនទាន់បានធ្វើទស្សនកិច្ចនៅទូទាំងទីក្រុងភ្នំពេញក៏ដោយ ក៏ប៉ុន្តែអ្វីដែលបណ្ដាអភិបាលក្រុងទាំងអស់ សង្កេតឃើញ និងវាយតម្លៃនោះបានឃើញថា រាជធានីភ្នំពេញគឺជាទីក្រុងមួយ ដែលមានភាពចំណាស់ ហើយក៏មានភាពធន់និងស្រស់បំព្រងផងដែរ ក្នុងន័យនេះលោកនិងប្រតិភូទាំងមូល នឹងប្រឹងប្រែងធ្វើយ៉ាងណាធ្វើការសង្កេតការណ៍ និងសិក្សាពីកម្ពុជាដើម្បីយកបទពិសោធន៍ទាំងនេះ ទៅអនុវត្តនៅតាមប្រទេសរបស់គាត់រៀងៗខ្លួនថែមទៀត ។
សម្ដេចតេជោនាយករដ្ឋមន្ត្រី បានមានប្រសាសន៍ថា ប្រធានបទនៃការកសាងក្រុងនៃកិច្ចប្រជុំនៅពេលនេះ គឺពិតជាមានសារសំខាន់ណាស់។ ទីក្រុងភ្នំពេញក៏បានកសាងឡើងជំនាន់បារាំង ហើយក៏បានកសាងឡើងថែមទៀត នៅជំនាន់ ដែលកម្ពុជាទទួលបានឯករាជ្យ ប៉ុន្តែអ្វីដែលជាការសោកស្ដាយនោះ ទីក្រុងភ្នំពេញគឺត្រូវបានបំផ្លាញដោយរបបប្រល័យពូជសាសន៍ ប៉ុល ពត ។ ជាមួយគ្នានេះ សម្តេចតេជោ បានមានប្រសាសន៍ថា នៅពេលដែលសម្ដេចបានវិលត្រឡប់មកកាន់រាជធានីភ្នំពេញវិញ ទីក្រុងទាំងមូល គឺមានប្រជាជនប្រមាណតែ ៧០នាក់តែប៉ុណ្ណោះ ហើយទីក្រុងទាំងមូលពុំមានបញ្ហាប្រឈមច្រើននោះទេ ដែលបញ្ហាប្រឈមនៅពេលនោះគឺក្នុងទីក្រុងពុំមានមនុស្សរស់នៅ ពុំមានចរាចរណ៍ឡានបើកបរ ប៉ុន្តែផ្ទុយទៅវិញនៅពេលនេះរាជធានីភ្នំពេញ គឺជួបប្រឈមនឹងបញ្ហាថ្មីៗជាច្រើន មានដូចជា ១)បញ្ហាចរាចរណ៍ និងគ្រោះថ្នាក់ចរាចរណ៍ ដែលនាំទៅដល់ការស្លាប់ប្រជាពលរដ្ឋជាច្រើន ហើយការធ្វើដំណើរមានការយឺតយ៉ាវ។ ២) គឺបញ្ហាប្រឈមខ្វះចំណតរថយន្ត , ក្នុងន័យនេះ សម្ដេចតេជោ ក៏បានជម្រាបជូន ប្រតិភូទាំងមូលថា សម្ដេច បានណែនាំ លោកអភិបាលរាជធានីភ្នំពេញ ពិនិត្យនិងធ្វើយ៉ាងណាជំរុញឲ្យមានការវិនិយោគ ទៅលើការបង្កើតចំណតរថយន្តនៅក្រោមសួនច្បារនានា ដើម្បីដោះស្រាយបញ្ហានេះ និងទី៣)បញ្ហាសំរាមដែលកំពុងតែប្រឈម, សម្ដេចមានប្រសាសន៍ថា រាជធានីភ្នំពេញគឺមានសំរាមប្រមាណ៣ពាន់តោនក្នុងមួយថ្ងៃ ហើយបើយើងមិនប្រមូលទាន់ទេ សំរាមនេះនឹងពូនឡើង ធ្វើឲ្យមានបញ្ហាដល់សោភ័ណភាពផង អនាម័យទីក្រុងផង។ ជាមួយគ្នានេះផងដែរ សម្ដេចតេជោនាយករដ្ឋមន្ត្រីបានបន្តថា ក្នុងការដោះស្រាយបញ្ហានេះ គឺយើងកំពុងជំរុញឲ្យមានការចូលរួមពីវិស័យផ្សេងៗ ក៏ដូចជាវិស័យឯកជនដែរ ដើម្បីធ្វើយ៉ាងណាកែប្រែសំរាមនេះ ឲ្យទៅជាថាមពលអគ្គិសនីយកមកប្រើប្រាស់ឡើងវិញ និង៤)បញ្ហាអាងសំណល់រាវ , រាជធានីភ្នំពេញ គឺជារាជធានីមួយដែលមានកម្ពស់ទាប ហើយពីដើមឡើយ សុទ្ធសឹងតែបឹងបួ ក្នុងន័យនេះ ការបង្ហូរសំណល់រាវ ទៅទន្លេបឹងបួនោះ ពុំទាន់មានការធ្វើអាងប្រព្រឹត្តិកម្ម ឬក៏អាងចម្រោះបានត្រឹមត្រូវនៅឡើយ នេះក៏ជាបញ្ហាប្រឈមផងដែរ។ ជាមួយគ្នានេះ សម្ដេចតេជោ មានប្រសាសន៍ថា បញ្ហាទាំងនេះគប្បីណាយកមកពិចារណាដោះស្រាយ មុននឹងជំរុញការអភិវឌ្ឍទីក្រុងថ្មី។ ទន្ទឹមនឹងបញ្ហាប្រឈមនេះ សម្តេចតេជោ ក៏បានលើកឡើងដែរថា បញ្ហាប្រឈមនេះគឺបណ្ដាលមកពីការអភិវឌ្ឍ ដែលមានភាពជឿនលឿនជាទីបំផុត ហើយការអភិវឌ្ឍនេះ ទៀតសោតគឺបានមកអំពី កត្តាសុខសន្តិភាព ស្ថិរភាព ដែលកម្ពុជាមាន។ សុខសន្តិភាព ស្ថិរភាព គឺជាកត្តាទាក់ទាញនៃការវិនិយោគ ហើយការវិនិយោគនេះហើយ ដែលលេចចេញ នូវបញ្ហាប្រឈមថ្មីៗដែលកម្ពុជាកំពុងតែជួបប្រទះ។
សម្ដេចតេជោនាយករដ្ឋមន្ត្រី ក៏បានផ្ដាំផ្ញើជូនដល់ប្រតិភូទាំងមូល នូវការគោរព និងសួរសុខទុក្ខដល់ប្រមុខរដ្ឋ ប្រមុខរដ្ឋាភិបាលរបស់ប្រទេសទាំងអស់ ដែលបានចូលរួម ហើយបានជូនពរឱ្យកិច្ចប្រជុំ លើប្រធានបទ ការកសាងទីក្រុងដែលជាប្រធានបទដ៏មានសារសំខាន់នេះ ទទួលបានជោគជ័យ៕ដោយ៖កូឡាប