ខេត្តស្វាយរៀងៈ សិស្សសាលាម្នាក់ បានរងរបួសធ្ងន់ ហើយបានស្លាប់ នៅក្នុងករណីគ្រោះថ្នាក់ចរាចរណ៍មួយ បង្កឡើងដោយខ្លួនឯង ដែលហេតុការណ៍ខាងលើនេះ បានកើតឡើងកាលពីវេលាម៉ោង៦និង៤០នាទីព្រឹកថ្ងៃទី ៣ ខែធ្នូ ឆ្នាំ ២០១៩ ផ្លូវជាតិលេខ១ ចន្លោះបង្គោលគីឡូម៉ែត្រលេខ១៤១ -១៤២ ស្ថិតនៅក្នុងភូមិក្បាលថ្នល់ ឃុំកណ្តៀងរាយ ស្រុកស្វាយទាប ខេត្តស្វាយរៀង ។
សមត្ថកិច្ចបានឱ្យដឹងថាៈ ម៉ូតូជនរងគ្រោះម៉ាក អ៊ិចស្ទឺ ពណ៌ខ្មៅ ផ្លាកលេខ ភ្នំពេញ 1HG 1995 បើកបរដោយឈ្មោះ មិត្ត សជាធាម៉ៃសិទ្ធិ ភេទប្រុស អាយុ១៤ឆ្នាំ មុខរបរសិស្ស រស់នៅភូមិដើមពោធិ៍ ឃុំកណ្តៀងរាយ ស្រុកស្វាយទាប ខេត្តស្វាយរៀង ទិសដៅពីកើតទៅលិច មកដល់ចំណុចកន្លែងកើតហេតុខាងលើ បានចាប់ហ្រ្វាំងបោកដួលខ្លួនឯង បណ្តាលឲ្យរងរបួសធ្ងន់ (ពាក់មួកសុវត្ថិភាព) អ្នករងរបួសបានបញ្ជូនទៅមន្ទីរពេទ្យខេត្តស្វាយរៀង ហើយក៏ស្លាប់នៅទីនេះ ។
ប្រភពដដែលបានបន្តថាៈ ចំពោះមធ្យោបាយខូចខាតស្រាល ហើយបានយកមករក្សាទុកនៅ អធិការដ្ឋាននគរបាលស្រុកស្វាយទាប។ នគរបាលបញ្ជាក់ពីមូលហេតុថា ម៉ូតូប្រើប្រាស់ល្បឿនលឿន ៕ដោយ៖វ៉ៃកូ