តាកែវ៖អាជ្ញាធរខេត្តតាកែវ បានធ្វើការចាត់ទុកវគ្គបណ្តុះបណ្តាលវិក្រឹត្យការមូលដ្ឋាន គឺជាការបង្កើន និងអភិវឌ្ឍន៍សមត្ថភាពមន្រ្តីរាជការនៅថ្នាក់មូលដ្ឋានឲ្យកាន់តែមានចំណេះដឹងពិតប្រាកដ ដើម្បីយកមកបម្រើនៅក្នុងអង្គភាពរៀងៗខ្លួន ។
ថ្លែងនៅក្នុងឱកាសអញ្ជើញបើកវគ្គបណ្តុះបណ្តាលវិក្រឹត្យការមូលដ្ឋានដល់មន្រ្តីរាជការខេត្តតាកែវ ខេត្តព្រៃវែង និងខេត្តស្វាយរៀង ប្រមាណជាង៥០នាក់ ដែលមានរយៈពេល៥ថ្ងៃ ចាប់ពីថ្ងៃទី០២ខែធ្នូ ដល់ថ្ងៃទី០៦ ខែធ្នូ ឆ្នាំ២០១៩ លោក មូល វិចិត្រ អភិបាលរងខេត្តតាកែវ បានមានប្រសាសន៍ថា ការរៀបចំវគ្គ បណ្តុះបណ្តាលនេះ គឺដើម្បីចែករំលែកចំណេះដឹង ពាក់ព័ន្ធទៅនឹងកំណែទម្រង់រដ្ឋបាលថ្នាក់ក្រោមជាតិ ដោយមានមុខវិជ្ជាសំខាន់ៗដូចជា នីតិមុខងារសាធារណៈ កំណែទម្រង់វិមជ្ឈការ និងវិសហមជ្ឈការ រចនាសម្ព័ន្ធក្រសួងមហាផ្ទៃ រចនាសម្ព័ន្ធថ្នាក់ក្រោមជាតិ អភិបាលកិច្ចល្អ និងគំនិតច្នៃប្រឌិតជូនមន្រ្តីរាជការដែលមានមុខតំណែង មិនមានមុខតំណែងដែលកំពុងតែបម្រើការងារនៅតាមរដ្ឋបាលខេត្តនីមួយៗ ។
លោក មូល វិចិត្រ អភិបាលរងខេត្ត បន្តថា មុខវិជ្ជាដែលកំពុងតែសិក្សាក្នុង វគ្គបណ្តុះបណ្តាលនេះ គឺជាមុខវិជ្ជាដែលទាក់ទងផ្ទាល់ទៅនឹងការបំពេញការងារប្រចាំថ្ងៃ និងជាប្រធានបទចាំបាច់ ដែលយើងត្រូវតែខិតខំសិក្សាស្វែងយល់ឲ្យបានស៊ីជម្រៅ ក្នុងគោលបំណងយល់ឲ្យច្បាស់អំពីការទទួលខុសត្រូវ និងតួនាទី ភារកិច្ច ដើម្បីជាមូលដ្ឋានជំរុញឲ្យការបំពេញការងារនៅក្នុងអង្គភាពរបស់ខ្លួន កាន់តែងាយស្រួល និងកាន់តែមានប្រសិទ្ធភាព សំដៅបម្រើសេវាសាធារណៈជូនប្រជាពលរដ្ឋ ក៏ដូចជាជំរុញការអភិវឌ្ឍន៍មូលដ្ឋានកាន់តែប្រសើរប្រកបដោយនិរន្តរភាព និងបរិយាប័ន្ន ។
ជាមួយគ្នានេះដែរ លោក មូល វិចិត្រ ក៏បានសំណូមពរទៅដល់សិក្ខាកាមទាំងអស់ ត្រូវបង្កើនការ យកចិត្តទុកដាក់សិក្សា ស្វែងយល់មុខវិជ្ជាទាំងឡាយដែលនឹងផ្តល់ក្នុងវគ្គបណ្តុះបណ្តាលវិក្រឹត្យការ មូលដ្ឋាននេះ គោរពបទបញ្ជាផ្ទៃក្នុង ព្រមទាំងរក្សានូវសីលធម៌ សុជីវធម៌ និងទំនាក់ទំនងល្អ ដើម្បីធានា ឲ្យការបម្រើការងារនៅតាមអង្គភាពរបស់ខ្លួន ទទួលបានលទ្ធផលល្អប្រសើរ និងជោគជ័យបន្ទាប់ពីទទួល បានវគ្គបណ្តុះបណ្តាលនេះ ពិសេសការបម្រើសេវាជូនពលរដ្ឋ កាន់តែភាពល្អប្រសើរ និងការទទួលខុសត្រូវខ្ពស់ ៕ដោយ៖តាកែវ